ޖެނުވަރީގައި މީރާ އިން 3.34 މިލިއަން ރުފިޔާ ބަލައިގެންފި

ނިމިދިޔަ ޖެނުވަރީގައި މީރާ އިން 3.34 މިލިއަން ރުފިޔާ ބަލައިގެންފިއެވެ.

މީރާގެ މަހު އާމްދަނީގެ ތަފާސް ހިސާބުތަކަށް ބަލާއިރު ޓެކްސްގެ ގޮތުގައި ލިބުނު އާމްދަނީގެ ގޮތުގައި 3.28 ބިލިއަން ރުފިޔާ ލިބިފައިވާއިރު، އޭގެ ތެރޭގައި ޑިޕާޗާ ޓެކްސް، ބިޒްނަސް ޕްރޮފިޓް ޓެކްސް، އިންކަމް ޓެކްސް، ގްރީން ޓެކްސް، ޖީއެސްޓީ، ލޭންޑް ސޭލްސް ޓެކްސް، އަދި ރެމިޓެންސް ޓެކްސް ހިމެނެ އެވެ. މީގެ އިތުރުން ޓެކްސް ނޫން އާމްދަނީގެ ގޮތުގައި ޖުމްލަ 312 މިލިއަން ރުފިޔާ ލިބިފައިވާއިރު، އެންމެ ގިނަ ޓެކްސް ލިބިފައިވަނީ އެއާޕޯޓް ޑިވެލޮޕްމަންޓް ފީއާއި ވޯކް ޕާމިޓް ފީއާއި ކޯޓާ ފީއިންނެވެ.

ޖެނުއަރީ މަހުގެ ތަފާސް ހިސާބުން ދައްކާ ގޮތުގައި ޖީއެސްޓީން 47.7 އިންސައްތަ ލިބިފައިވާއިރު، އިންކަމް ޓެކްސް އިން 35.8 އިންސައްތަ، އެއާޕޯޓް ޑިވެލޮޕްމަންޓް ފީ އިން 3.5 އިންސައްތަ، ގްރީން ޓެކްސް އިން 3.4 އިންސައްތަ، އަދި ޓޫރިޒަމް ލޭންޑް ރެންޓް އިން 2 އިންސައްތަ ޓެކްސް ލިބިފައިވެ އެވެ.

ޑޮލަރުގެ ޓެކްސް އާމްދަނީގެ ގޮތުގައި މީރާއަށް 125.49 މިލިއަން ޑޮލަރު ލިބިފައިވާއިރު، އޭގެ ތެރެއިން 55.1 އިންސައްތަ ޓެކްސް ލިބިފައިވަނީ ޓޫރިޒަމް ގޫޑްސް އެންޑް ސާވިސަސް ޓެކްސް (ޓީޖީއެސްޓީ) އިން، 23 އިންސައްތަ އިންކަމް ޓެކްސް އިން، 6 އިންސައްތަ އެއާޕޯޓް ޑިވެލޮޕްމަންޓް ފީން، 5.9 އިންސައްތަ ޑިޕާޗާ ޓެކްސް އިން، 5.6 އިންސައްތަ ގްރީން ޓެކްސް އިން، އަދި 3.4 އިންސައްތަ ލިބިފައި ވަނީ ޓޫރިޒަމް ލޭންޑް ޓެކްސް އިންނެވެ.

މީރާ އިން ރިޕޯޓްކޮށްފައިވާ ގޮތުގައި އިންކަމް ޓެކްސްގެ މުއްދަތު އިތުރުކުރި ނަމަވެސް، ޖެނުވަރީ މަހަށް ލަފާކުރި ވަރަށް ވުރެ މަތީ އާމްދަނީއެއް މިފަހަރު މީރާއަށް ހޯދިފައި ވެއެވެ. މިފަހަރު ޓެކްސް އިތުރުވުމުގެ އެއް ސަބަބެއްގެ ގޮތުގައި މީރާއިން ޖީއެސްޓީ އާއި ކޯޕަރޭޓް އިންކަމް ޓެކްސް ވަގުތުން ދައްކާފައިވުން ފާހަގަކޮށްފައެވެ. މީގެ އިތުރުން ރާއްޖެއަށް މިދިޔަ މަހު ފަތުރުވެރިން އައި މިންވަރު 2 އިންސައްތައިން އިތުރުވުމުން ފަތުރުވެރިކަމާ ގުޅުންހުރި ޓެކްސް އިތުރުވި ކަމަށް މީރާ އިން ބުންޏެވެ.