ދެ މުޒާހަރާއެއް ކުރިއަށް: އެއްބަަޔަކު ގޮވަނީ މީޑިއާ ބިލް ބޭރުކުރަން، އަނެއް ބަޔަކު ގޮވަނީ ބިލް ފާސްކުރަން

މީޑިއާ ބިލް ފާސްކުުރުމާއި ދެކޮޅަށް މުޒާހަރާ ކުރަން ފަށާފައިވަނިކޮށް އެ ބިލް ފާސްކުރަން ގޮވާލާ ވެސް ބަޔަކު މުޒާހަރާ ކުރަން ފަށައިފި އެވެ.

ދެ މުޒާހަރާ ވެސް ކުރިއަށް ދަނީ މަޖިލީސް އިދާރާ ކައިރީގަ އެވެ. މުޒާހަރާ ކުރިއަށްދާއިރު މީޑިއާ ބިލް ފާސްކުރުމާއިމެދު މަޖިލީހުން ކުޑައިރުކޮޅެއްގެ ތެރޭގައި ގޮތް ނިންމާނެ އެވެ. މިހާރު ކުރިއަށް ދަނީ ބަހުސްގެ މަރުހަލާ އެވެ.

މީޑިއާ ބިލް ފާސްކުުރުމާއި ވަރަށް ގިނަ ނޫސްވެރީން ދެކޮޅު ހަދަ އެވެ. ނޫސްވެރީން ދަނީ މަޖިލީސް ކައިރީގައި މުޒާހަރާ ކުރަމުންނެވެ. އެ މުޒާހަރާއަށް އިދިކޮޅު އެމްޑީޕީގެ ސަޕޯޓަރުން ތާއީދުކޮށް ދަނީ ބައިވެރިވަމުންނެވެ. އެމްޑީޕީގެ އިސް ވެރީން ވެސް މުޒާހަރާގައި ބައިވެރިވެ އެވެ.

މީޑިއާ ބިލް ފާސްކުރުން އަވަސް ކުުރުމަށް ގޮވާލާ މުޒާހަރާ ކުރަމުން ދަނީ ސަރުކާރަށް ތާއީދު ކުރާ ބައެކެވެ. އޭގެ ތެރޭގައި ސަރުކާރުގެ މަގާމުތަކުގައި ތިބި މީހުން ވެސް ހިމެނެ އެވެ.

އެ މީހުން ދަނީ ބިލް ފާސްކުރަަން ޖެހޭ ކަަމަށް ބުނެ އަޑުއުފުލަމުންނެވެ. އެ ބިލް އަވަހަށް ފާސްކުރުމަށް ވެސް ގޮވާލާ އަޑުއުފުލާފައިވެ އެވެ. އެ މީހުން ތިބީ އެކި ޝުޢޫރުތައް ލިޔެފައިވާ ބޯޑްތައް ވެސް ހިފައިގެންނެވެ.

ތުޅާދޫ ދާއިރާގެ މެންބަރު އަބްދުލްހަންނާން ހުށައެޅި ބިލާމެދު ނޫސްވެރީންގެ ގިނަ ކަންބޮޑުވުންތަކެއް އޮތުމުން ސަރުކާރުން ވަނީ ބިލަށް 14 އިސްލާހެއް ހުށައަޅާފަ އެވެ.