އެއްމަސްތެރޭ 40،000 މީހުން، އަރިދަފުސް ރޯގާ ޖެހިގެން ޑޮކްޓަރަށް ދައްކައިފި

އަރިދަފުސް ރޯގާ ޖެހިގެން މިދިޔަ ނޮވެންބަރު މަހު ރިޕޯޓްކޮށްފައިވާ މީހުންގެ 40،000 އަށް އަރާފައިވާކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ތަފާސްހިސާބުތަކުން ދައްކައިފިއެވެ.

އެޗްޕީއޭއިން އާއްމުކުރި ތަފާސްހިސާބުތައް ދައްކާގޮތުގައި މިދިޔަ ނޮވެމްބަރު މަހު އަރިދަފުސް ރޯގާ ޖެހިގެން 40،504 މީހަކު ވަނީ ރިޕޯޓްކޮށްފައެވެ. މިއީ މިއަހަރުގެ އޮކްޓޫބަރު މަހާ އަޅާބަލާއިރު 10،000 އަށްވުރެ ގިނަ މީހުންނެވެ. އޮކްޓޫބަރު މަހު ރޯގާޖެހިގެން ރިޕޯޓްކޮށްފައިވަނީ 29،515 މީހެކެވެ.

އަދި މިއީ މިދިޔަ އަހަރުގެ މިމުއްދަތުގައި އަރިދަފުސް ރޯގާ ޖެހިގެން ރިޕޯޓުކުރި އަދަދު ކަމަށްވާ، 37،028 އަށްވުރެވެސް 3000 މީހުން އިތުރު އަދަދެކެވެ.

އަރިދަފުސް ރޯގައިގެ އިތުރުން، އިންފުލުއެންޒާގެ އަލާމާތްތައް ހުރެގެން ޓެސްޓް ކުރި މީހުންގެ އަދަދުވެސް ނޮވެމްބަރުމަހު އިތުރު ކަމަށް ތަފަށް ހިސާބުތަކުން ދައްކައެވެ.

އެގޮތުން މިއަހަރުގެ މިހާތަނަށް 2،375 މީހުން އިންފުލުއެންޒާއަށް ޓެސްޓް ކުރިއިރު އޭގެ ތެރެއިން 476 ސާމްޕަލް ޕޮޒިޓިވްއެވެ. އޭގެ ތެރޭގައި މިދިޔަ މަހު ޓެސްޓުކުރި 164 ސާމްޕަލްގެ ތެރެއިން ޕޮޒިޓިވް ވި 42 ހިމެނެއެޗެ.

އަދި ޑެންގީ ހުން ޖެހިގެންވެސް އޮކްޓޫބަރު މަހު 126 ކޭސް ރިޕޯޓުކޮށްފައިވާއިރު ނޮވެންބަރު މަހު 140 ކޭސް ރިޕޯޓް ކޮށްފައިވެއެވެ.

އެހެންކަމުން، ބަލިތަކުން ރައްކާތެރިވުމަށް ފިޔަވަޅުތައް އެޅުމަށް އެޗްޕީއޭއިން ވަނީ އިލްތިމާސް ކޮށްފައެވެ.