64 އަހަރުގެ ލޯބިވެރިޔާ ގަޔަށް ވަޅިޖެހި އަންހެން މީހާ ހައްޔަރުކޮށްފި

އުމުރުގެ ގޮތުން ބޮޑު ތަފާތެއް ހުންނަ ދެލޯބިވެރިންގެ މެދުގައި ހިނގި މާރާމާރީގެ ތެރެއިން 64 އަހަރުގެ ފިރިހެން މީހާއަށް ވަޅިން ހަމަލާދީ ޒަޚަމްކޮށްލި މައްސަލާގައި 32 އަހަރުގެ އަންހެން މީހާ ހައްޔަރުކޮށްފިއެވެ.

މި މައްސަލަ ފުލުހުންނަށް ހުށަހަޅާފައިވަނީ އިއްޔެ ހެނދުނު 10:05 އެހާކަންހާއިރު ކަމަށާ، މިމާރާމާރީގައި 64 އަހަރުގެ ފިރިހެން މީހާއަށާ 32 އަހަރުގެ އަންހެން މީހާއަށްވެސް އަނިޔާވި ކަމަށް އިއްޔެ ފުލުހުން ބުންޏެވެ.

އަދި މި ދެމީހުންގެ ތެރެއިން 64 އަހަރުގެ މީހާގެ ބުރަކައްޓަށް ތޫނު އެއްޗަކުން ހަމަލާދީ ޒަހަމްކޮށްލާފައިވާއިރު މި ދެމީހުންނަށްވެސް ހޮސްޕިޓަލުގައި ފަރުވާދީފައުވާ ކަމަށް ބުނެފައިވެއެވެ.

ފުލުހުންގެ މީޑިއާ އޮފިޝަލް މިއަދު "ވޮއިސް" އަށް މައުލޫމާތުދެއްވަމުން ވިދާޅުވީ، ފިރިހެން މީހާ މިހާރު ހޮސްޕިޓަލުން ދޫކޮށްލާފައިވާ ކަމަށާ، އަދި އަންހެން މީހާ އިއްޔެ ހައްޔަރުކޮށްފައިވާ ކަމަށެވެ.

އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން 30 ދުވަހަށް ބަންދު ކުރަން އަމުރުކޮށްފައިވާ ކަމަށްވެސް އޮފިޝަލް ވިދާޅުވިއެވެ.