ދީނަށް ފުރައްސާރަކުރާ މީހަކު ކެންޑިޑޭޓުންނަށް ތާއީދުކޮށް ވާހަކަދެއްކުމަކީ ޕާޓީއާ ގުޅުމެއް އޮތްކަމެއް ނޫން: ޕީއެންސީ

އިސްލާމްދީނަށް ފުރައްސާރަ ކުރުމުގެ ތުހުމަތުގައި ފުލުހުން ހޯދަމުންދާ އަހުމަދު ޢާމިރު، ވެރިކަންކުރާ ޕީއެންސީގެ ކެންޑިޑޭޓުންނަށް ތާއީދުކޮށް ވާހަކަ ދެއްކުމަކީ އެޕާޓީއާ އެއްވެސް ރަސްމީ ގުޅުމެއް އޮތް ކަމެއް ނޫން ކަމަށް އެ ޕާޓީން ބުނެފިއެވެ.

ސޯޝަލްމީޑިއާގައި ދީނަށް ފުރައްސާރަކޮށް، ދިވެހި ރައްޔިތުންގެ ދީނީ އެއްބައިވަންތަކަމަށް ބުރޫއަރާފަދަ ވާހަކަ ދެއްކުމާއި އިސްލާމީ ކަންތައްތަކާ ބެހޭ ވުޒާރާ ނައްތާލުމަށް ގޮވާލައި ވާހަކަ ދައްކާފައިވާ މައްސަލައާ ގުޅިގެން ފުލުހުން ތަހުގީގު ކުރަމުންދާ މައްސަލައެއްގެ ތަހުގީގަށް އާމިރު ހޯދަން އިއުލާން ކޮށްފައިވަނީ ފެބްރުއަރީ މަހުގެ 24 ވަނަ ދުވަހުއެވެ.

އޭގެ ފަހުން އޭނާ މީސް މީޑިއާގައި އާއްމު ކުރަމުންދާ ބައެއް ވީޑިއޯ ތަކުގައި ޕީއެންސީ ކެންޑިޑޭޓުންނަށް ތާއީދު ހޯދުމަށް ވާހަކަތައް ދައްކާފައިވެއެވެ.

ޚާއްޞަކޮށް ޕީއެންސީގެ ޓިކެޓުގައި މާލޭގެ މޭޔަރުކަމަށް ވާދަކުރައްވާ ކެންޑިޑޭޓް މޫސާ ޖަލީލަށް ތާއީދުކުރާ ކަމަށްބުނެ އޭނާ އަންނަނީ ވީޑިއޯތައް ހަދަމުންނެވެ.

އެކަމާގުޅިގެން ޕީއެންސީން މީސްމީޑިއާގައި ކުރި ޕޯސްޓެއްގައި ބުނީ، އިސްލާމްދީނަށް ފުރައްސާރަ ކުރުމުގެ ތުހުމަތުގައި ފުލުހުން ހޯދަމުންދާ މީހަކު، ޕީއެންސީގެ ކެންޑިޑޭޓުންނަށް ތާއީދުކޮށް މީސް މީޑިއާގައި ވާހަކަދައްކާފައިވުމަކީ، އެ ޕާޓީއާ އެއްވެސް ރަސްމީ ގުޅުމެއް އޮތް ކަމެއް ނޫންކަމަށެވެ.

އަދި އެކަން ކުރަނީ ޕާޓީގެ ހުއްދަވެސް ނެތި ކަމަށް އެ ޕާޓީން ބުނެއެވެ.

”އިސްލާމްދީނަށް ފުރައްސާރަކުރުން ފަދަ އަމަލުތައް ޕީއެންސީން އެންމެ ހަރުކަށި އިބާރާތުން ކުށްވެރިކުރާމެވެ.“ ޕީއެންސީން ބުނެފައިވެއެވެ.