އައު މަޖިލިސް މެމްބަރުން ހުވާކުރެއްވުން މޭ މަހުގެ 28 ވަނަ ދުވަހު!

މި ހަފްތާގެ އާދިއްތަ ދުވަހު ބޭއްވި މަޖިލިސް އިންތިހާބުގައި މަޖިލީހުގެ އާދައުރަށް ހޮވިވަޑައިގެން މެމްބަރުން ހުވާ ކުރުމުގެ ޖަލްސާ  މެއި މަހުގެ 28 ވަނަ ދުވަހު ބާއްވަން ނިންމަވައިފިއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި މަޖިލީހުގެ ރައީސް މުޙައްމަދު އަސްލަމް ވިދާޅުވީ، އައު މަޖިލިސް ހުވާކުރުމަށް ބާއްވާ ޖަލްސާ އަންނަ މަހުގެ 28 ވަނަ ދުވަހު ބޭއްވުމަށް ވާންޖެހޭ ތައްޔާރީތައް މިހާރު މަޖިލީހުން ކުރިއަށްގެންދާކަމަށެވެ.

އަސްލަމް ވިދާޅުވީ، މިހާރު ހިނގަމުން މިދާ މަޖިލީހުގެ ފަސް އަހަރުގެ ދައުރު ނިމޭނީ އަންނަ މަހުގެ 15 ގައި ކަމަށާއި، މަޖިލީހުން އެހެން ގޮތަކަށް ކަނޑަނާޅާ ހިނދަކު މިދައުރުގެ އެންމެ ފަހުގެ ޖަލްސާ ބޭއްވުމަށް ހަމަޖެހިފައިވަނީ މެއި މަހުގެ 13 ވަނަ ދުވަހު ކަމަށެވެ.

"ވިހިވަނަ ރައްޔިތުންގެ މަޖިލީހުގެ މަޖިލީހަށް އިންތިހާބުވެވަޑައިގެންނެވި މެމްބަރުން ދިވެހި ރާއްޖޭގެ ޖުމްހޫރިއްޔާގެ ގާނޫނު އަސާސީގެ 81 ވަނަ މާއްދާގައި ވާ ގޮތުގައި މަތީން ރައްޔިތުންގެ މަޖިލީހުގެ މެމްބަރުންގެ ހުވާ ކުރުން 28 މޭ 2024 ވާ އަންގާރަ ދުވަހު އޮންނާނެ ވާހަކަ ދަންނަވަން."

އަސްލަމް ވިދާޅުވިއެވެ.

މޭ މަހުގެ 28 ވަނަ ދުވަހު މެމްބަރުން ހުވާކުރެއްވުމާއި އެކު، މަޖިލީހުގެ 20 ވަނަ ދައުރު ފެށިގެން ދާއިރު، މިހާރު މަޖިލީހުގައި ތިއްބެވި ގިނަ މެމްބަރުންނަށް ވަނީ ނާކާމިޔާބީއާ ކުރިމަތިލާން ޖެހިފައިކަން ފާހަގަކޮށްލަން ޖެހެއެވެ.

އިންތިހާބުގެ ވަގުތީ ނަތީޖާ ދައްކާގޮތުން، ސަރުކާރު ހިންގާ މައި ޕާޓީ ޕީއެންސީ އަށް ސުޕަ މެޖޯރިޓީ ވަނީ ލިބިފައެވެ. މިގޮތުން އެޕާޓީއަށް މަޖިލީހުގެ 71 ގޮނޑި ލިބިފައިވާއިރު، ޕާޓީގެ ތާއީދާއެކު ގޮނޑި ކާމިޔާބު ކުރި ކެންޑިޑޭޓުން ހިމަނައިގެން ސަރުކާރަށް އެއްބާރުލުން ދޭނެ 75 ކެންޑިޑޭޓުން މަޖިލީހުގައި ތިބޭނެއެވެ.

މިހާރު ކުރިއަށްދާ 19 ވަނަ މަޖިލީހުގެ މެޖޯރިޓީ ޕާޓިގެ ގޮތުގައި އޮތް އިދިކޮޅު އެމްޑީޕީ އަށް ލިބިފައިވަނީ އެންމެ 12 ގޮނޑިއެވެ.