މަސްވެރިންނަށް ތަމްރީނުދޭ މަރުކަޒު އަންނަ އަހަރު ހުޅުވޭނެ: ޒަހާ

މަސްވެރިންނަށް ތަމްރީނު ދިނުމަށް މާލެ އަތޮޅު މަނިޔަފުށީގައި ގާއިމުކުރި، މޯލްޑިވްސް މެރިން ރިސާރޗް އިންސިޓިޓިއުޓް، އަންނަ އަހަރުގައި ހުޅުވޭނެ ކަމަށް ފިޝަރީޒު މިނިސްޓަރު ޒަހާ ވަހީދު ވިދާޅުވެއްޖެއެވެ.

މަސްވެރިންނަށް އަމާޒުކޮށްގެން ސަރުކާރުން ''ކެޔޮޅު'' އެޕްލިކޭޝަން އިފްތިތާހު ކުރުމަށް ރޭ ދަރުބާރުގޭގައި ބޭއްވި ރަސްމިއްޔާތުގައި ވާހަކަ ދައްކަވަމުން މިނިސްޓަރު ޒަހާ ވިދާޅުވީ، މަސްވެރިން އެދިފައިވާ ގޮތުގެ މަތިން، މަސްވެރިންނަށް ބޭނުންވާ މައުލޫމާތު ފޯރުކޮށްދިނުމަށްޓަކައި ކުރަންޖެހޭ ދިރާސާތައް ރިސާޗު ސެންޓަރުގައި ކުރެވިގެންދާނެ ކަމަށެވެ.

އަންނަ އަހަރު އެކަށީގެންވާ ބަޖެޓެއް ތަމްރީނު ސެންޓަރަށް ލިބިފައިވާކަން ފާހަގަކުރައްވައި ޒަހާ ވިދާޅުވީ، މަސްވެރިކަމުގެ ތަމްރީނު ދިނުމަށްޓަކައި މަނިޔަފުށީގައި ގާއިމުކުރި މަރުކަޒު އަންނަ އަހަރު ހުޅުވޭނެ ކަމަށެވެ.

މީގެއިތުރުން ޒަހާ ވިދާޅުވީ، ރާއްޖޭގައި ބާނާ މަހުން ދިވެހިންނަށް އެކަށީގެންވާ މަންފާ ނުލިބޭ ސަބަބުތަކުގެ ތެރޭގައި ދިވެހިރާއްޖެއިން ބާނާ މަސް ރޯ މެޓީރިއަލުގެ ގޮތުގައި ރާއްޖެއިން ބޭރުކުރުން ހިމެނޭ ކަމަށެވެ.

އެކަން މަދުކުރުމަށްޓަކައި މަސް ގަންނަ ކުންފުނިތައް އިތުރުކޮށް، ރަށްރަށުގައި އަމިއްލައަށް މަސް ޕްރޮސެސްކުރެވޭނެ އިންތިޒާމުތައް ހަމަޖައްސައިދިނުމަށް ސަރުކާރުން މަސައްކަތްކުރަމުން އަންނަ ކަމަށް ޒަހާ ވިދާޅުވިއެވެ.

މަނިޔަފުށި މެރިކަލްޗާ ރިސާޗް އެންޑް ޑިވަލޮޕްމަންޓް ފެސިލިޓީގެ ކޮންސްޓްރަކްޝަން މަސައްކަތް އެސްޖޭ ކޮންސްޓްރަކްޝަނާ ހަވާލުކޮށްފައިވަނީ މިއަހަރުގެ މާޗު މަހުގެ އެގާރައިގައެވެ.

އެ މަސައްކަތަކީ ވޯލްޑް ބޭންކުން ރާއްޖޭގައި ދެމެހެއްޓެނިވި ގޮތެއްގައި މަސްވެރިކަމުގެ ކަންކަން އާލާކުރުމަށް މަސައްކަތް ކުރުމަށް ދިން އެހީގެ ދަށުން ގާއިމުކުރާ މަރުކަޒެކެވެ.