ކޮންމެ ވެރިކަމެއްގައި ފަނޑިޔާރުން ބަދަލުކުރުމަކީ ވަރަށް ބޮޑު ގޯހެއް: ނަޝީދު

ވެރިކަން ބަދަލުވާ ކޮންމެ ފަހަރަކު ފަނޑިޔާރުން ބަދަލުވާން ޖެހޭ ކަމަށް އަ ވެރީންގެ ހިތަށް ވަންނަކަމީ ވަރަށް ބޮޑު ދެރައެއް ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.

ނަޝީދު މިހެން ވިދާޅުވީ އެކްސްގައި ކުރެއްވި ޕޯސްޓެއްގަ އެވެ. އެމަނިކުފާނު ވިދާޅުވީ ރައީސުލްޖުމްހޫރިއްޔާ ބޭނުންފުޅުވާ އިރަށް ފަނޑިޔާރުން ބަދަލު ކުރުމަކީ ފެހި ގާނޫނު އަސާސީ ތަސައްވުރު ކުރި ގޮތެއް ނޫން ކަމަށެވެ.

"އެހެނަސް މި ގާނޫނު އަސާސީ ބައްޓަން ކޮށްފައި މިވަނީ އުންމީދުކުރި ގޮތާއި ހިލާފަށް ރަސްކަމެއް ފަދަ ރިޔާސީ ނިޒާމަކަށް,"

އެމަނިކުފާނު ވިދާޅުވީ 2008 ވަނަ އަހަރު އާ ގާނޫނު އަސާސީއަށް އަމަލު ކުރަން ފެށުމާއެކު އާ ސުޕްރީމް ކޯޓް އެކުލަވާލަން ޖެހުނު ކަމަށެވެ. އަދި 2013 ވަނަ އަަހަރާއި 2018 ވަނަ އަހަރު އަދި 2023 ވަނަ އަހަރުގެ އިންތިހާބުތަކަށް ފަހުގައި ކޮންމެ ވެރިކަމަކުން ވެސް މި ވަނީ ފަނޑިޔާރުން ބަދަލު ކޮށްފައިވާ ކަމަށެވެ.

"އެއީ ވަރަށް ބޮޑު ދެރައެއް. އަދި ގޯހެއް. މިކަން މިހެން ނުވާނެ ގޮތަކަށް ނިޒާމު ބަދަލު ކުރަން ޖެހޭ," ނަޝީދު ވިދާޅުވި އެވެ.

ރައީސް ނަޝީދު ކުރެއްވި ޕޯސްޓް

ނަޝީދު މިހެން ވިދާޅުވީ ސުޕްރީމް ކޯޓުގެ ދެ ފަނޑިޔާރުން ކަމަށްވާ ފަނޑިޔާރު މަހާޒް އަލީ ޒާހިރާއި އަޒްމިރަލްދާ ޒާހިރު، މަގާމުން ވަކިކުރަން ރައްޔިތުންގެ މަޖިލީހުން މިއަދު ފާސްކުރުމާއި ގުޅިގެންނެވެ.

ރައީސް ޔާމީނާއި ރައީސް ސޯލިހްގެ ވެރިކަމުގައި ވެސް ސުޕްރީމް ކޯޓް ބަދަލުކުރި އެވެ. ސޯލިހްގެ ސަރުކާރުގައި މަޖިލީހުން އެކަން ކުރިިއިރު މަޖިލީހުގެ ރިޔާސަތުގައި އިންނެވީ ރައީސް ނަޝީދެވެ. އެމަނިކުފާނު ޖޭއެސްސީ ގައި ވެސް އިންނެވި އެވެ.

ނަމަވެސް އޭރު އެކަމާއި ދެކޮޅު ހައްދަވާފައެއް ނުވެ އެވެ.