އެމް.އެން.ޔޫ.އެސް.ޔޫ ފުޓްސަލް ފިއެސްޓާގެ ކުއާޓާ ފައިނަލުގެ މެޗްތައް މިރޭ ފަށަނީ

މިހާރު ކުރިއަށްދާ ދިވެހި ޤައުމީ ޔުނިވަރސިޓީގެ އެމް.އެން.ޔޫ.އެސް.ޔޫ ފުޓްސަލް ފިއެސްޓާގެ ކުއާޓާ ފައިނަލުގެ މެޗްތައް މިރޭ ފަށާނެއެވެ.

ކުއާޓާފައިނަލުގެ ޓީމްތައް ކަށަވަރުވެފައިވާއިރު، މުބާރާތުގެ ކުއާޓާ ފައިނަލުގެ މެޗްތައް ކުރިއަށްދާނީ ހުޅުމާލޭ ރެހެނދި ފުޓްސަލް ދަނޑުގައެވެ. މުބާރާތުގެ ފިރިހެން ޑިވިޝަނުގެ ކުއާޓާ ފައިނަލަށް ދަތުރުކުރި ޓީމްތަކުގެ ތެރޭގައި ހިމެނެނީ، މޯލްޑިވްސް ބިޒްނަސް ސްކޫލް، އެމް.އެން.ޔޫ ބިޒްނަސް ސްކޫލް، އަހްމަދިއްޔާ އިންޓަރނޭޝަނަލް ސްކޫލް، ސެންޓަރ ފޯ ފައުންޑޭޝަން ސްޓަޑީޒް، ފެކަލްޓީ އޮފް އެޑިއުކޭޝަން، މިއާންޒް ކޮލެޖު، ޒިކުރާ ކޮލެޖްގެ އިތުރުން މެޕްސް ކޮލެޖެވެ.

މުބާރާތުގެ އަންހެން ޑިވިޝަނަށް ބަލާއިރު ކުއާޓާ ފައިނަލުގެ ޖާގަތައް ކަށަވަރުކޮށްފައިވަނީ، މޯލްޑިވްސް ބިޒްނަސް ސްކޫލް، އެމް.އެން.ޔޫ ބިޒްނަސް ސްކޫލް، ވިލާ ކޮލެޖް، ފެކަލްޓީ އޮފް ހޮސްޕިޓާލިޓީ އެންޑް ޓޫރިޒަމް ސްޓަޑީޒް، ފެކަލްޓީ އޮފް ހެލްތު ސައިންސަސް، ފެކަލްޓީ އޮފް ޝަރީއާ އެންޑް ލޯ، މިއާންޒް ކޮލެޖް، އަދި ސެންޓަރ ފޯ ފައުންޑޭޝަން ސްޓަޑީޒްއެވެ.

މިރޭ އެންމެ ފުރަތަމަ ކުޅުމަށް ތާވަލްކޮށްފައިވަނީ އަންހެން ޑިވިޝަނުގެ މެޗްތަކެވެ. އަންހެން ޑިވިޝަނުގެ މެޗްތައް ފެށުމަށް ހަމަޖެހިފައިވަނީ މިރޭ 20:00 އަދި 21:00 ޖަހާއިރުއެވެ.

މުބާރާތުގެ ފިރިހެން ޑިވިޝަނުގެ މެޗްތައް ފެށުމަށް ހަމަޖެހިފައިވަނީ، 22:00 އަދި 23:00 ގައެވެ.

އަންހެން އަދި ފިރިހެން ޑިވިޝަނަށް ހުޅުވާލައިގެން ކުރިއަށް ގެންދާ އެމް.އެން.ޔޫ.އެސް.ޔޫ ފުޓްސަލް ފިއެސްޓާ އަކީ ދިވެހިރާއްޖޭގެ މަތީ ސާނަވީ ދާއިރާގައި ބާއްވާ އެންމެ ބޮޑު ކުޅިވަރު ޙަރަކާތެވެ. މި އަހަރުގެ މުބާރާތުގައި ދެ ޑިވިޝަނުން ޖުމުލަ 31 ޓީމު ބައިވެރިވެފައިވެއެވެ.

މި އަހަރުގެ މުބަރާތުގެވެސް ޓައިޓަލް ސްޕޮންސާ އަކީ ދިރާގެވެ. އަދި ލައިފް ސްޓައިލް ޕާރޓްނަރެއްގެ ގޮތުގައި އީޒެޕް، އެސޯސިއޭޓް ޕާރޓްނަރަކަށް ގޯލްޑެން ފުޓްސަލް އެސޯސިއޭޝަން، މީޑިއާ ޕާރޓްނަރަކަށް ވޮއިސް، އަދި ސްޕޮންސަރެއްގެ ގޮތުގައި ތޫލް ވަނީ ހަމަޖެހިފައެވެ.

މި މުބާރާތް ރާވާ އިންތިޒާމު ކުރަނީ ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުންގެ ޔޫނިއަން (އެމް.އެން.ޔޫ.އެސް.ޔޫ) އިންނެވެ.