މުޒާހަރާތަކާ ގުޅިގެން ރާއި ފުލުހަށް ހާޒިރުކުރަނީ، ގިނަ ތުހުމަތުތަކެއް

ވެރިރަށް -- މާލެ ސިޓީގައި މިހާރު ކޮންމެ ރެއަކު އިދިކޮޅު އެމްޑީޕީން ކުރިއަށް ގެންދާ ސިލްސިލާ މުޒާހަރާތަކާއި ގުޅިގެން މަކުނުދޫ ދާއިރާގެ ކުރީގެ މެންބަރު މުހައްމަދު ރާއީ ފުލުހަށް ހާޒިރު ވާން އަންގައިފި އެވެ.

ރާއިއަށް މިހާރު ވަނީ ފުލުހަށް ހާޒިރުވުމުގެ ޗިޓް ހަވާލުކޮށްފަ އެވެ. ވޮއިސްއަށް ވެސް އެ ޗިޓް ލިބިފައިވެ އެވެ.

ރާއި ހާޒިރު ކުރަނީ މާދަމާ 1:00 އަށެވެ. ހާޒިރުވާން ޖެހެނީ ގަލޮޅު ޕޮލިސް ސްޓޭޝަނަަށެވެ.

ފުލުހަށް ހާޒިރު ކުރަނީ ކުށެއްގެ ތުހުމަތުގައި ކަމަށް ވެސް ލިޔެފައިވެ އެވެ. ކުރެވޭ ތުހުމަތަކީ މާޗް މަހުގެ ނުވަވަނަ ދުވަހުގެ ރޭގެ ވަގުތެއްގައި ސުލްހަވެރިކަމާއެކު އެއްވެ އުޅުމުގެ މިނިވަންކަމުގެ ގާނޫނާއި ހިލާފަށް މާލޭގެ އެކި ސަރަހައްދުގެ މަގުތަކަށް އެއްވެ އަޑުގަދަކޮށް މުޒާހަރާކޮށް އާންމުދަތުރުފަތުރު ކުރުމާއި އާންމު ވިޔަފާރިތަކަށް ދަތިވާނެހެން ހަަރަކާތްތެރިވެ ފުލުހުންގެ ދައުރު އަދާކުރުމަށް ހުރަސްއަޅާ ފުލުހުންގެ އަމުރަށް ނުކިޔަމަންތެރިވެ ފުލުހުންގެ ވާޖިބަށް ހުރަސް އެޅުމެވެ.

އެމްޑީޕީން މި ރޯދަ މަހު މުޒާހަރާ ކުރަން ފެށީ "ކުލި އެއްވުން" ތަކުގެ ނަމުގަ އެވެ. މިހާރު ކޮންމެ ރެއަކު މުޒާހަރާ ކުރެ އެވެ. މުޒާހަރާ ލީޑްކުރުމުގައި ރާއި ވަރަށް އިސްކޮށް ހުރެ އެވެ.