ޖަލުގެ ކަންކަން އިސްލާހުކުރުމަށް ޝައިޚް އިމްރާނަށް ވަނީ ދަތިވެފައި: މުހުތާޒް

ދިވެހިރާއްޖޭގެ ޖަލުތަކުގެ ހާލަތު އިސްލާހުކުރުމަށް ހޯމް މިނިސްޓަރ އައްޝައިޚް އިމްރާން އަބްދުﷲއަށް ދަތިވެފައިވާ ކަމަށް ކުރީގެ ޕްރޮސެކިއުޓަރ ޖެނެރަލް މުހުތާޒު މުހުސިން ވިދާޅުވެއްޖެއެވެ.

މުހުތާާޒު މިހެން ވިދާޅުވީ އެބޭފުޅާ މިރޭ އާންމުކުރެއްވި ފޭސްބުކް ޕޯސްޓެއްގައެވެ.

އެބޭފުޅާ ވިދާޅުވީ ހުވަޔާއި އެއްގޮތަށް މަގާމުގެ މަސްއޫލިއްޔަތު އަދާނުކުރެވޭނަމަ މަގާމުން ދުރަށް ދާންޖެހޭ ކަމަށާއި ތަންފީޒު ޖަލެއްގައި ހުންނަންޖެހޭ ގައިދީއަކު ރިމާންޑް ޖަލެއްގައި ބެހެއްޓުމަކީ ގާނޫނީ ކުށެއްކަމަށެވެ. އަދި ޖަލުގެ އޮޑިޓްގެ ހުށައެޅުންތަކަށްވީ ކިހިނެތްތޯ ހޯމް މިިނިސްޓަރ ވިދާޅުވާން ޖެހޭކަމަށް މުހުތާޒު ވިދާޅުވިއެވެ.

މުހުތާޒު ވިދާޅުވީ އެބޭފުޅާ ދެ އަހަރާއި އަށްމަސް ދުވަސް ހޭދަކުރެއްވި ކަަރަންޓް ނެތް ގޮޅީގައި ހޯމް މިނިސްޓަރ ދެމަސް ދުވަސް ހޭދަކުރެއްވިކަމަށެވެ. އަދި އެބޭފުޅާ އިސްލާހުތަކެއް ގެންނަވާނެކަމަށް އުއްމީދުކުރެވުނުކަމަށް ވިދާޅުވިއެވެ. ނަމަވެސް އޭރުވެސް މުޅި ޖަލު ހިޞާރުކޮށްގެން ގޯސް ހަދަހަދާ ތިބި ބަޔަކު ކައިރި ކުރައްވައި މަގާމުގެ ކުރިއެރުން ދެއްވުމުގެ ނަތީޖާއަކީ ޖަލު އިސްލާހުކުުރުމަށް އެމަނިކުފާނަށް ދަތިވުންކަމަށް މުހުތާޒު ވިދާޅުވިއެވެ.

އަދި މިކަމާއި މެދު މަޖިލީހުގެ މެންބަރުން ވިސްނައި، ފެށޭ ދައުރުގައި ގާނޫނުން މަޖިލީހާއި މަތިކޮށްފައިވާ ބާރުގެ ބޭނުން ކުރައްވައި، ޖަލު އޮޑިޓް ރިޕޯޓްގެ ރެކޮމެންޑޭޝަންތަކަށް އަމަލުކުރުން އަވަސްކުރުން މުހިންމުކަމަށްވެސް އެބޭފުޅާ ވިދާޅުވިއެވެ.