ޝާހިދުގެ ބައްޕާފުޅު އަވަހާރަވުމާއި ގުޅިގެން ރައީސް ޑރ.މުޢިއްޒު ތައުޒިޔާ ވިދާޅުވެއްޖެ

އެމްޑީޕީގެ ރައީސް އަބްދުﷲ ޝާހިދުގެ ބައްޕާފުޅު ޝައިހް މޫސާ ޖަމީލް އަވަހާރަވުމާއި ގުޅިގެން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ތައުޒިޔާ ވިދާޅުވެއްޖެއެވެ.

ޝާހިދު "އެކްސް" ގައި ކުރެއްވި ޕޯސްޓެއްގައި ވިދާޅުވީ އޭނާގެ ބައްޕާފުޅު އަވަހާރަވީ މިއަދު ހެނދުނުގެ ވަގުތެއްގައި ކަމަށެވެ. އެބޭފުޅާ އަވަހާރަވެފައިވަނީ އާލާސްކަންފުޅާއި އުޅުއްވުމަށްފަހު އޭޑީކޭ އިން ފަރުވާ ހޯއްދަވަމުން ދަނިކޮށެވެ.

މިކަމާއި ގުޅިގެން ރައީސް ޑރ.މުޢިއްޒު އެކްސް ގައި ކުރެއްވި ޕޯސްޓެއްގައި ވިދާޅުވީ، ޝާހިދުގެ ބައްޕާފުޅު އަވަހާރަވި ހަބަރު އަޑުއެއްސެވީ  ނުހަނު ފުން ހިތާމަޔާއެކު ކަމަށެވެ.

ޝާހިދުގެ ބައްޕާފުޅުގެ ކަށު ނަމާދު މިއަދު އަސުރު ނަމާދަށްފަހު އިސްލާމީ މަރުކަޒުގައި އޮތް އިރު، މޫނު ބެލުމަށް މިއަދު 11:30 އިން ފެށިގެން ޒިޔާރަތް ކުރެވޭނެއެވެ.

ފާހަގަކޮށްލެވޭ ގޮތުގައި ޝައިހް މޫސާ ޖަމީލު ދީދީއަކީ މިވަގުތު ދުނިޔޭގައި ތިއްބެވި ހުރަވީ ދަރިކޮޅުގެ ބޭފުޅުންގެ ތެރެއިން، އެންމެ ދޮށީ ބޭފުޅާ އެވެ. އަދި ދޮންބަންޑާރައިންނަކީ ޝައިހް މޫސާ ޖަމީލު ދީދީގެ ފަސް ވަނަ ކާފާފުޅެވެ.