އިލެކްޝަން ކޮމިޝަނުގެ މެމްބަރުކަމަށް ކުރިމަތިލުމަށް ހުޅުވާލައިފި
ލިޔުންތެރިޔާ
އަބްދުﷲ ހުސައިން
ހުސްވެފައިވާ އިލެކްޝަން ކޮމިޝަނުގެ މެމްބަރުކަމަށް ކުރިމަތިލުމުގެ ފުރުސަތު ރައީސުލްޖުމްހޫރިއްޔާގެ އޮފީހުން މިއަދު ހުޅުވާލައިފިއެވެ.
އިލެކްޝަން ކޮމިޝަނުގެ މެމްބަރުކަމަށް ކުރިމަތިލުމަށް ހުޅުވާލާފައިވަނީ ކޮމިޝަނުގެ މެމްބަރުންގެ ގޮތުގައި ތިއްބެވި ދެ މެމްބަރަކު ވަކިކުރުމަށް ރައްޔިތުންގެ މަޖިލީހުން ފާސްކުރުމުންނެވެ. އެ ދެ މެމްބަރުންނަކީ ކޮމިޝަނުގެ ނައިބު ރައީސް ޢަލީ ނަޝާތާއި، ކޮމިޝަންގެ މެންބަރު މުޙައްމަދު އާސިފެވެ. އެ މެމްބަރުން މަގާމުން ވަކިކުރުމަށް މަޖިލީހުން ނިންމީ މަގާމުގެ ޒިއްމާތައް އަދާނުކުރާތީއެވެ.
އިލެކްޝަނުގެ މެމްބަރުކަމަށް ކުރިމަތިލުމަށް އެދޭ ފަރާތްތަކަށް އެފުރުސަތު ހުޅުވާލާފައިވަނީ އަންނަ ޑިސެމްބަރުމަހުގެ ފަސްވަނަ ދުވަހުގެ ނިޔަލަށެވެ.
އިލެކްޝަނަށް ދެ މެމްބަރުން ހޯދުމަށް އިއުލާނުކޮށްފައިވާއިރު، ކޮމިޝަނުގައި މިހާރު ތިއްބެވީ ދެ މެމްބަރުންނެވެ. ކޮމިޝަނުގެ ރައީސްއަކަށް ހުންނެވި ފުއާދު ތައުފީގުވެސް ދައުރުހަމަވުމުން މިހާރު އީސީގެ ރައީސްކަމުގެ މަގާމުވެސް ވަނީ ހުސްވެފައެވެ. އީސީއަށް ދެން މެމްބަރަކު އައްޔަނުކުރެވޭނީ ރައީސް ނަމެއް ފޮނުވުމުން މަޖިލީހުން އެ ނަން ފާސްކޮށްގެންނެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
