ބްރޯޑްކޮމްއަށް އެމްޑީޕީގެ އެކްޓިވިސްޓެއްކަމަށްވާ ގައިސް އައްޔަންކުރުމަށް އެމްޑީޕީން ނިންމައިފި

ޓީވީ އަދި ރޭޑިޔޯތައް ރެގިއުލޭޓްކުރުމުގެ ޒިންމާ ހަވާލުކުރެވިފައިވާ ބްރޯޑްކާސްޓިންގ ކޮމިޝަންގެ މެންބަރުކަމަށް ގދ.ތިނަދޫގައި އެމްޑީޕީގެ ކަންކަމުގައި އިސްކޮށް ހަރަކާތްތެރިވެފައިވާ ފަރާތެއްކަމުގައިވާ އަހުމަދު ގައިސް އައްޔަންކުރުމަށް އެމްޑީޕީގެ ޕީޖީ ގްރޫޕުން ވިޕެއް ނެރެފިއެވެ.

މި މަގާމަށް ގައިސްެގެ އިތުރުން އިތުރު ދެފަރާތެއް އައްޔަންކުރުމަށް އެމްޑީޕީން ވިޕެއް ނެރެފައިވެއެވެ. އެއީ މަރިޔަމް ވަހީދާ އާއި އަލީ ޔޫސުފް (އައްޔަ)އެވެ.

ފާހަގަކޮށްލެވޭ ގޮތުގައި ރައްޔިތުންގެ މަޖިލީހުގެ މިނިވަން މުއައްސަސާތަކާއި ބެހޭ ކޮމެޓީން ވަނީ ސަންގު ޓީވީގެ ޕްރެޒެންޓަރު ޝިފްލާ އިބްރާހިމް، ގައިސް އަދި އަލީ ޔޫސުފްގެ ތަރުތީބުން ނަންތައް ތަޅުމަށް ފޮނުވާފައެވެ. މި ފަރާތްތައް އައްޔަންކުރުމަށް ނިންމާފައިވަނީ ބްރޯޑްކޮމްއިން އިސްމާއިލް ސޮފްވާނާއި ހަސަން ނަބާހު އިސްތިއުފާދެއްވުމުން ހުސްވި ގޮނޑިތަކަށެވެ. އަދި މަރިޔަމް ވަހީދާ އައްޔަންކުރުމަށް ނިންމާފައި ވަނީ ބްރޯޑްކޮމްގެ ރައީސް ޝަހީބު އިސްތިއުފާާ ދެއްވުމުން ހުސްވި ގޮނޑިއަށެވެ.

އެމްޑީޕީން މިއަދު ވިޕް ނެރުނު ނަންތަކުގެ ތެރޭގައި ހިމެނޭ މަރިޔަމް ވަހީދާ އަދި އަލީ ޔޫސުފްއަކީ މީޑިޔާގެ ދާއިރާގައި ގިނަ ދުވަސްތަކެއް ވަންދެން ހަރަކާތްތެރިވެފައިވާ ފަރާތްތަކެކެވެ. ނަަމަވެސް ކޮމެޓީ މަރުހަލާގައާއި ރައީސުލްޖުމްހޫރިއްޔާގެ ލިސްޓުން އެއްވަނަ ހޯދި ނޫސްވެރިޔާ ޝިފްލާގެ ބަދަލުގައި އައްޔަންކުރުމަށް ފޮނުވި ގައިސްއަކީ އެއްވެސް މިންވަރަކަށް މީޑިޔާއެއްގައި ހަރަކާތްތެރިވެފައިވާ ފަރާތެއްކަން ކަށަވަރުވެފައެއް ނުވެއެވެ.

ގައިސްއަކީ އެމްޑީޕީގެ ޓިކެޓެއްގައި ގދ.އަތޮޅު ކައުންސިލްގައި އިންނެވި ބޭފުޅެކެވެ. އަދި ގައިސް ވަނީ މިއަހަރުގެ ރައްޔިތުންގެ މަޖިލީހުގެ އިންތިޚާބުގެ ތިނަދޫ އުތުރު ދާއިރާގެ ޕްރައިމަރީގައި ވާދަކުރައްވާ ނާކާމިޔާބު ވެވަޑައިގެންފައެވެ. މީގެ އިތުރުން އޭނާއަކީ އެފްއެސްއެމްގެ އެމްޑީ އަދި ކުރީގެ މެންބަރު އަހުމަދު ގަސަމްގެ ކޮއްކޯފުޅުވެސްމެއެވެ.

މި މަގާމަށް ގައިސް އައްޔަންކުރުމަށް އެމްޑީޕީން ނިންމުމާއި ގުޅިގެން ވަނީ ބޮޑެތި ފާޑުކިޔުންތަކެއް އަމާޒުވެފައެވެ.

ނިމިދިޔަ ސަރުކާރުގައި ބްރޯޑްކޮމްގައި ޕީޕީއެމްގެ އެކްޓިވިސްޓުން ތިއްބެވިކަަމަށްބުނެ، އެމްޑީޕީން ވަނީ އެ ކޮމިޝަންގެ ނަޒާހަތްތެރިކަމާއި މުސްތަގިއްލުކަމާއި މެދު ވަރަށް ބޮޑަށް ސުވާލު އުފައްދާފައެވެ.