މަހުގެ އުފެއްދުންތައް ބާޒާރަށް ނެރެން 8.3 މިލިއަން ޑޮލަރުގެ އެހީ ހަމަޖެހިއްޖެ: ވަޒީރު ޝިޔާމް

މަސްވެރިކަމުގެ ސިނާއަތުގައި ހަރަކާތްތެރިވާ އަމިއްލަ ކުންފުނިތަކަށް 8.3 މިލިއަން ޑޮލަރުގެ ފަންޑެއް ހަމަޖެހިފައިވާ ކަމަށް ފިޝަރީޒް މިނިސްޓަރ އަޙްމަދު ޝިޔާމް ވިދާޅުވެއްޖެއެވެ.

މިނިސްޓަރ ޝިޔާމް މިފަދައިން ވިދާޅުވީ މިއަދު ބޭއްވި ރައްޔިތުންގެ މަޖިލީހުގެ ޖަލްސާގައި ވާހަކަދައްކަވަމުންނެވެ.

މި ޖަލްސާގައި ވާހަކަދައްކަވަމުން ޝިޔާމް ވިދާޅުވީ މަސްވެރިކަމުގައި ހަރަކާތްތެެރިވާ އަމިއްލަ ކުންފުނިތަކުން އައު އުފެއްދުންތައް ނެރުމަށާ އުކާލާ މަހުގެ ބައިތަކުން ފައިދާކުރުވަނިވި ޕްރޮޑަކްޓްތައް ނެރުމަށް ފަންޑެއް ހަމަޖެހިފައިވާ ކަމަށެވެ. މިނިސްޓަރ ވިދާޅުވީ މި ފަންޑު ހަމަޖެހިފައިވަނީ ވޯލްޑް ބޭންކްގެ އެހީތެރިކަމާއިއެކު ކަމަށެވެ. ހަމަޖެހުނު އަަދަދު ދިވެހި ރުފިޔާއިން 128 މިލިއަން ރުފިޔާއަށް އަރާނެ ކަމަށް މިނިސްޓަރ މައުލޫމާތު ދެއްވިއެވެ.

މީގެ އިތުރުން މަހުގެ އުފެއްދުންތައް އުފައްދާ ކުދި އަދި މެދުފަންތީގެ ވިޔަފާރިތަކަށް ހާއްސަކޮށް މަހުގެ އުފެއްދުންތައް އުފައްދާ ބާޒާރަށް ނެރުމުގެ ގޮތުން 1.8 މިލިއަން ޑޮލަރު ނުވަތަ 27.7 މިލިއަން ރުފިޔާ ހަމަޖެހިފައިވާ ކަމަށް މިނިސްޓަރ ހާމަކުރެއްވިއެވެ.

މި މަޝްރޫއުގެ ދަށުން ހުށަހަޅާ ޕްރޮޖެކްޓްތަކުގެ ޖުމްލަ އަގުގެ 40 އިންސައްތަ ހިލޭ އެހީގެ ގޮތުގައި ލިބިގެންދާނެ ކަމަށްވެސް މިނިސްޓަރ ވިދާޅުވިއެވެ. އަދި މި ޕްރޮގްރާމްގެ ދަށުން ފަންޑިން ހޯދުމަށް ކުރިމަތިލެވޭނެ އުސޫލުތައް ކަނޑައަޅާ މިހާރު އެޕްލިކޭޝަނަށް ހުޅުވާލުމުގެ މަސައްކަތްތައް ކުރަމުންދާކަމަށް މިނިސްޓަރ ވިދާޅުވެފައި ވެއެވެ.

މީގެ އިތުރަށްވެސް މިނިސްޓަރ ވަނީ ފިޝަރީޒް މިނިސްޓްރީގެ ރިވޯލްވިން ފަންޑުން 18 މިލިއަން ރުފިޔާގެ ލޯން، ސީދާ މަސް ކައްކާ ހިއްކާ ފަރާތްތަކަށް ދޫކުރުމަށް އިސްލާމިކް ބޭންކާއިއެކު މަސައްކަތް ފަށާފައިވާކަން ހާމަކުރައްވާފައެވެ.

" އަޅުގަނޑުމެންގެ ސަރުކާރެއްގައި އަޅުގަނޑު ޔަގީންކޮށްދޭން ބޭނުންވަނީ އަތޮޅުތެރޭގައި މަސައްކަތްކުރާ ފަރާތްތަކަށް ވަކިން ހާއްސަކޮށް މަސްކައްކާ ހިއްކުމުގެ މަސައްކަތުގައި އުޅުއްވާ ފަރާތްތައް އަޅުގަނޑުމެންގެ ސަރުކާރުން ބާކީ ނުކުރާނެކަން"

ފިޝަރީޒް މިނިސްޓަރ އަޙްމަދު ޝިޔާމް