ޝަރުތު ހަމަނުވެ ފުލެޓް ލިބުނު މީހުންގެ ލިސްޓް އާއްމުކުރުމާ މެދު ގޮތެއް ނުނިމޭ: އޭސީސީ

ނިމިދިޔަ ރައީސް އިބުރާޙިމް މުހައްމަދު ޞާލިޙްގެ ސަރުކާރު ނިމެން ގާތްވެފައި ވަނިކޮށް "ގެދޮރު ވެރިޔާ ސްކީމު" ގެ ދަށުން ޝަރުތު ހަމަނުވާ 60 އިންސައްތަ މީހުންނަށް ފުލެޓް ދޫކޮށްފައިވާ ކަމަށް އޭސީސީން ބުނެފައިވާއިރު، އެމީހުންގެ ލިސްޓް އަދި އާއްމުކުރުމަށް ނިންމާފައި ނުވާކަމަށް އޭސީސީން ބުނެފިއެވެ.

އެންޓި ކޮރޮޕްޝަން ކޮމިސަން، އޭސިސީން މިފަދައިން ބުނެފައިވަނީ ފަހިދިރިއުޅުން ކޯޕަރޭޝަނުން ހަދާ 4000 ފުލެޓާއި ގުޅިގެން އާއްމުގެ ފަރާތުން މަޖިލިހަށް ފޮނުވަފައިވާ ސިޓީއަކާއި ގުޅިގެން މައުލޫމާތު ސާފު ކުރުމަށް އޭސީސީގެ މެމްބަރުން މަޖިލިހުގެ މިނިވަން މުއައްސަސާތަކާއި ބެހޭ ކޮމިޓީއަށް ހާޒިރު ކުރުމުން ކޮމެޓީގެ މެމްބަރަކު ކުރި ސުވާލަކަށް ޖަވާބު ދެއްވަމުންނެވެ.

މިއަދުގެ މި ކޮމެޓީގެ ބައްދަލުވުމުގައި ބައެއް މެމްބަރުން ވަނީ ފުލެޓް ދޫކޮށްފައިވާ މީހުންގެ ތެރެއިން 60 އިންސައްތަ މީހުން ޝަރުތު ހަމަނުވާކަމަށް ނިންމި އިރު އެމީހުން ޝަރުތު ހަމަނުވާ ސަބަބާއި އަދި އެއީ ކޮންބައެއްކަން ވެސް އޭސީސީން ސާފުކޮށްދެއްވަން ޖެހޭނެ ކަމަށް ބުނެ ވާހަކަ ދައްކަވާފައެވެ.

މެމްބަރުންގެ ސުވާލުތަކަށް ޖަވާބުދެއްވަމުން އޭސީސީގެ ރައީސް އާދަމް ޝާމިލް ވިދާޅުވީ ޝަރުތު ހަމަނުވަނީސް ފްލެޓް ލިބުނު ކަމަށް ކަނޑައެޅި މީހުންގެ ލިސްޓް އާއްމުކުރާނެތޯ އޭސީސީން ޖެހޭނީ މަޝްވަރާކުރަން ކަމަށާއި އެކަމަށް އަދި ގޮތެއް ނުނިންމާ ކަމަށެވެ.

"ސީދާ މުޅި ލިސްޓު އާންމުކުރާނީތޯ، ނޫންތޯ އަޅުގަނޑުމެން މަޝްވަރާކޮށް އަދި ގޮތެއް ނުނިންމާ،"

މެމްބަރެއްގެ ސުވާލަށް ޖަވބުދެއްވަމުން ޝާމިލް ވިދާޅުވިއެވެ.

އޭސީސީން ކުރި ތަޙްޤީގުގައި ފުލެޓް ދޭންޖެހޭ ކަމަށް ކަނޑައަޅާފައިވާ ޝަރުތު ހަމަ ނުވާ ގިނަ ބަޔަކަށް ފުލެޓް ލިބިފައިވާކަން ހާމަވެފައިވާއިރު ، ސަރުތު ހަމަވެ ފުލެޓް ލިބުނު ފަރާތްތަކަށް ފުލެޓް ދޫކުރުމަށް ހައުސިން މިނިސްޓްރީއަށް ލަފާ އަރުވާފައިވާނެ ކަމަށްވެސް އޭސީސީގެ ރައީސް މިއަދު ވިދާޅުވިއެވެ.

"އެ އުސޫލާއި އަޅުގަނޑުމެން ކަނޑައަޅާފައިވާ އަސާސްގެ މައްޗަށް ބިނާކޮށް ކުރިއަށް ގެންދިއުމަށް އަޅުގަނޑުމެން ވާނީ ހައުސިން މިނިސްޓްރީއަށް އަންގާފައި. އެކަން އަވަސް ކުރަން މިސާލަކަށް ތަހުގީގަށް ފާހަގަކުރެވުނު ކަންކަމުގެ އެހީތެރިކަން ބޭނުންވާ ނަމަ މިނިސްޓްރީއަށް އަޅުގަނޑުމެން ދޭނަން،"

ޝާމިލް ވިދާޅުވި އެވެ.

ފުލެޓްތަކުގެ ހައްގުވެރިންނަށް ފުލެޓް ދޫކުރުން ލަސްވެގެން އެކަން އަވަސް ކުރުމަށް ގޮވާލާ ކުއްލި މައްސަލައެއްވެސް މިއަދު ވަނީ މަޖިލިހަށް ހުށަހަޅާވައެވެ.