ރަޝިއާގެ ދުރު ރަށަކަށް ޕޯލާރ ބެއާރ ތަކެއް އަރައިގަނެ، ކުއްލި ޙާލަތު ޢިއުލާންކޮށްފި!

ގާތްގަނޑަކަށް 50 އާ ގާތްކުރާ އަދަދަކަށް ޕޯލާރ ބެއާރ ވަނީ ރަޝިއާގެ ބެލުޝްޔާ ގުބާ ސަރަހައްދަށް ވަދެފައިކަމަށް އެ ޤައުމުގެ ޚަހަބަރު ފަތުރާ ވަޞީލަތްތަކުން ދަނީ ރިޕޯޓް ކުރަމުންނެވެ. ޕޯލާރ ބެއާރ އަކީ ދުނިޔޭގެ އެންމެ ފިނި ބިތްތަކުގައި ދިރިއުޅޭ ސާރިދޯޅުތަކެކެވެ. އަދި އާރކްޓިކް ކަނޑުގައި، މޮސްކޯ އާއި 1200 މޭލު ދުރުގަ އޮންނަ މި ކުޑަ ކުޑަ ރަށަށް ޕޯލާރ ބެއާރތައް އަރައިގަތީ، އެމީހުންގެ ދިރިއުޅޭ އުތުރުގެ ހިސާބުތަކަށް ތިމާވަށްޓަށް އަންނަ ބަދަލުތަކުގެ ސަބަބުން ނޭދެވޭ އަސަރުތަކެއް ކޮށްގެން ކަމަށް ބެލެވެއެވެ.

ބެލުޝްޔާގުބާ ސަރަހައްދުގައި މީހުން މިހާރު ދިރިއުޅެމުންދަނީ ބޮޑު ބިރުވެރިކަމެއްގައެވެ. ގޭގެއިން ނުކުމެ، ދުވަހުން ދުވަހަށް ކުރަންޖެހޭ ކަންތައްތައް ކުރަން ޖެހިލުންވާ ރައްޔިތުން ބުނާ ގޮތުގައި މިހާރު އެމީހުން ދިރިއުޅޭ ރަށުގައި އެއްވެސް ރައްކާތެރިކަމެއް ނެތްކަމަށް އިހުސާސްކުރެވެއެވެ. ޑިސެމްބަރު މަހު އެ ސަރަހައްދަށް ހިޖުރަ ކުރި ޕޯލާރ ބެއާ ތައް ދަނީ މީހުން ދިރިއުޅޭ ގެތަކަށާއި ވިޔަފާރިތަކަށް ގެއްލުންދެމުންނެވެ. ޖައްވު ހޫނުވެ، ގަނޑުފެން ވިރުމުގެ ސަބަބުން މި ޖަނަވާރުން މަޖުބޫރުވެފައިވަނީ ގިނަ ވަގުތު އެއްގަމުގައި ކާ އެއްޗެހި ހޯދަން ހޭދަކުރުމަށެވެ.

ސައިންސްވެރިންގެ ދިރާސާތައް ދައްކާގޮތުގައި ދުނިޔޭގެ ޕޯލާރ ބެއާ އާބާދީ ދަނީ ފާއިތުވި 20 އަހަރު ތެރޭ ކަންބޮޑުވާވަރަށް ކުޑަވެފައެވެ. އިންޓާރނޭޝަނަލް ޔޫނިއަން ފޮރ ކޮންސާރވޭޝަން އޮފް ނޭޗާރ ގެ ތަފާސް ހިސާބުތަކުން ދައްކާ ގޮތުގައި މިހާރު މުޅި ދުނިޔޭގައިވެސް ދިރިއުޅެނީ ގާތްގަނޑަކަށް 26،000 ޕޯލާރ ބެއާ އެވެ. އަދި ޖައްވު ހޫނުވުން ކޮންޓްރޯލް ނުކުރެވިއްޖެނަމަ، ޕޯލާރ ބެއާ ތަކާއި އިންސާނުންގެ މެދު ކުރިމަތިލުންތައް އިތުރުވެ، އެ ކާ ތަކެތި ނުލިބުމުގެ ސަބަބުން އެ ޖަނަވާރު މުޅި ދުނިޔެއިން ނެތިދާނެކަމުގެ ބިރު އޮތްކަންވެސް ތިމާވެށި ދިރާސާ ކުރާ ފަރާތްތަކުން ފާހަގަކުއެވެ.