ފެނަކައިގެ 44 މައްސަލައެއް އޭސީސީން ބަލަމުން އެބަދޭ!

ފެނަކަ ކޯޕަރޭޝަންގެ ތެރޭގައި ހިނގާފައިވާ ކަމަށް ތުހުމަތުކުރެވޭ 44 މައްސަލައެއް ބަލަމުންދާކަމަށް އެންޓި ކޮރަޕްޝަން ކޮމިޝަނުން ހާމަކޮށްފިއެވެ.

އޭސީސީން ބޭއްވި ނޫސްވެރިންގެ ބައްދަލުވުމެއްގައި ވާހަކަފުުޅު ދައްކަވަމުން ކޮމިޝަންގެ ރައީސް މުއައްވިޒް ރަޝީދު ވިދާޅުވީ މިއަަަހަރުގެ މިހާތަނަށް ކޮމިޝަނުން ކޮރަޕްޝަންގެ ޖުމްލަ 547މައްސަލައެއް ބެލުމަށް ނިންމާފައިވާނެކަމަށެވެ.

އޭގެ ތެރެއިން 184 މައްސަލަތަކަކީ ދައުލަތުގެ އެކި ކުންފުނިތަކަށް ނިސްބަތްވާ މައްސަލަތަކެއްކަމަށް މުއައްވިޒް ފާހަަގަކުރެއްވިއެވެ. އެގޮތުން އޭސީސީގެ ދެ ޓީމަކުން ފެނަކަ ކޯޕަރޭޝަންގެ ޖުމްލަ 44 މައްސަލައެއް ބަލަމުންދާކަމަށް ވިދާޅުވިއެވެ. އެ މައްސަލަތަކާއި ގުޅިގެން ތަހުގީގަށް ބޭނުންވާ އެހީތެރިކަމާއި އެއްބާރުލުން ކުންފުނީގެ ފަރާތުން ލިބި މާލީ ހާލަތު ދެނެގަތުމުގެ މަސައްކަތް ކުރަމުންދާ ކަމަށް މުއައްވިޒް ވިދާޅުވިއެވެ.

އޭގެ ތެރެއިން ބައެއް މައްސަލަތައް މިއަހަރުވެސް ނިންމޭނެކަމަށް އެބޭފުޅާ ވިދާޅުވިއެވެ.

މުއައްވިޒް ވިދާޅުވި ގޮތުގައި އޭސީސީގެ މިހާރު ތިިބި ގިނަ މެންބަރުންގެ ދައުރު ހަމަވާން ގާތްވެފައިވާއިރު، މި ދައުރުގައި އެ ކޮމިޝަނުން ތަހުގީގު ކުރި އެންމެ ބޮޑު މައްސަލައަކީ އެމްއެމްޕީއާރްސީގެ ބޮޑު ޚިޔާނާތުގެ މައްސަލައެވެ.

ފޮޓޯ: އަވަސް