ހަތަރުހާސް ފްލެޓް މަޝްރޫއު: އިތުރަށް ޕޮއިންޓް ދީގެން 1000 މީހުން ލިސްޓަށް އަރުވާފައި އެބަތިބި

ކުރީގެ ރައީސް އިބްރާހިމް މުހައްމަދު ސޯލިހްގެ ސަރުކާރުން ހިންގި ބޯހިޔާވަހިކަމުގެ ސްކީމްގެ ދަށުން އިމާރާތް ކޮށްފައިވާ 4000 ފްލެޓް ލިބޭނެ ކަމަށް ކަނޑައަޅާ އެ ސަރުކާރުން އާންމުކުރި ލިސްޓްގައި އިތުރަށް ޕޮއިންޓް ދީގެން 1000 މީހުން ހިމަނާފައިވާ ކަމަށް ހައުސިން މިނިސްޓަރު އަބްދުﷲ މުއްތަލިބު މިރޭ ވިދާޅުވެއްޖެ އެވެ.

ރައީސް އޮފީހާއި ދައުލަތުގެ މީޑިއާ ގުޅިގެން ކުރިއަށް ގެންދާ "އަހާ" ފޯރަމްގައި މިރޭ ވާހަކަ ދައްކަވަމުން މުއްތަލިބު ވިދާޅުވީ ކުރީ ސަރުކާރުން ހަދާފައިވާ ލިސްޓަށް ފްލެޓް ދޭން ނިންމީ އެ ލިސްޓް ރަނގަޅު ވެގެން ނޫން ކަަމަށެވެ. ލިސްޓްގައި ގިނަ މައްސަލަތަކެއް ހިމެނޭ ކަމަށް ތަކުރާރު ކުރައްވާ ވިދާޅުވި އެވެ.

ނަމަވެސް މުޅި ލިސްޓް ބާތިލުނުކުރީ އެކަމުން އެތައް ބައެއްގެ ހައްގުތައް ގެއްލި ބޯހިޔާވަހިކަމެއް ނެތް އެތައް ބަޔަކަށް ލިބުނު އުންމީދު ގެއްލުމުގެ ފުރުސަތު އޮތުމުންނެވެ. މިނިސްޓަރު ވިދާޅުވީ އިތުރަށް ޕޮއިންޓް ދީގެން 1000 މީހުން ލިސްޓަށް އަރުވާފައި އެބަތިބި ކަމަށެވެ.

ނަމަވެސް އެ މީހުންނަކީ އެއްވެސް ބޯހިޔާވަހިކަމެއް ނެތް ބައެއްނަމަ އަތުލުމުގެ ވިސްނުމެއް ސަރުކާރުގެ ނެތް ކަމަށެވެ. ހިޔާ މަޝްރޫއުން ފްލެޓް ލިބުނު މީހުންނާއި ގޯތި ލިބުނު މީހުންނާއި މާލޭގައި ގެދޮރު ހުރި މީހުން ވެސް ލިސްޓްގައި ހިމެނޭ ކަމަށް ވިދާޅުވި އެވެ.

އެހެން ކަމުން ލިސްޓުން އުނިވާނީ އެއްގޮތަކަށް ވެސް މި މަޝްރޫއުއަށް ޝަރުތު ހަމަނުވާ މީހުން އެކަނި ކަމަށް މިނިސްޓަރު ވިދާޅުވި އެވެ.