ފުށިދިއްގާގެ މައްސަލަ: ރަށް ބަަލަހައްޓާ ދެ ބިދޭސީން ގެންގުޅުނީ ލާއިންސާނީކޮށް

ހުއްދައެއް ނެތި ފަތުރުވެރިކަމުގެ ޚިދުމަތްތައް ފޯރުކޮށްދެމުންދިޔަ އދ.ފުށިދިއްގާ ބަލަހައްޓަމުންދިޔަ ދެ ބިދޭސީންނާއި މެދު އަމަލުކޮށްފައިވަނީ ވަރަށް ލާއިންސާނީކޮށް ކަމަށް ޓޫރިޒަމް މިނިސްޓަރ އަލީ ވަހީދު ވިދާޅުވެއްޖެއެވެ.

އެބޭފުޅާ މިކަން ހާމަކުރެއްވީ ފުށިދިއްގާގެ މައްސަަލައާއި ގުޅިގެން މިއަދު ބޭއްވި ނޫސްވެރިންގެ ބައްދަލުވުމެއްގައެވެ.

އަލީ ވަހީދު ވިދާޅުވިގޮތުގައި އެރަށުގައި ފަތުރުވެރިކަމުގެ ޚިދުމަތްތައް ފޯރުކޮށްދެމުންދިޔައީ މީގެ ކުރިން ޕްލޭނިންގ މިނިސްޓްރީން ދޫކުރި، މިހާރު މުއްދަތު ހަމަވެފައިވާ ވަރުވާ ޑޮކިއުމެންޓެއް ދައްކައިގެންނެވެ.

މިނިސްޓަރ ވިދާޅުވީ މި ރަށް ބަލަހައްޓަން ބައިތިއްބާފައި ތިބީ ވޯކްޕާމިޓް ނެތް ދެ ބިދޭސީންނެވެ. އަދި މި ދެމީހުންނާއި މެދު އަމަލުކުރަމުންދަނީ ވަރަށް ލާ އިންސާނީ ގޮތަކަަށްކަމަށް އެބޭފުޅާ ފާހަގަކުރެއްވިއެވެ. އެގޮތުން އެ ފަރާތްތައް ނިދަން ޖެހެނީ ކަރަންޓާއި ނުލައި، ފުޅިބައްތީގެ އަލިކަމުގައި ކަމަށް ޓޫރިޒަމް މިނިސްޓަރ ވިދާޅުވިއެވެ.

"އެ ރަށުގައި ތިޖޫރިއެއް ވެސް ހުރޭ. އެ ރަށަށް އަރާ މީހުންގެ އަތުން ފީގެ އިތުރުން ޓިޕްސްގެ ގޮތުގައި ވެސް ފައިސާ ހޯދާކަން ފެންނަން އެބަ ހުރި. އަދި ގާނޫނާ ހިލާފަށް ބައިތިއްބާފައި ތިބި ބަންގްލަދޭޝް ރައްޔިތުންނާ މެދު ކަންތައް ވެސް އަމަލު ކޮށްފައިވަނީ ވަރަށް އިހާނެތިކޮށް،" އަލީ ވަހީދު ވިދާޅުވިއެވެ.

ޓޫރިޒަމް މިނިސްޓްރީން މިހާތަނަށް ދެކޭގޮތުގައި އެރަށުގައި ފަތުރުވެރިކަމުގެ ވިޔަފާރިއެއްކޮށް ފައިދާ ހޯދަމުން ދިޔައީ 2011 ވަނަ އަހަރު އެރަށުގައި ރިސޯޓެއް ހެދުމުގެ ބިޑެއް ކާމިޔާާބުކޮށްފައިވާ  މ. ހަސްތީ، އަހްމަދު ޚަލީލެވެ. 2009 ވަނަ އަހަރުން ފެށިގެން ޚަލީލް އެރަށް ވަރުވާގެ ގޮތަށް ނަގާފައިވާއިރު، ފަހުން ސަރުކާރުން ވަނީ އެރަށުގައި ރިސޯޓެއް ހެދުމުގެ އެއްބަސްވުމުގައި ސޮއިކުރަން ދެކޮޅުހަދާފައެވެ. އަދި އޭގެ ފަހުން އެދެރަށް ވަނީ އެހެން ދެ ކުންފުންޏަކަށް ތަފާތު ދެ ނަމެއްގައި ވިއްކާާލާފައެވެ.

އެރަށުގެ މައްސަލަ ފުލުހުންނާއި ޓުއަރިޒަމް މިނިސްޓްރީން ތަހުގީގުކުރަމުންދާއިރު، ރަށުގެ މިލްކުވެރިކަމާއި ގުޅޭ މައްސަލައެއް ކޯޓުގައި އެބަ ކުރިއަށްދެއެެވެ. އެރަށް މިހާާރު އޮތީ ފުލުހުންގެ ބެލުމުގެ ދަށުގައެވެ.