މިހާރު އަހަރަކު އެއްލައްކަ ވިހިހާސް ޓަނާއި ހަމައަށް ކާގޯ ބޭރުކުރެވޭނެ: އެމްޑީ ޝަރީފް

މިހާރު އަހަރަކު އެއްލައްކަ ވިހިހާސް ޓަނާއި ހަމައަށް ކާގޯ ބޭރުކުރެވޭނެކަމަށް އެމްސީއެލްގެ މެނޭޖިންގ ޑިރެކްޓަރ އިބްރާހިމް ޝަރީފް މުޙައްމަދު ވިދާޅުވެއްޖެއެވެ.

ޝަރީފު މިފަދައިން ވިދާޅުވެފައިވަނީ ވެލާނާ އިންޓަރނޭޝަނަލް އެއަރޕޯޓްގައި މިހާރު ބޭނުންކުރަމުންދާ ކާގޯ ޓާމިނަލަށްވުރެ ދެ ގުނަ ބޮޑު، އާ ކާގޯ ޓަރމިނަލް ހުޅުވުމަށް މިއަދު ހަވީރު ވީއައިއޭގައި ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.

"މިކާގޯ ޓާމިނަލް ހުޅުވުމުން އަޅުގަނޑުމެނަށް އަހަރެއްގެ މައްޗަށް އެއްލައްކަ ވިހިހާސްޓަނާއި ހަމައަށް ކާގޯ ބޭރުކުރެވޭނެ، މިޙާތަނަށް އަޅުގަނޑުމެން ކާގޯ ބޭރުކުރުމަށް ބޭނުންކުރި ޢިމާރާތަކީ މީގެ ސާޅިސް އަހަރުކުރިން ބިނާކުރެވުނުތަނެއް "

އެމްޑީ ޝަރީފު ވިދާޅުވިއެވެ.

ކާގޯ ހޭންޑްލިންގ ހިދުމަތް ދެމުން އަންނަތާ 40 އަހަރު ވެފައިވާ ވެލާނާ އިންޓަރނޭޝަނަލް އެއަރޕޯޓުގައި އައު ކާގޯ ޓަރމިނަލެއް ތަރައްޤީކުރަން ފެށީ ކާގޯގެ އަދަދު އެތައް ގުނައެއް އިތުރުވެ، ޓަރމިނަލް ކުޑަވެގެން ދިމާވާ ދަތިތައް ހައްލު ކުރެއްވުމަށެވެ.

މިއަދުގެ މި ރަސްމިއްޔާތުގައި ޝަރީފްވަނީ ރައީސް ޑރ.މުހައްމަދު މުއިއްޒުގެ ތަރައްޤީގެ ތަޞައްވަރަށް ވަރަށް ބޮޑަށް ތަޢުރީފުކޮށް ވާހަކަ ދައްކަވާފައެވެ.

"ވެލާނާ އިންޓަނޭޝަނލް އެއާޕޯޓުގެ ތަރައްޤީއަށާއި ، ދިވެހިރާއްޖޭގެ އިސްތިޤްލާލާއި ކުރިއެރުމަށ މިހާރުގެ ރައީސުލް ޖުމުހުރިއްޔާ ދެކެވަޑައި ގަންނަވާ ތަޞައްވަރަށް ޓަކައި އެމްސީއެލް މުއައްޒަފުންގެ ނަމުގައި ވަރަށް ބޮޑަށް ޝުކުރު ދަންނަވަން "

ޝަރީފް ވިދާޅުވިއެވެ.

މިއަދު ހުޅުވިގެން މިދިޔަ އެއަރޕޯޓްގެ އައު ކާގޯ ޓަރމިނަލަކީ އަހަރެއްގެ މައްޗަށް 120،000 ޓަނުގެ މުދާ ހޭންޑަލް ކުރެވޭ ކެޕޭސިޓީގެ ޓަރމިނަލެކެވެ. އެހެންކަމުން ޒަމާނީ ވަސީލަތްތަކާއެކު ތަރައްޤީކޮށްފައިވާ އައު ކާގޯ ޓަރމިނަލަކީ އެއަރޕޯޓްގައި މިހާތަނަށް ބޭނުންކުރަމުންދިޔަ 50000 ޓަނުގެ ކެޕޭސިޓީގެ ކާގޯ ޓާމިނަލާއި އަޅާބަލާއިރު 2 ގުނަ ބޮޑު ޓަރމިނަލަކެވެ.