އަހަރުގެ މިހާތަނަށް 875 މިލިއަން ރުފިޔާގެ މަސްތުވާތަކެއްޗާއި ބަނގުރާ ވަނީ އަތުލައިގެންފައި: ފުލުހުން

ފުލުހުން މިކަން ހާމަކުރީ، ޑްރަގް އެންފޯސްމަންޓުން ކުރަމުންދާ މަސައްކަތްތަކާއި ތަހުގީގުކުރަމުންދާ މައްސަލަތަކާ ގުޅޭގޮތުން މައުލޫމާތު ހިއްސާކުރުމަށް މިއަދު ބޭއްވި ނޫސްވެރިންގެ ބައްދަލުވުމުގައެވެ.

އިސްކަންދަރު ބިލްޑިންގގައި މިއަދު ބޭއްވި މި ބައްދަލުވުމުގައި ޑްރަގް އެންފޯސްމަންޓުގެ ފަރާތުން ނޫސްވެރިންނަށް މައުލޫމާތުދެއްވީ ސުޕްރިންޓެންޑެންޓް އޮފް ޕޮލިސް އަޙްމަދު މުސްލިމްއާއި، ޗީފް އިންސްޕެކްޓަރ އޮފް ޕޮލިސް އަޙްމަދު ނާއިފް އަދި ޗީފް އިންސްޕެކްޓަރ އޮފް ޕޮލިސް ފާތިޙް މުޙައްމަދުއެވެ.

މި ބައްދަލުވުމުގައި ވާހަކަދައްކަވަމުން އަޙްމަދު ނާއިފް ވިދާޅުވީ ފަހަކަށް އައިސް ސަރަހައްދީ ގައުމުތަކުގައި ދިވެހިން ގާއިމުވެ ތިބެގެން ރާއްޖެއަށް މަސްތުވާތަކެތި ފޮނުވުމުގެ މަސައްކަތް ކުރަމުންދާކަން ފާހަގަކުރެވިފައިވާކަމަށާ އެގޮތުން އެއަރކާގޯ އާއި ސީކާގޯ މެދުވެރިކޮށް އަދި އިލެކްޓްރިކް ސާމާނުތަކުގައި މަސްތުވާތަކެތި ފޮރުވައިގެން ފޮނުވަމުންދާކަމަށެވެ.

ނާއިފް ވިދާޅުވީ ދުނިޔޭގެ ކޮންމެ ސަރަޙައްދެއްގައި ދިވެހިން ޤާއިމްވެ ތިބެގެން ޖިނާޢީ ކުށް ކުރާ ފަރާތްތައް އިންޓަޕޯލް ރެޑް ނޯޓިސް ނެރެގެންވިޔަސް އެމީހުން ރާއްޖެ ގެނެސްގެން އެމީހުންގެ މައްޗަށް ތަޙްޤީގު ހިންގާނެކަމަށެވެ.

"އެކަން އެމަގުން އަޅުގަނޑުމެން ކުރިއަށް ގެންދާނަން. ޖިނާއީ މައްސަލަތަކުގައި އެހީތެރިކަން ބަދަލުކުރުމާއި ނުވަތަ އެހީތެރިކަން ހޯދުމާ ބެހޭ ޤާނޫނުގެ ތެރެއިން އަވައްޓެރި ޤައުމުތަކާއި ދުނިޔޭގެ އެކި ޤައުމުތަކާ އެއްކޮށް މިދަނީ ތަޙްޤީގު ތެރެއިން ފުޅާ މަސައްކަތްތަކެއް ކުރަމުން."ނާއިފް ވިދާޅުވިއެވެ.

ބައްދަލުވުމުގައި އަހަރުގެ މިހާތަނަށް ފުލުހުން ހިންގި އޮޕަރޭޝަންތަކުގެ ތަފްސީލް ވަނީ ހިއްސާކުރައްވާފައެވެ.

އެގޮތުން، މި އަހަރުގެ މިހާތަނަށް މުޅި ރާއްޖޭގައި މަސްތުވާތަކެއްޗާ ދެކޮޅަށް ހިންގުނު އޮޕަރޭޝަންތަކުގެ ތެރެއިން، 498.99 ކިލޯގްރާމުގެ މަސްތުވާތަކެތި ހިފަހައްޓާފައިވާއިރު، މި ތަކެތީގެ މަގުމަތީ އަގު 871.24 މިލިއަން ދިވެހި ރުފިޔާއަށް އަރާ ކަަމަށް ވިދާޅުވިއެވެ. މީގެ އިތުރުން، ބަނގުރަލާ ގުޅުންހުރި 182 މައްސަލަ ރިކޯޑުކުރެވިފައިވާއިރު، ހިފެހެއްޓުނު ގަވާއިދާ ހިލާފު ހުރިހާ މާއްދާއެއްގެ ޖުމުލަ މަގުމަތީ އަގު 875.23 މިލިއަން ދިވެހި ރުފިޔާއަށް އަރާކަމަށްވެސް ވިދާޅުވިއެވެ.

އަދި ރާއްޖޭގެ އެކި ހިސާބުތަކުގައި ޖުމުލަ 6,860 އޮޕަރޭޝަން މަސްތުވާތަކެއްޗާ ދެކޮޅަށް ހިންގާފައިވާއިރު މި މަސައްކަތްތަކުގެ ނަތީޖާއެއްގެ ގޮތުން 193 މީހުން ހައްޔަރުކުރެވި، މަސްތުވާތަކެތި ބޭނުންކުރާ 1،130 ތަން ބަންދުކުރެވިފައިވާ ކަމަށްވެސް ފުލުހުން ވިދާޅުވުއެވެ.

މީގެ އިތުރުން، މި މުއްދަތުގެ ތެރޭގައި، 16,024 މީހުން ބަލައިފާސްކޮށްފައިވާއިރު، 166 ތަން ބަލައިފާސްކޮށް، އުޅަނދުފަހަރާއި ބޯޓުފަހަރު ބަލައިފާސްކޮށްފައިވާ ކަމަށާ، އިންޓެލިޖެންސް މައުލޫމާތަށް ބިނާކޮށް ރާވާފައިވާ އޮޕަރޭޝަންތަކުގެ ތެރެއިން، 39 ރަށެއްގައި 500 އަށް ވުރެ ގިނަ ފުލުހުން ހަރަކާތްތެރިވެފައިވާކަންވެސް ފުލުހުން ހާމަކުރެއްވިއެވެ.