ސަރުކާރުގެ ޓެކްސީ ލައިންގެ ހިދުމަތް ފިތުރު އީދު ދުވަހު ފަށަނީ

ސަރުކާރުގެ ޓެކްސީ ލައިނެއްގެ ހިދުމަތް ކުރިއަށް އޮތް ފިތުރު އީދު ދުވަހު ފަށަން މަސައްކަތް ކުރަމުންދާ ކަމަށް ޓްރާސްޕޯޜް މިނިސްޓަރު މުހައްމަދު އަމީން މިއަދު ވިދާޅުވެއްޖެ އެވެ.

ރައީސުލްޖުމްހޫރިއްޔާގެ އޮފީހުގައި މިއަދު އޮތް ނޫސްވެރީންގެ ބައްދަލްވުމުގައި ވާހަކަދައްކަވަމުން މިނިސްޓަރު އަމީން ވަނީ ސަރުކާރުގެ ޓެކްސީ ލައިންގެ ހިދުމަތް ފެށުމަށް މިހާރު ކުރަމުންދާ މަސައްކަތުގެ އެންމެ ފަހުގެ ތަފްސީލު ހިއްސާކޮށްފަ އެވެ.

އަމީން ވިދާޅުވި ގޮތުގައި އަމާޒަކީ މި މަހުގެ 18 ވަނަ ދުވަހު ޓެކްސީ ލައިންގެ ހިދުމަތް ފެށުމެވެ. ނަމަވެސް އެ ދުވަހު ހިދުމަތް ފަށާނީ ލިމިޑެޓް ހިދުމަތްތަކަކާއެކު ކަމަށް ވިދާޅުވި އެވެ. އޭގެ ފަހުން ހިދުމަތް އިތުރަށް ފުޅާކޮށް ތަރައްގީ ކުރާނެ ކަމަށް ވިދާޅުވި އެވެ.

"އަޅުގަނޑުމެން މި ބަލަނީ މިހާރު މިއޮތް ތާވަލާއި އެއްގޮތަށް މިކަން ކުރެވޭތޯ," މިނިސްޓަރު ވިދާޅުވި އެވެ.

150 ކާރު, އެއްބެޗު 11 ގައި އަންނާނެ

މިނިސްޓަރު ވިދާޅުވި ގޮތުގައި ޓެކްސީ ލައިންގެ ހިދުމަތް ފެށުމަށް 150 ކާރު ރާއްޖެ ގެނައުމަށް ވަނީ ނިންމާފަ އެވެ. އެގޮތުން ކާރުތައް ގެންނާނީ ދެ ބުރެއްގެ މަތީން ކަމުގައި ވިދާޅުވި އެވެ.

އެގޮތުން ފުރަތަމަ ބެޗުގެ ކާރުތައް މިހާރު ރާއްޖެ ގެނައުމުގެ މަސައްކަތް ދަނީ ކުރަމުންނެވެ. ކާރުތައް މިއަދުގެ ވަގުތެއްގައި ލަންކާ ޕޯޓަށް ގެނެވޭނެ ކަމަށް އެމްޓީސީސީން ބުނެފައިވާ ކަމަށް އަމީން ވިދާޅުވި އެވެ. އަދި އެ ކާރުތައް މި މަހުގެ 11 ވަނަ ދުވަހު ރާއްޖެ ގެނެވޭނެ ކަމަށް ވިދާޅުވި އެވެ.

މީގެ އިތުރުން ދެވަނަ ބެޗުގެ ކާރުތައް ގެނެވޭނެ ތާރީހުތައް އަންނަ ހުކުރު ދުވަހު ޔަގީން ކުރެވޭނެ ކަމުގައި ވިދާޅުވި އެވެ.

އަމީން ވިދާޅުވި ގޮތުގައި ގެންނާނީ ތިން މޮޑެލްއެއްގެ ކާރުތަކެވެ. އޭގެ ތެރެއިން ދެ މޮޑެލެއް ހަދަނީ ޗައިނާގަ އެވެ. އަނެއް މޮޑެލް އެއީ ތައިލެންޑުންނެވެ.

ލަސްވީ ޓެކްސީތަކަށް ބަދަލުތަކެއް ގެންނަން ޖެހުމުން

މިނިސްޓަރު ވިދާޅުވި ގޮތުގައި ކުރީން ކަނޑައެޅި ތާރީހުތަކަށް ޓެކްސީ ލައިންގެ ހިދުމަތް ނުފެށުނީ ޓެކްސީތަކަށް ބަދަލުތަކެއް ގެންނަން ޖެހުމުންނެވެ.

އެ ބަދަލު ގެންނަން ޖެހުނީ ކާރުތަކަކީ މޫދާއި ވަރަށް ކައިރީގައި އޮޕަރޭޓްކުރަން ޖެހޭ ކާރުތަކަށް ވުމުން ގެންނަން ޖެހުނު ބަދަލުތަކެވެ. އެ ބަދަލުތައް ގެނެސް ކާރުތައް ގެނައުމުގެ މަަސައްކަތް ފެށިފައިވާތީ އިތުރު ލަސްވުމެއް ނެތި މިހާރު ކަނޑައަޅާފައިވާ ގޮތަށް ހިދުމަތް ފެށޭނެ ކަމުގެ އުންމީދު އެބަ އޮތް ކަމުގައި ވިދާޅުވި އެވެ.

ސަރުކާރުގެ ޓެކްސީ ލައިން ހިންގާނީ އެމްޓީސީސީންނެވެ. އެ ކުންފުނިން ވަނީ ޑްރައިވަރުން ހޯދާ ހިދުމަތް ފެށުމަށް ތައްޔާރުވެފަ އެވެ.