ކަރަންޓް ބިލު ބޮޑުވާ ސަބަބު ބަލައި، އެ ކުޑަކުރުމަށް ކުރެވޭނެ ކަންކަން ކުރަމުން މިދަނީ: ޠާރިޤް

ކަރަންޓް ބިލު ބޮޑުވާ ސަބަބު ބަލައި، ކުޑަކުރުމަށް ކުރެވޭނެ ކަންކަން ކުރަމުން ގެންދަވާ ކަމަށް ތިމާވެއްޓާއި ހަކަތައާއު ބެހޭ ވުޒާރާގެ ވަޒީރު ޠާރިޤް އިބްރާޙީމް ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި ހިތަދޫ ދެކުނު ދާއިރާގެ މެންބަރު އިބްރާޙީމް ނާޒިމް ވަނީ، ގޭބީސީ ތަކުގެ ކަރަންޓް ބިލު ބޮޑުވާ މައްސަލަ ބެލުމަށް ސަރުކާރުން މަސައްކަތް ކުރޭތޯ އާއި ބިލު ކުޑަކުރުމަށް ކަމެއް ކުރުމަށް ކުރެވޭނެ ކަންކަމާމެދު އެއްވެސް މަޝްވަރާއެއް ކުރައްވާފައުވޭތޯ ވަޒީރު ތާރިޤާ ސުވާލު ކުރައްވާފައެވެ.

އެ ސުވާލަށް ޖަވާބު ދެއްވަމުން ވަޒީރު ވިދާޅުވީ، ކަރަންޓް ބިލު ކުޑަކުރުމަށް ސަރުކާރުން ކެނޑިނޭޅި މަސައްކަތް ކުރަމުންދާ ކަމަށެވެ.

އަޅުގަނޑުމެން ކެނޑިނޭޅި މަސައްކަތް ކުރަމުން މިދަނީ ބިލު ކުޑަކުރެވޭނެ ގޮތްތަކަކީ ކޮބައިތޯ ބަލަމުން. އެގޮތުން އަޅުގަނޑުމެން ބެލި ބެލުމުގައި އެންމެ ބޮޑު ސަބަބެއް ކަމުގައި ބެލެވޭ ކަމަކީ، ރާއްޖެ އެތެރެކުރާ ތެޔޮ، އެތެރެ ކުރާ މިންވަރާ، ފުދޭ ވަރަކަށް ބޮޑު ޚަރަދެއް ކުރަންޖެހޭ ތެޔޮ އެތެރެ ކުރަން އަދި އެފިޝިއަންޓްކޮށް ޖެނެރޭޓް ކުރަން

ތިމާވެއްޓާއި ހަކަތައާއު ބެހޭ ވުޒާރާގެ ވަޒީރު ޠާރިޤް އިބްރާޙީމް

ވަޒީރު ވިދާޅުވިގޮތުގައި މިހާރުވެސް ޓެރިފްގެ ގޮތުގައި ކަނޑައެޅިފައިވާ ރޭޓަކީ ޖެނެރޭޓް ކުރުމަށް ކުރާ ޚަރަދަށްވުރެ ކުޑަ އަދަދެއް ކަމަށެވެ. އަދި އެކަން ރަނގަޅު ކުރެވޭނީ މުޅި ނިޒާމް އެފިޝިއަންޓް ކުރެވިގެން ކަމަށާ، އެ މަސައްކަތް މިހާރު ކުރައްވަމުންދާ ކަމަށް ވަޒީރު ވިދާޅުވިއެވެ.

”އެހެންވެގެން ސޯލާ ސިސްޓަމް، ރިނިޔުވަބަލް އެނާޖީ ސިސްޓަމް މުޅި ރާއްޖެއަށް ޑިވެލަޕްކުރަން މި މަސައްކަތް ކުރަނީ. އެގޮތުން ރައީސް މުޢިއްޒު ވަނީ ރާއްޖޭގެ ހުރިހާ ސަރަހައްދެއގައިވެސް އުފައްދާ ކަރަންޓް ގެ 31 ޕަސެންޓަކީ އިއާދަކުރުވަނިވި ހަކަތައަށް ހެދުމަށް މަސައްކަތް ކުރަން.“ ވަޒީރު ވިދާޅުވިއެވެ.

އަޅުގަނޑުމެން މި މަސައްކަތް މިކުރަނީ ކަރަންޓްގެ ޓެރިފާއި އެޕިޝިއަންސީ ރަނގަޅު ކުރަން. އެއާއެކު އަމިއްލަ ފަރާތްތަކަށް ކަރަންޓްގެ ޚިދުމަތް ނޫނީ ކަރަންޓް ބިލު ކުޑަކުރުމަށް މިހާރު މިވަނީ މަގޭ ސޯލާގެ ނަމުގައި ރޫފް ސޯލާ ސިސްޓަމް ހަރުކުރެވި، އެ މަސައްކަތް އިރާދަކުރެއްވިއްޔާ، ކުރިއަށް މިއޮތް މަހުގައި އަމަލީގޮތުން ފެށިގެންދާނެ.

ތިމާވެއްޓާއި ހަކަތައާއު ބެހޭ ވުޒާރާގެ ވަޒީރު ޠާރިޤް އިބްރާޙީމް

ވަޒީރު ވިދާޅުވީ، މަގޭ ސޯލާ ޕްރިޖެކްޓާއެކު އަމިއްލަ ފަރާތްތަކުގެ ކަރަންޓް ބިލުތައް ކުޑަވެގެން ދާނެ ކަމަށާ، އަދި އެ ސިސްޓަމް ގަތުމަށް، ދިގު މުއްތަކަށް ބަހާލައިގެން ފައިސާ ދެއްކޭނެ މަގުވެސް ފަހި ކުރެވިގެންދާނެ ކަމަށެވެ.

މިއާއެކު ވަޒީރު ވިދާޅުވީ، މަގޭ ސޯލާ ޕްރޮޖެކްޓްގެ މަސައްކަތާއި ގުޅޭ ގޮތުން ސްޓެލްކޯއާއި ފެނަކައާއު ވާހަކަ ދެކެވި، އެ ސިސްޓަމް ތަކުގެ 70 އިންސައްތަ ތަކެތި ރާއްޖެ ގެނައުމުގެ މަގުމަތީގައި އޮތް އިރު، އެއްބައި ރާއްޖެ ގެނެވިފައިވާ ކަމަށެވެ.