ފުލެޓް މައްސަލާގައި އޭސީސީއިން ނިންމާ ނިންމުމަށް އިހްތިރާމް ކުރާނަން: ޑރ. ހައިދަރު

ގެދޮރުވެރިޔާ ސްކީމްގެ ދަށުން ދޫކުރާ 4000 ފުކެޓާ ގުޅިގެން އެންޓި-ކޮރަޕްޝަން ކޮމިޝަން، އޭސީސީން ނިންމާ ނިންމުންތަކަށް އިހްތިރާމް ކުރައްވާނެ ކަމަށް ހައުސިންގ މިނިސްޓަރު ޑރ. ޢަލީ ހައިދަރު އަޙްމަދު ވިދާޅުވެއްޖެއެވެ.

ބިންވެރިޔާ ސްކީމްގެ ދަށުން ގޯތި ލިބިފައިވާ ފަރާތްތަކަށް ރަޖިސްޓްރީ ހަވާލު ކުރައްމުން ގެންދާ ސަރަހައްދަށް އިއްޔެ ވަޑައިގެންނެވުމަށްފަހު، ގެދޮރުވެރިޔާ ސްކީމްގެ ދަށުން ދޫކުރާ ފުލެޓްތައް ދޫކުރުމާއި ގުޅޭ ގޮތުން ވާހަކަ ދައްކަވަމުން، ޑރ. ހައިދަރު ވިދާޅުވީ އެ ފުލެޓް ތައް ދޫކުރުން ވަގުތީގޮތުން މަޑުޖައްސާލަން އޭސީސީން އަންގާފައިވާއިރު، އޭސީސީން ހިންގަމުންދާ ތަހުގީގަށްފަހު ނިންމާ ނިންމުމަށް އިޙްތިރާމް ކުރައްވާނެ ކަމަށެވެ.

އަދި އޭސީސީން އެ މައްސަލަ ބެލުމަށްފަހު ފުލެޓް ދޫކުރުމުގައި މައްސަލައެއް އުޅޭ ކަމަށް އެ އިދާރާއަށް ފެންނަ ނަމަ، އެކަން މިނިސްޓްރީން ބަލާނެ ކަމަށްވެސް މިނިސްޓަރު ހައިދަރު ވިދާޅުވި އެވެ.

އެބޭފުޅުން (އޭސީސީން) ބައްލަވަންޖެހޭ ކަންތައްތައް ބެއްލެވުމަށްފަހު ކަނޑައަޅުއްވާފައިވާ ރިކޮމެންޑޭޝަނަށް ބަލައިގެން އަޅުގަނޑުމެންނަށް ކުރިއަށް ދެވޭނީ. އެއީ ގާނޫނީ ގޮތުން ބާރުލިބިގެން ހިނގާ އަމިއްލަ، މިނިވަން މުވައްސަސާއެއް. އެބޭފުޅުންގެ ވަރަށްބޮޑު ޒިންމާއެއް އޮވޭ ކޮރަޕްޝަން ނައްތާލައި، ކޮރަޕްޝަން ހިންގާފައި އޮވޭތޯ ބެލުމަށް. އެހެންވީމާ އެބޭފުޅުން ބައްލަވާފައި އޭގައި އެއްވެސް މައްސަލައެއް އުޅޭ ނަމަ، އަޅުގަނޑުމެން ޖެހޭނެ އެކަން ބަލަން.

ހައުސިން މިނިސްޓަރު ޑރ ޢަލީ ހައިދަރު އަޙްމަދު

ޑރ. ހައިދަރު މިފަދައިން ވިދާޅުވެފައި ވާއިރު، ކުރީ ސަރުކާރުން ކުރިއަށް ގެންދިޔަ ގެދޮރުވެރިޔާ ސްކީމްގެ ދަށުން ދޫކުރުމަށް އިއުލާންކުރި 4000 ފުލެޓު، ދޫކުރުން ހުއްޓާލުމަށް އެންޓި ކޮރަޕްޝަން ކޮމިޝަން (އޭސީސީ) އިން ހައުސިން މިނިސްޓްރީއަށް އެންގި އެންގުން އިއްޔެ ވަނީ ނިމުމަކަށް ގެނެސްފަ އެވެ.

އެ ފުލްޓްތައް ދޫކުރުމުގެ މަސައްކަތް ކުރިއަށް ގެންދަން އޭސީސީން ހުއްދަދީފައިވަނީ އަސާސީ އުސޫލުތަކާއި ޝަރުތުތަކާ އެއްގޮތަށް ޕޮއިންޓް ދީފައިވާ ފޯމުތަކަށް ބަދަލު ނާންނަ ގޮތަށް ކަމަށް އެ ކޮމިޝަނުން ބުނެއެވެ.

އަދި ހަމައެހެންމެ މީގެ ކުރިން މައްސަލަ ހުރި ކަމަށް ފާހަގަވި ފޯމުތައް މުރާޖައާ ކުރުމާއި މުރާޖައާ ކުރުމުގައި، އުސޫލުގައި ސީދާ ކަނޑައެޅިގެން ވަކި ގޮތެއް ބަޔާން ނުކުރާ ކަންކަމާ މެދު ގޮތްތައް ކަނޑައަޅައި މުރާޖައާ ކުރުމުގައި ތަފާތެއް ނެތި، އެއް މިންގަނޑަކުން އަމަލުކުރުމަށް ހައުސިން މިނިސްޓްރީ އަށް ވަނީ އަންގާފައެވެ.

ފުލެޓް ދޫކުރުމުގެ މަސައްކަތް އޭރު އެ ކޮމިޝަނުން ހުއްޓުވީ ފްލެޓު ހައްގު ނުވާ ބަޔަކަށް މަގާމުގެ ބޭނުން ނާޖާއިޒު ގޮތުގައި ހިފައިގެން އޭރުގެ ސަރުކާރުން ފްލެޓު ދީފައި ހުރި ކަމަށް އާންމުން ކުރަމުންދިޔަ ތުހުމަތުތަކުގެ ސަބަބުންވެ.