ރޮބޯމޭންގެ ފަހުދެ ޝޯ، މާދަމާ އާއި އޭގެ އަނެއްދުވަހު

އޮލިމްޕަހުގައި މިހާރު ދައްކަމުންދާ މަޝްހޫރު ކެރެކްޓަރ "ރޮބޯމޭން" ގެ އެންމެ ފަހު ދެ ޝޯ، މާދަމާ އާއި އޭގެ އަނެއްދުވަހު ދެއްކުމަށް ނިންމައިފިއެވެ.

ރޮބޯމޭން ޓީމުން ބުނީ، ފިލްމުގެ އެންމެ ފަހު ދެ ޝޯ ދެއްކުމަށް ނިންމާފައިވަނީ އޮކްޓޯބަރުމަހުގެ 4 އަދި 5 ވަނަ ދުވަހު ކަމަށެވެ. މި ދެ ޝޯގެ ޓިކެޓް މިހާރު އޮލިމްޕަހުގެ ޓިކެޓް ކައުންޓަރުން ލިބެން ހުންނާނެއެވެ. ރޮބޯމޭން ފިލްމަށް ބެލުންތެރިންގެ ފަރާތުން ވަރަށްބޮޑު ތަރުހީބެއް މިހާތަނަށް ލިބިފައިވާކަމަށް ރޮބޯމޭން ޓީމުން ބުނެއެވެ.

"ރޮބޯމޭން – ދަ މޫވީ" ވެގެންދާނީ މިހާތަނަށް އެންމެގިނަ ކުޑަކުދިންގެ ބައިވެރިވުމާއެކު ހެދި ފިލްމަށެވެ. މި ފިލްމު ގެނެސްދީފައިވަނީ "ދަ ރޮބޯ ޖޫނިއާ ޗެލެންޖު" ކުޑަކުދިންގެ ޑާންސް މުބާރާތެއްގެ ތެރެއިން ކުރިމަތިވާ އެކި ކަހަލަ ކަންތައްތަކެވެ.

ދިވެހި ސިނަމާއަށް އަންނަން ހުރި ފިލްމުތަކުގެ ތެރެއިން ބެލުންތެރިން އިންތިޒާރުކުރި ރޮބޯމޭން އޮލިމްޕަހުގައި ޕްރިމިއާ ކޮށްފައިވަނީ، މިދިޔަ ސެޕްޓެމްބަރުމަހުގެ 26 ވަނަ ދުވަހުއެވެ. ބެލުންތެރިގެ ފަރާތުން ފިލްމަށް ލިބުނު ތަރުހީބާއެކު އެންމެފަހުން އެދުވަސް ކުރިއަށްގެންގޮސްފައިވަނީ ޕްރިމިއާ ޑޭގެ ގޮތުގައެވެ.

ސްކޫލްތަކުގެ މިޑްޓާމް ބަންދާ ދިމާކޮށް މިދިޔަ މަހުގެ 26 ވަނަ ދުވަހުން ފެށިގެން ކޮންމެ ދުވަހުގެ 14:00 އަދި 16:00 ގައި އޮލިމްޕަހުގައި ރޮބޯމޭން ދައްކަމުން އައިސްފައިވާއިރު، މި ފިލްމަށް ވަނީ ބޮޑު ތަރުހީބެއް ލިބިގެންގޮސްފައެވެ.

ރޮބޯމޭން – ދަ މޫވީ" މި ފިލްމު ވެގެންގޮސްފައިވަނީ އާއިލާގެ އެންމެން އެއްތަނަކު ތިބެގެން ބަލާލެވޭ ފަދަ ފިލްމަކަށެވެ. މި ފިލްމު ހާއްސަ ވެގެންދިޔަ އެއް ސަބަބަކީވެސް މިއެވެ. ކުދިވެރިންނާއެކު އެއްތަނަކު ތިބެ، ބަލާލަންކެރޭފަދަ ދިވެހި ފިލްމެއް މިފަހުން ދިވެހި ސިނަމާއަށް އައިދުވަސް ހަނދާނެއް ނެތެވެ.