ބަންދުގައި ތިބި 17 ބިދޭސީން ކާނާ ވިހަވެގެން ފަރުވާ ދެނީ

ހުޅުމާލޭ ޑިޓެންޝަން ސެންޓަރުގައި ބަންދުކޮށްފައި ތިބި 17 ބިދޭސީން، ކާނާ ވިހަވެ ހޮސްޕިޓަލުގައި ފަރުވާ ދޭން ފަށައިފި އެވެ.

ފުލުހުން ބުނީ، އިމިގްރޭޝަންސް ރޭ ބުނީ ޑިޓެންޝަން ސެންޓަރުގައި ތިބި 17 މީހުން ކާނާ ވިހަ ވެގެން ހުޅުމާލޭ ހޮސްޕިޓަލުގައި ފަރުވާ ދެމުންދާ ކަމަށެވެ.

އަދި މި ވަގުތު އެންމެ އިސްކަމެއް ދެނީ، ވީހާ ވެސް އަވަހަކަށް އެ މީހުންނަށް ފަރުވާ ދިނުމަށް ކަމަށެވެ.

ނަމަވެސް އެމީހުން ކާނާ ވިހަވީ ކޮން އެއްޗެއް ކައިގެން ކަމެއް ސާފެއް ނުވެއެވެ. އަދި އެމީހުންގެ މިހާރުގެ ހާލަތުވެސް އަދި ހާމަކޮށްފައެއް ނުވެއެވެ.

ހޮސްޕިޓަލުގައި ބަންދުގައި ތިބި އެމީހުންނަށް ފަރުވާ ދެމުންދާތީ، ހޮސްޕިޓަލް ކުރިމަތި އޮތީ ފުލުހުން ކޯޑަން ދަމައި ބަންދުކޮށްފަ އެވެ.

މި މައްސަލަ އާއި ގުޅިގެން އެޗްއާރްސީއެމުން ކުރި އެކްސް ޕޯސްޓެއްގައި ވަނީ، އިމިގްރޭޝަން ޑިޓެންޝަން ސެންޓަރުގައި ތިބި ބިދޭސީންތަކެއް ކާނާ ވިހަވެ ބައެއް ފަރާތްތައް ހާލުދެރަވެ ހޮސްޕިޓަލުގައި އެނދުމަތިކުރަންޖެހުމުން ކަންބޮޑުވުން ފާޅުކޮށްފައެވެ.

އަދި އެ ކޮމިޝަނުން މި މައްސަލަ ގާތުން ބަލައި މޮނިޓަރކުރަމުންދާ ކަމަށާ، މިކަން ސީރިއަސް މައްސަލައެއްގެ ގޮތުގައި ބަލައި, ކަން ހިނގާދިޔަގޮތް ތަހުޤީގުކުރެއްވުމަށް ކަމާބެހޭ އިދާރާތަކަށް އެ ކޮމިޝަނުން ވަނީ ގޮވާލާފައެވެ.