ސިޔާސީ މަގާމުތަކުގެ އަދަދު ވަކި މިންވަރަކަށް ހިފަހެއްޓުމަށް ގާނުނަށް އިސްލާހު ހުށަހަނީ

ސިޔާސީ މަގާމްތައް ވަކި މިންވަރަކަށް ހިފެހެއްޓުމަށް ގާނޫނު އަސާސީ އާއި ގާނޫނުތައް އިސްލާހު ކުރުމަށް ޑިމޮކްރެޓްސް އާއި އިދިކޮޅު މައި ޕާޓީ، އެމްޑީޕީން އެއްބަސްވެއްޖެއެވެ.

މިހަފްތާ ތެރޭގައި އެމްޑީޕީއާއި ޑިމޮކްރެޓްސްގެ އިސް ބައެއް ފަރާތްތަކުން އެކުގައި ބޭއްވި މަޝްވަރާ ބައްދަލުވުމުގައި އެ ދެޕާޓީން އެއްބަސްވި ކަންކަމާއި ގުޅޭގޮތުން މަޢުލޫމާތު ހިއްސާ ކުރުމަށް މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެމްޑީޕީގެ ޗެއާރޕާސަން ފައްޔާޒު އިސްމާއީލް ވިދާޅުވީ، ސަރުކާރު ޖަވާބުދާރީ ކުރުވުމަށް، ރައްޔިތުންގެ މަޖިލީހުގެ ތެރެއިން ދެ ޕާޓީ އެކުމަށް މަސައްކަތް ކުރުމަށް ނިންމާފައިވާ ކަމަށެވެ.

"މި ސަރުކާރު ހަންމަތަ ކުރުމާއި، ޖަވާބުދާރީ ކުރުވުމާއި، މިގައުމުގެ ޑިމޮކްރެޓިކް މުސްތަގުބަލު ރަނގަޅު ކުރުމަށް ބޭނުންވާ ގާނޫނީ ބަދަލުތައް މަޖިލިސްގެ ތެރެއިން ގެނައުމަށް، މަޖިލިސްގެ ތެރޭގައި އަޅުގަނޑުމެން އެއްކޮށް މަސައްކަތް ކުރުމަށް (ނިންމީ)." ފައްޔާޒު ވިދާޅުވި އެވެ.

އެކަމުގެ ތަފްސީލް ދެއްވަމުން، ހެންވޭރު ހުޅަނގު ދާއިރާގެ މެންބަރު އަދި ޑިމޮކްރެޓްސް ގެ ރައީސް ހަސަން ލަތީފް ވިދާޅުވީ، ގާނޫނު އަސާސީއަށް މުހިންމު ބަދަލުތަކެއް ގެންނަންޖެހޭ ކަމަށް، އެ ދެޕާޓީއަށްވެސް ފެންނަ ކަމަށެވެ.

އެގޮތުން، އެއްވެސް ހިފެހެއްޓުމެއްނެތި ސަރުކާރުގެ ސިޔާސީ މަގާމުތަކަށް މީހުން އައްޔަނު ކުރަމުންދާ މައްސަލަ ހައްލުކޮށް، ސިޔާސީ މަގާމްތަކުގެ އަދަދު ވަކި މިންވަރަކަށް ހިފެހެއްޓުމަށް ގާނޫނު އަސާސީ އާއި ގާނޫނަށް ބަދަލު ގެނައުމަށް ދެޕާޓީންވެސް އެއްބަސްވެފައިވާ ކަމަށް ހަސަން ވިދާޅުވި އެވެ.

އަޅުގަނޑުމެންނަށް ފެނިގެން އެބަދޭ، ސިޔާސީ މަގާމްތަކަށް ރައީސުލްޖުމުހޫރިއްޔާ އައްޔަނުކުރައްވާ ބޭފުޅުންގެ އަދަަދު އިންތިހާއަށް ގިނަ ވެގެން އެބަދޭ. ޚާއްސަކޮށް ސްޓޭޓް މިނިސްޓަރުންނާއި، ޑެޕިއުޓީ މިނިސްޓަރުންނާއި، އަދި އެ ފެންވަރުގެ ބޭފުޅުންގެ ނަމުގައި އިތުރު ކުރައްވަމުން އެ ގެންދަވާ އަދަަދު ތަކަކީ ރާއްޖޭގެ އިގްތިސާދަށް ބަލާއިރު އެއީކީ، ވަރަށް ބޮޑު މައްސަލައެއް. އެހެންވީމާ އެއީވެސް އަޅުގަނޑުމެން ގާނޫނު އަސާސީއަށް ގެންނަ ބަދަލަކާއި، އަދި ގާނޫނަތަކަށް ގެންނަންޖެހޭ ބަދަލެއް އޮތް ކަމަށް ވަންޏާ، އެ ބަދަލެއް ގެނެސްގެންވެސް، އެއީ ވަކި މިންވަރެއްގައި ހިފެހެއްޓިފައި އޮންނާނެ އަދަދަކަށް ކަނޑަޅަން އަޅުގަނޑުމެން ދެޕާޓީއަށްވެސް އެއްބަސްވެވޭތީ، އެ ބަދަލު އަޅުގަނޑުމެން، ގާނޫނު އަސާސީއަށްވެސް، އަދި ގާނޫނަކަށް ގެންނަންޖެހޭ ބަދަލެއް އޮތް ކަމަށް ވަންޏާ، ގާނޫނަށްވެސް އަޅުގަނޑުމެން އެ ބަދަލެއް ގެންނަން

ހަސަން ލަތީފް

ސިޔާސީ މަގާމްތައް ވަކި މިންވަރަކަށް ކަނޑައަޅަން އިދިކޮޅު އެމްޑީޕީއާއި ޑިމޮކްރެޓްސް އިން އެއްބަސްވެފައި ވާއިރު, ރައީސުލްޖުމުހޫރިއްޔާ ޑރ މުހައްމަދު މުޢިއްޒު ގެ މިސަރުކާރުން ސިޔާސީ މަގާމްތައް 700 އަށްވުރެ އިތުރު ނުކުރައްވާނެ ކަމަށް އެމަނިކުފާނު ވަނީ ވިދާޅުވެފަ އެވެ.

ކުރީގެ ރައީސް އިބްރާޙިމް މުހައްމަދު ސޯލިހުގެ ސަރުކާރުން ހުށަހެޅި އެންމެ ފަހުގެ ބަޖެޓުގައިވާ ގޮތުން، އެ ސަރުކާރުގައި 1،063 ސިޔާސީ މުވައްޒަފުން ތިއްބެވެ. އޭގެ ކުރީގެ ރައީސް ޔާމީންގެ ސަރުކާރުގައި ތިބީ 808 ސިޔާސީ މުވައްޒަފުންނެވެ.