އެސްޓީއޯއިން ބާޒާރަށް ލޮނުމެދު ނެރުމާއެކު، އަގުތަށް ދަށަށް!

ބާޒާރުގައި ލޮނުމެދުގެ އަގު ރެކޯޑް މިންވަރަކަށް އުފުލިފައިވަނިކޮށް އެސްޓީއޯއިން ބާޒާރަށް ލޮނުމެދު ނެރެ އުފުލެމުންދިޔަ ލޮނުމެދުގެ އަގުތައް ތިރިކޮށްލައިފިއެވެ.

މާލޭ ބާޒާރުގައި މިއަދު ލޮނުމެދު ކިލޯއެއްގެ އަގު ވަނީ 100 ރުފިޔާއަށް އަރާފައެވެ. ބައެއް ފިހާރަތަކުން މިއަދު ލޮނުމެދު ނުވެސް ލިބެއެވެ. ބާޒާރުން ލޮނުމެދު ލިބުން ދަތިވުމާ ގުޅިގެން އެސްޓިއޯއިން ވަނީ ބާޒާރަށް ލޮނުމެދު ނެރެފައެވެ. އެސްޓީއޯއިން ލޮނުމެދު ވިއްކީ ކިލޯއެއް 45 ރުފިޔާއަށެވެ. އެސްޓީއޯ ޕީޕަލްސް ޗޮއިސްއިން ލޮނުމެދު ވިއްކަން ފެށުމާއެކު އޭގެ އަގުތައް ވަނީ ދަށަށްދާން ފަށާފައެވެ.

ލޮނުމެދުގެ އިތުރުން އެސްޓީއޯއިން ވަނީ އެކުންފުނިން ބާޒާރަށް ނެރެމުންދިޔަ ފިޔާ، ބިސް އަދި އަލުވީގެ އަގުތަކަށް ހެޔޮ ބަދަލެއް ގެނެސްފައެވެ.

އެސްޓީއޯއިން މިއަދު ތަކެތީގެ އަގުތަކަށް ގެނައި ބަދަލު:

- ފިޔާ: ބަސްތާއެއް 335 ރުފިޔާ، ވަކިން ކިލޯއެއް 14 ރުފިޔާ

- ބިސް: ކޭހެއް 350 އަށް، ވަކިން 2 ރުފިޔާ

- އަލުވި: ބަސްތާއެއް 515 ރުފިޔާއަށް، ކިލޯއެއް 25 ރިފިޔާއަށް

މިއީ އެސްޓީއޯއިން ރަމަޟާން މަހަށްވާ ހާއްސަ ކޮއްގެން ފިޔާ، ބިސް، އަދި އަލުވި ބާޒާރަށް ނެރެންފެށިފަހުން ބާޒާރުގެ އަގުތަކަށް ބަދަލުގެނައި 4 ވަނަ ފަހަރުކަމަށް އެކުންފުނިން ބުނެއެވެ.

ރަމަޟާން މަހަށް ޚާއްޞަކޮށް އެސްޓީއޯއިން އެތެރެކުރާ މައިގަނޑު ތަކެތީގެ ތެރޭގައި ފިޔާ، ބިސް އަދި އަލުވި ހިމެނެއެވެ. އެސްޓީއޯއިން ބުނީ، މި ތަކެތި އެތެރެ ކުރުމުގެ މައިގަނޑު ބޭނުމަކީ ރޯދަމަހު މި ތަކެތީގެ އަގު އެކަށީގެންވާ މިންވަރެއްގައި ހިފެހެއްޓުން ކަމަށެވެ.

އެސްޓީއޯއިން ތަކެތީގެ އަގުތައް ކަނޑައަޅަނީ ބާޒާރުގެ އަގުތަކަށް ބެލުމަށްފަހުއެވެ. ރަމަޟާން މަހަކީ ކާބޯތަކެއްޗަށް ޑިމާންޑް އިތުރުވާ މޫސުމަކަށްވާތީ، ރައްޔިތުން އެންމެ އާއްމުކޮށް ބޭނުންކުރާ ކާބޯތަކެތީގެ އަސާސީ ތަކެތި އެކަށޭނަ އަގެއްގައި ރައްޔިތުންނަށް ފޯރުކޮށްދިނުމަކީ އެސްޓީއޯއިން އެންމެ އިސްކަންދޭ އެއް ކަންތަކެވެ.