ރާއްޖެ އޮތީ ދަރަނީގެ ދަންތުރައެއްގައި ރަނގަޅަށް ބަނދެވިފައި: ރައީސް ނަޝީދު

ދިވެހިރާއްޖޭގެ ދަރަނީގެ ހާލަތު އޮތީ ދަންތުރައެއްގައި ރަނގަޅަށް ބަނދެވިފައިވާ ފަދަ ނުރައްކާތެރި ފައްތަރެއްގައި ކަމަށް ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.

ނަޝީދު އިއްޔެ އެކްސްގައި ކުރެއްވި ޕޯސްޓެއްގައި އެމަނިކުފާނު ފާހަގަކުރެއްވި ގޮތުގައި، ދިވެހި ދައުލަތުގެ ދަރަނީގެ މައްސަލައަކީ މިއަދު ހަމައެކަނި ސަރުކާރަށް އެކަނި ހައްލު ހޯދޭނެ ބާވަތުގެ ކަމެއް ނޫނެވެ. އެއީ މިހާރު މުޅި ޤައުމީ މައްސަލައެއްގެ ގޮތުގައި ބަލަންޖެހިފައިވާ ކަމެއް ކަމަށް ނަޝީދު ވިދާޅުވިއެވެ.

ނަޝީދު އިތުރަށް ވިދާޅުވީ، ދިވެހިންނަށް އަނބުރާ ދެއްކުން ނުކުޅެދޭ މިންވަރުގެ ބޮޑު އިންޓްރެސްޓްގައި ދަރަނި ނަގަމުންދާ ކަމަށެވެ. އަދި އެގޮތަށް ނަގާ ފައިސާއިން ކުރާ ހަމައެކަނި ކަމަކީ ކުރީގެ ދަރަނިތައް ދެއްކުން ކަމަށް ވުމަކީ، ރާއްޖެ ދަރަނީގެ ދަންތުރައެއްގައި ރަނގަޅަށް ބަނދެވިފައިވާ ކަމުގެ ސާފު ހެއްކެއް ކަމަށް އެމަނިކުފާނު ސިފަކުރެއްވިއެވެ.

"ދިވެހިންނަށް އަނބުރާ ދެއްކުން ނުކުޅަދާނަ މިންވަރުގެ ބޮޑު އިންޓްރެސްޓުގައި ދަރަނި ނަގާ، އެ ފައިސާއިން ކުރާ ހަަމައެކަނި ކަމަކީ ކުރީގެ ދަރަނި އަނބުރާ ދެއްކުން ކަމަށް ވީމާ، މި ރާއްޖެ ދަރަނީގެ ދަންތުރައެއްގައި ރަނގަޅަށް ބަނދެވިފައިވާކަން ސާފު،" ނަޝީދު ވިދާޅުވި އެވެ.

ރައީސް ނަޝީދު މިފަދައިން ވިދާޅުވެފައިވާއިރު، 2018 އާއި 2019ގައި ބައިނަލްއަގުވާމީ މާލީ ބާޒާރަށް ވިއްކާފައިވާ 500 މިލިއަން ޑޮލަރުގެ ސްކޫކަށް ވާ ފައިސާ މި އަހަރު ރާއްޖެއިން އަނބުރާ ދައްކަން ޖެހެ އެވެ.

ސަރުކާރުން ފާސްކޮށްފައިވާ 2026 ގެ ބަޖެޓްގައި ވަނީ، ސްކޫކުގެ 450 މިލިއަނެއްހާ ޑޮލަރު ފަހުުން ފައިސާ ދައްކާ ގޮތަށް ލަސްކުރަން ނިންމާފައެވެ. އަދި ސްކޫކަސް ދައްކާ ގޮތަށް އިނީ 150 މިލިއަނެއްހާ ޑޮލަރެވެ. އެ ދައްކާނީ ސޮވަރިން ޑިވަލޮޕްމަންޓް ފަންޑް (އެސްޑީއެފް)ގައި ހުރި ފައިސާއިންނެވެ.

ދިވެހިރާއްޖޭގެ ދަރަނި އެންމެ ބޮޑުވެގެން ދިޔައީ ނިމިދިޔަ އެމްޑީޕީ ސަރުކާރުގައެވެ. އެ ސަރުކާރުން، އިންޑިޔާއިން ބޮޑު އަދަދުން ލޯން ނަގާފައިވާއިރު، ސަރުކާރު ނިމުނުއިރު ދައުލަތުގެ ދަރަނި 100 ބިލިއަނަށްވުރެ މައްޗެވެ.