ނަޝީދު އެދިވަޑައިގެންނެވީ ދައުލަތުގެ އެންމެ މުހިންމު އެއް ބާރު އުފެއްދުމަށް ހުރިހާ އެންމެން ބައިވެރިވުމަށް

މިއަދު ކުރިއަށްދާ ރައްޔިތުންގެ މަޖިލީހުގެ އިންތިޚާބުގެ ވޯޓުލައި، ދައުލަތުގެ އެންމެ މުހިންމު އެއް ބާރު އުފެއްދުމުގައި ބައިވެރިވުމަށް ކުރީގެ ރައީސް އަދި މަޖިލީހުގެ ކުރީގެ ރައީސް މުހައްމަދު ނަޝީދު އެދިވަޑައިގެންފިއެވެ.

އިސްކަންދަރު ސްކޫލްގައި ބެހެއްޓިފައިވާ ގަލޮޅު އުތުރުގެ އެއް ނަންބަރު ވޯޓު ފޮއްޓަށް ވޯޓުލެއްވުމަށްފަހު ނޫސްވެރިންނާއި ވާހަކަ ދައްކަވަމުން ނަޝީދުވަނީ ވޭހާވެސް ގިނަ ބަޔަކު ވޯޓުލުމަށް އެދިވަޑައިގެންފައެވެ.

މިއީ ވަރަށް މުހިންމު އިންތިޚާބެއް. ރައްޔިތުންގެ މަޖިލީހެއް ކޮންމެ ފަސް އަހަރަކުން އިންތިޚާބު ކުރެވޭނީ. އަޅުގަނޑުގެ އުއްމީދަކީ ވޭހާވެސް ގިނަ ބޭފުޅުން   ވޯޓުދެއްވާނެކަން. އަދު މި ހަރަކާތުގައި ވޭހާވެސް ގިނަ ބޭފުލުން ބައިވެރިވުން. ދައުލަތުގެ އެންމެ މުހިންމު އެއްބާރު އުފެއްދުމަށް ވޯޓު ނަގާ ދުވަސް މިއަދު މިއީ

ކުރީގެ ރައީސް ނަޝީދު

މެންދުރުފަހު 13:00އާ ހަމައަށް ވޯޓުލީ މީހުންގެ އަދަދު 113،627އަށް އަރައިފައިވާ ކަމަށް އީސީން ބުނެއެވެ. އެއީ ވޯޓުލެވޭ އާބާދީގެ 39.92 އިންސައްތައެވެ.

20 ވަނަ ރައްޔިތުންގެ މަޖިލިީހުގެ އިންތިޚާބުގައި ޖުމްލަ 93 ދާއިރާއެއްގެ މެންބަރުން އިންތިޚާބު ކުރާއިރު، އެ ދާއިރާތަކަށް ޕާޓީތަކުން އަދި އަމިއްލަ ގޮތުން 368 ކެންޑިޑޭޓުން ވާދަކުރެއެވެ.

މަޖިލިސް އިންތިޚާބުގައި ވޯޓުލުމުގެ ހައްގު ޖުމްލަ 284،663 މީހަކަށްލިބެއެވެ. މީގެ ތެރޭގައި ހިމެނެނީ 145،302 ފިރިހެނުންނާއި 139،361 އަންހެނުންނެވެ.

އިންތިޚާބުގައި ޖުމްލަ 602 ވޯޓު ފޮށި ބަހައްޓާއިރު، މާލޭގައި 181 ފޮށި، ވިލިމާލޭގައި 9 ފޮށި، ހުޅުމާލޭގައި 51 ފޮށި އަދި އަތޮޅުތަކުގައި 319 ފޮށި އަދި ރިސޯޓުތަކުގައި 34 ފޮށި ވަނީ ބަހައްޓާފައެވެ. މީގެ އިތުރުން ޖަލުތަކުގައި 5 ފޮށި އަދި ރާއްޖޭން ބޭރުގައި 3 ފޮށި ވަނީ ބަހައްޓާފައެވެ.