އާންމުންގެ ތެރޭގައި ފަތުރުވެރިން ބިކިނީގައި އުޅުމަށް ހުއްދަ ނުދެން- އަލީ ވަހީދު

މީހުން ދިރިއުޅޭ ރަށްރަށުގައި އާންމުންގެ ތެރޭ ބިކިނީގައި ޓުއަރިސްޓުންނަށް އުޅެން ފުރުސަތުދެ ގެސްޓް ހައުސްތަކާއި މެދު ފިޔަވަޅުއަޅާނެ ކަމަށް ޓުއަރިޒަމް މިނިސްޓަރ އަލީ ވަހީދު ވިދާޅުވެއްޖެއެވެ.

ޓުއަރިޒަމް މިނިސްޓްރީގައި މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން މިނިސްޓަރ އަލީ ވަހީދު ވިދާޅުވީ ގަވާއިދު ހަދާފައި އޮތީ ބިކިނީލައިގެން މީހުން ދިރިއުޅޭ ރަށްރަށުގައި އާންމުންގެ ތެރޭގައި އުޅެވޭ ގޮތަށް ނޫންކަމަށެވެ. ގަވާއިދާއި ގާނޫނު ތަކުގައި ގެސްޓުން ހެދުން އަޅާނެ ގޮތްތައް ބުނެދީފައިވާއިރު ގަވާއިދާ ޚިލާފު މަންޒަރުތައް ފެންނަމުންދާތީ ހިތާމަ ކުރާކަމަށް އޭނާ ވިދާޅުވިއެވެ.

ބައެއް ގެސްޓުހައުސް ތަކުން ފަތުރުވެރިންނަށް އެންމެ އެކަށީގެންވާ މައުލޫމާތުތައް ފޯރުކޮށް ނުދޭ ކަމަށާއި، އެފަދައިން މައުލޫމާތު ފޯރުކޮށް ނުދޭނަމަ އެ ގެސްޓުހައުސްތަކާއި މެދު ފިޔަވަޅު އަޅާނެ ކަމަށްވެސް މިނިސްޓަރ ވިދާޅުވެފައިވެއެވެ.

އަލީ ވަހީދު އިތުރަށް ވިދާޅުވެފައިވަނީ ގެސްޓުން ބިކިނީގައި އާންމުންގެ ތެރޭގައި އުޅޭއިރު އެރަށްރަށުގައި ކުޑަކުދިންވެސް އުޅޭކަމަށާއި، ދިވެހިންގެ ސަގާފަތާއި އިސްލާމީ އާދަކާދައިގެ ތެރެއަށް އެފަދަ ކަންކަން ވަދެގެން ނުވާނެކަމަށްވެސް އެބޭފުޅާ ވިދާޅުވިއެވެ. އަދި ކަނޑައަޅާފައިވާ ގަވާއިދުތަކާއި ޚިލާފަށް އަމަލު ކުރާ މީހުންނާއި މެދު ފިޔަވަޅު އަޅާނެ ކަމަށްވެސް އަލީ ވަހީދު ވިދާޅުވެފައިވެއެވެ.

ރާއްޖޭގެ ގިނަ ރަށްތަކުގައި ގެސްޓްހައުސް ވިޔަފާރި ކުރަމުން އަންނަ އިރު، ބައެއް ރަށްތަކުގައި ބިކިނީގައި ޓުއަރިސްޓުން އުޅޭ މައްސަލަ ގިނަ ބަޔަކު އަންނަނީ ފާހަގަކުރަމުންނެވެ. އަދި ބައެއް ރަށްތަކުގައި ހުއްދަ ނުނަގާ ގެސްޓް ހައުސްތައް ހިންގާކަމަށްވެސް ބައެއް ފަރާތްތަކުން އަންނަނީ ތުހުމަތު ކުރަމުންނެވެ.

ރާއްޖޭގައި ފަތުރުވެރިކަން ފުޅާ ދާއިރާއެއްގައި ކުރަމުން އަންނަ އިރު ސަރުކާރުން އަންނަނީ ފަތުރުވެރިންނަށްވެސް ރައްކާތެރި މާހައުލަކަށް ރާއްޖެ ހެދުމަށް ގިނަ މަސައްކަތްތަކެއް ކުރަމުން ކަން ފާހަގަކޮށްލެވެއެވެ.