މަޖިލިހުގެ ރުހުން ނުލިބުނު ވަޒީރުންގެ ނަންތައް އަލުން މަޖިލީހަށް ނުފޮނުވޭނެ: އެމްޑީޕީ

ރައީސުލްޖުމުހުރިއްޔާ ޑރ.މުހައްމަދު މުއިއްޒުގެ ކެބިނެޓަށް ރުހުން ދިނުމަށް އިއްޔެ ބޭއްވުނު ރައްޔިތުންގެ މަޖިލިހުގެ ޖަލްސާއިން ރުހުން ނުލިބުނު ތިން ވަޒީރުން އަލުން އެ މަޤާމުތަކަށް އައްޔަންކޮށް އެބޭފުޅުންގެ ނަންތައް އަލުން މަޖިލިހަށް ނުފޮނުވޭނެކަމަށް އިދިކޮޅު އެންމެ ބޮޑު ޕާޓީ މޯލްޑިވިއަން ޑިމޮކްރެޓިކް ޕާޓީ ، އެމްޑީޕީން ބުނެފިއެވެ.

އެމްޑީޕީން މިފަދައިން ބުނެފައި ވަނީ އެޕާރޓީގެ ފަރާތުން ބޭއްވި ނޫސްވެރިންގެ ބައްދަލުވުމެގައެވެ. އެ ބައްދަލުވުމުގައި އެމްޑީޕީގެ ޕީޖީ ލީޑަރު، އަދި އަލިފުށި ދާއިރާގެ މެމްބަރު، މުހައްމަދު ރަޝީދު (ބިގޭ) ވިދާޅުވީ އިއްޔެ މަޖިލިހުން ރުހުން ނުލިބުނު ވަޒީރުން އަލުން އެމަޤާމުތަކަށް އައްޔަންކޮށް މަޖިލިހުގެ ރުހުން ހޯދަށް ފޮނުވަން އުޅެކަމުގެ މަޢުލޫމާތު ލިބިވަޑައިގެންފައިވާ ކަމަށެވެ.

އެމްޑީޕީގެ ޕީޖީ ގްރޫޕުން ވިޕެއް ނެރެ، އަދި  ދަ ޑިމޮކްރެޓްސްގެ ތާއީދާއި އެކު އިއްޔެ މަޖިލިހުގެ ރުހުން ނެތްކަމަށް ނިންމާފައި ވަނީ އިސްލާމިކް މިނިސްޓަރ ޑރ. މުހައްމަދު ޝަހީމް އަލީ ސައީދަށާއި، އެޓާނީ ޖެނަރަލް އަހުމަދު އުޝާމަށާއި ، އަދި ހައުސިން މިނިސްޓަރު ޑރ. އަލީ ހައިދަރަށެވެ.

މަޖިލިހުން މި ތިން ވަޒީރުންނަށް ރުހުން ނެތްކަމަށް ފާސްކުރިތާ މާ ގިނަ އިރުތަކެއް ނުވަނީސް ރައީސް ޑރ.މުހައްމަދު މުއިއްޒު ވަނީ ހަމަ އެ ބޭފުޅުން އެ މަގާމުތަކަށް އައްޔަން ކޮށްފައެވެ. އެބޭފުޅުންނަށް މަޤާމުގެ ހުވާލައި ދެއްވީ ސްޕްރިމް ކޯޓުގެ ފަނޑިޔާރު އަލްއުސްތާޛު ހުސްނުއްސުޢޫދެވެ.

މިއަދުގެ މި ނޫސްވެރިންގެ ބައްދަލުވުގައި އެމްޑީޕީގެ ޕީޖީ ލީޑަރ އިތުރަށް ވިދާޅުވީ މަޖިލިހުން ރުހުން ނެތްކަމަށް ފާސްކޮށްފައިވާ ވަޒީރުންތަކެއް އަލުން އެމަޤާމުތަކަށް އައްޔަންކޮށް މަޖިލިހުގެ ރުހުން ހޯދުމަށް ނުފޮނުވޭނެ ކަމަށް މަޖިލިހުގެ ކައުންސިލް ޖެނެރަލްވެސް ވިދާޅުވެފައިވާ ކަމަށެވެ.

"އެހެންކަމުން އަޅުގަނޑުމެން ގަބޫލެއް ނުކުރަން ޤާނޫނީ އިމުގެ ތެރެއިން ކުރައްވަމުން ގެންދަވާ ކަމެއްގެ ގޮތުގައެއް އަލުން އެ ނަންތައް ވަޒީރުކަން ދެއްވުމަށްފަހު މަޖިލީހަށް ފޮނުވުމަކީ "

އެމްޑީޕީގެ ޕީޖީ ލީޑަރ ވިދާޅުވިއެވެ.

މިއަދުގެ ބައްދަލުގައި އެމްޑީޕީ ޕީޖީ ލީޑަރ އިތުރަށް ވިދާޅުވީ އެ މައްސަލާގައި އެމްޑީޕީން ގޮތެއް ނިންމާނީ އެޕާރޓީގެ ޕީޖީ ގުރޫޕާއި މަޝްވަރާކުރުމަށް ފަހުގައި ކަމަށެވެ.

އެމްޑީޕީން މިގޮތަށް ބުނެފައިވާއިރު މަޖިލިހުން ރުހުން ނުދިން ތިން ވަޒީރަކު އަލުން އަބުރާ ހަމަ އެ ވުޒާރާތަކުގެ ވަޒީރުކަމުގެ މަޤާމަށް އައްޔަން ކުރުމުން ފުންނާބު އުސް ޤާނޫނީ ބޭފުޅުންވެސް ގެންދަވަނީ ތަފަތު ގޮތްގޮތަށް ވާހަކަ ދައްކަވަމުންނެވެ.