ސްކޫލްތަކުގެ މަރާމާތަށް 30 މިލިޔަން ރުފިޔާ ހަމަޖައްސައިފި

ރާއްޖޭގެ ސްކޫލްތަކުގައި ކުރަން ޖެހޭ މަރާމާތުތަކަށް ބޭނުންވާ 30 މިލިޔަން ރުފިޔާ ހަމަޖައްސަވާފައިވާ ކަމަށް ތަޢުލީމާ ބެހޭ ވަޒީރު ޑރ. އިސްމާޢިލް ޝަފީޢު ވިދާޅުވެއްޖެއެވެ.

ދައުލަތުގެ މީޑިޔާ ޕީއެސްއެމަށް ދެއްވި އިންޓަރވިއު އެއްގައި މިކަން ހާމަކުރައްވަމުން ވަޒީރު ވިދާޅުވީ، މިދިޔަ އަހަރު ސްކޫލުތައް މަރާމާތު ކުރުމުގެ މަސައްކަތް ކުރިއަށް ގެންދެވިފައި ނުވީ، އައު ސްކޫލްތައް އިމާރާތް ކުރުމަށް ބަޖެޓް ހަމަޖެހިފައި އޮތްނަމަވެސް މަރާމާތު ކުރުމުގެ މަސައްކަތަށް އެކަށީގެންވާ ބަޖަޓެއް ނެތުމުން ކަމަށެވެ.

އެގޮތުން ސްކޫލުތަކުގެ މަރާމާތަށް ބޭނުންވާ 30 މިލިޔަން ރުފިޔާ ހަމަޖެހިފައިވާކަން ހާމަކުރައްވަމުން ވަޡީރު ވިދާޅުވީ،  ސްކޫލްތަކުގައި ކުރަން ހުރި މަރާމާތުތައް ދެނެގަތުމަށްފަހު މަރާމާތު ކުރަން ޖެހޭ ސްކޫލްތަކަށް ފައިސާ ކަނޑައަޅާ އެމަސައްކަތް ފެށިގެންދާނެ ކަމަށެވެ.

މީގެ އިތުރުން ވަޒީރު ފާހަގަ ކުރެއްވި ގޮތުގައި މަރާމާތުގެ މަސައްކަތް ކުރުމަށްޓަކައި ހުރިހާ ސްކޫލެއްގެ ޙާލަތު ދެނެގަތުމަށް މަސައްކަތްކުރެއްވި ކަމަށެވެ. އެގޮތުން އެންމެ ބޮޑު އިސްކަމެއް ދެއްވީ ސްކޫލުގައި ރައްކާތެރިކަމާއި ހިތްހަމަ ޖެހުމާއެކު ކިޔެވުމަށް ބޭނުންވާނެ ފަދަ ކަމެއް ނެތިފައި އޮތްނަމަ އެކަމެއް ހައްލުކުރުމަށްކަމުގައި ވަޒީރު ވަނީ ވިދާޅުވެފައެވެ.

މަރާމާތުގެ މަސައްކަތް ކުރުމަށް ބޭނުންވާ ފައިސާ ސްކޫލްތަކަށް ހަމަޖެހުމުން އެކަށީގެންވާ ބާރު މިނެއްގައި ސްކޫލްތަކުގައި މަރާމާތުގެ މަސައްކަތްތައް ފެށިގެން ދާނެ. މިސާލަކަށް ފުރާޅު ހަލާކުވެ ކްލާސްރޫމަށް ވާރޭވެހޭ ކަމުގައި ވަނީނަމަ އެކަން ހައްލުކުރުމަށް އިސްކަން ދޭނެ. ކުޑަދޮރުތައް ހަލާކުވެފައި ހުރިނަމަ އެ ރަނގަޅު ކުރުމަށް އިސްކަން ދޭނެ. ފަންކާފަދަ ވަޞީލަތްތައް ހަލާކުވެފައި ހުރިނަމަ އެކަމަށް އިސްކަން ދޭނެ

ޑރ.އިސްމާއިލް ޝަފީޢު

ހަމަ އެޔާއެކު، މިސަރުކާރު ހަވާލުވިއިރު ރާއްޖޭގެ އެކި ސަރަހައްދުތަކުގެ ސްކޫލްތަކުގައި ތަފާތު 107 މަޝްރޫޢެއް ފަށްޓަވާފައި އޮތްނަމަވެސް އޭގެ ތެރެއިން ގިނަ މަޝްރޫޢުތަކުގައި ކޮންޓްރެކްޓަރުންނަށް ދޭންޖެހޭ ފައިސާ ނުދިނުމުގެ ސަބަބުން ހުއްޓިފައިވާކަން ވަޒީރު ފާހަގަކުރެއްވިއެވެ.

އަދި ކޮންޓްރެކްޓަރުންނަށް ދޭންޖެހޭ ފައިސާ ދެއްވުމުގެ ގޮތުން ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ހުއްދައާއެކު ކޮންޓްރެކްޓަރުންނަށް އެމަސައްކަތް ނިންމުމަށް 55 މިލިޔަން ރުފިޔާ ހަވާލުކުރައްވާފައިވާ ކަމަށްވެސް ތައުލީމާ ބެހޭ ވަޒީރު އިސްމާއީލް ޝަފީޢު ވަނީ ވިދާޅުވެފައެވެ.

އެއާއެކު މާލެއާއި އަތޮޅުތެރޭގައި ހުއްޓިފައި ހުރިމަޝްރޫޢުތައް މިމަހުން ފެށިގެން ބާރު ދުވެލީގައި ކުރިއަށްގެންދާނެކަން ފާހަގަ ކުރއްވައި ވަޒީރުވަނީ އައު މަޝްރޫޢުތައް ކުރިއަށްގެންދާއިރު ޑިޒައިނިންގެ މައްސަލަތަކެއް ހުރިކަަންފާހަގަކުރެވިފައިވާކަމުގައި ވިދާޅުވެފައެވެ. އޭގެ އެންމެ ބޮޑު މައްސަލައަކީ އެވުޒާރާއިގައި ސްކޫލް އިންފްރަސްޓްރަކްޗަރ ޑިޒައިނިން ސްޓޭންޑަރޑްތަކެއް ކަނޑައެޅިފައި ނެތުންކަން ވަޒީރު ފާހަގަކުރެއްވިއެވެ.

ނަމަވެސް ކުރިއަށް އޮތްތަނުގައި މޯލްޑިވްސް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީއާއި އިމާރާތް ކުރުމާ ބިނާރާ ބެހޭ ވުޒާރާއާއެކު ސްކޫލް އެޅުމުގެ ސްޓޭންޑަރޑްތަކެއް ކަނޑައަޅައި އެކަމަށް ހައްލެއް ލިބިގެންދާނެކަމަށް ވަޒީރު ވިދާޅުވިއެވެ.

މިދިޔަ ސަރުކާރުން ވަނީ އެކި ސްކޫލްތަކުގައި ގިނަ އަދަދެއްގެ މަޝްރޫޢުތަކެއް ކުރިއަށް ގެންދިޔުމަށް ކުންފުނިތަކާ ހަވާލުކޮށްފައެވެ. އޭގެ ތެރޭގައި ކްލާސްރޫމްތައް އެޅުމަށާއި މަލްޓިޕަޕަސް ހޯލް ފަދަ ތަންތަން އިމާރާތް ކުރުމަށް ހަވާލުކޮށްފައިވެއެވެ. ނަމަވެސް އެކި ކަހަލަ މަައްސަލަތަކާ ހުރެ ގިނަ މަޝްރޫޢުތަކެއްގެ މަސައްކަތް ހުއްޓި މަޝްރޫޢު ދިގުލައިގެން ގޮސްފައި ހުރިކަން ފާހަގަކޮށްލެވެއެވެ.