ވެންޓިލޭޓަރު މައްސަލާގައި ދުބާއީ ކުންފުނީގެ ވެރިޔާ ހޯދަން ރެޑް ނޯޓިސް!

ކޮވިޑް ބަލިމަޑުކަމުގެ ތެރޭގައި ވެންޓިލޭޓަރު ގަތުމުގެ ނަމުގައި ހިންގި ކޮރަޕްޝަނުގެ މައްސަލާގައި ހިމެނޭ ދުބާއީ ކުންފުނީގެ ވެރިޔާ ހޯދުމަށް އެންމެފަހުން ރެޑް ނޯޓިން ނެރުމަށް އެދިއްޖެއެވެ.

ރައްޔިތުންގެ މަޖިލީހުގެ މާލިއްޔަތު ކޮމިޓީގައި މިއަދު މަޖިލީހުގެ ނައިބު ރައީސް އަހުމަދު ނާޒިމް ވަނީ ވެންޓިލޭޓަރުގެ މައްސަލަ މިހާރު ގޮސްފައިވާ ހިސާބާއި މިހާތަނަށް ކަންކަން ހިނގާދިޔަގޮތް ވަރަށް ތަފްސީލްކޮށް ވިދާޅުވެދެއްވާފައެވެ. ނާޒިމް ވިދާޅުވީ، ވެންޓިލޭޓަރުގެ ހިޔާނާތުގެ މައްސަލަ މިހާ ދިގުލައިގެންދިޔައިރު، އެ މައްސަލާގައި ހިމެނޭ މީހުންނާ ދެކޮޅަށް އެންޓި ކޮރަޕްޝަން ކޮމިޝަނުން ދައުވާ އުފުލާފައި ނުވާކަމަށެވެ. ނާޒިމް ވިދާޅުވީ ވެންޓިލޭޓަރު މައްސަލާ އާބިޓްރޭޝަނަށްގޮސް މިހާތަަށް ކުރެވުނު މަސައްކަތުން ވެންޓިލެޓަރު ގަތުމަށް ހަވާލުކުރި ދުބާއީގެ އެގްޒެކިއުޓާސް ޖެނެރަލް ޓްރޭޑިން ކުންފުނީގެ ވެރިމީހާވެސް ހޯދިފައިނުވާކަމަށެވެ.

ދެން އޮތްގޮތަކީ ޖިނާއީ މައްސަލައެއްގެ ގޮތުގައި އެކަން ބެލުމަށް ނިންމައި އެނާ ހޯދަން ރެޑްނޯޓިސް ނެރުންކަމަށާއި، އެ ހިސާބުން އޭނާ އަތުވެދާނޭ ކަމަށް ނާޒިމް ވަނީ ފާހަގަކުރައްވާފައެވެ. މައުލޫމާތު ލިބިފައިވާ ވެންޓިލޭޓަރު ހޯދުމަށް ހަވާލުކުރި ކުންފުނީގެ ވެރިޔާ ހޯދުމަށް ރެޑް ނޯޓިސް ނެރުމަށް ފުލުހުން ދަނީ ޕްރޮސެކިއުޓަރ ޖެނެރަލްއާއެކު މަޝްވަރާކުރަމުންނެވެ.

ވެންޓިލޭޓަރު މައްސަލާގައި، އާބިޓްރޭޝަނުން ވަނީ ވެންޓިލޭޓަރުގަތުމަށް ދިވެހި ސަރުކާރުން ކުރި ހަރަދާއި، އަދި މައްސަލާގައި ދިވެހި ސަރުކާރުން ކުރި ހޭދައިގެ ބަދަލުގެ ގޮތުގައި ދުބާއީގެ އެގްޒެކިއުޓާސް ޖެނެރަލް ޓްރޭޑިންގެ މައްޗަށް 34.5 މިލިއަން ރުފިޔާ ދައްކަން އަންގާފައެވެ. ނަމަވެސް މިހާތަނަށް އާއިރު، ދުބާއީގެ އެކުންފުނިން ދިވެހި ސަރުކާރަށް އެއްވެސް ފައިސާއެއް ދައްކާފައި ނުވާކަން ފާހަގަކޮށްލެވެއެވެ.

ކޯވިޑްގެ ހާލަތު ރާއްޖެއާއި ބައްދަލުކުރުމާއި ގުޅިގެން ރާއްޖޭގެ އާބާދީއަށް ބަލައި ހާލަތަށް ބޭނުންވާ 145 ވެންޓިލޭޓަރު ގަތުމުގެ މަސައްކަތް ފެށިއެވެ. އެގޮތުން ވެންޓިލޭޓަރުތައް ހޯދުމަށް ޖުމްލަ ތިން ކުންފުންޏަކާއެކު ސަރުކާރުން އެއްބަސްވުންތައް ހެދިއިރު، ދުބާއީގެ އެ ކުންފުންޏާއެކު ހެދި އެއްބަސްވުމުގެ ދަށުން އެޑްވާންސްގެ ގޮތުގައި ވެންޓިލޭޓަރުތައް ގަތުމުގެ އަގުގެ 90 އިންސައްތައަށް ވާ 30.4 މިލިއަން ރުފިޔާވެސް ދައްކާފައިވާކަން އޮޑިޓް ރިޕޯޓުން ވަނީ ހާމަވެފައެވެ.