ރާއްޖެ އައި ޕާކިސްތާނުގެ މީހެއްގެ ލަގެޖުން 5 މިލިއަނަށް ވުރެ ގިނަ ރުފިޔާގެ މަސްތުވާތަކެތި އަތުލައިގެންފި

ވައިގެ މަގުން ރާއްޖެ އައި ޕާކިސްތާނުގެ މީހެއްގެ ލަގެޖުން 5 މިލިއަނަށް ވުރެ ގިނަ ރުފިޔާގެ މަސްތުވާތަކެތި ކަސްޓަމްސް އިން އަތުލައިގެންފިއެވެ.

މިކަމާއި ގުޅިގެން ކަސްޓަމްސް އިން ބުނީ، މި ތަކެތި އަތުލައިގެންފައިވަނީ މިމަހުގެ 12 ވަނަ ދުވަހު ޤަތަރުގެ ދޯހާއިން ރާއްޖެއައި ޕާކިސްތާނުގެ 56 އަހަރުގެ ފިރިހެން ފަސިންޖަރެއްގެ ލަގެޖުން ކަމަށެވެ. 
މިގޮތުން އޭނާގެ ލަގެޖް ގައި މަސްތުވާ ތަކެތި ރައްކާކޮށްގެން ގެނެސްފައިވާ ކަމަށް ޝައްކުކުރެވިގެން، ބަލައި ފާސްކުރަނިކޮށް މަސްތުވާ ތަކެތި ކަމަށް ޝައްކު ކުރެވޭ ތަކެތި ފެނުމުން ތަހުލީލު ކުރިކަމަށް ކަސްޓަމްސް އިން ބުންޏެވެ.

ތަހުލީލުތަކުން އެތަކެތި މަސްތުވާތަކެތީގެ ބާވަތެއް ކަމަށްވާ ހެރޮއިން އަށް ޕޮސިޓިވް ވެފައިވާ ކަމަށާއި، މިތަކެތީގެ ބަރުދަނުގައި ޕެކިންއާއި އެކު ޖުމްލަ 5.30 ކިލޯ ހުރި ކަމަށް ކަސްޓަމްސް އިން މައުލޫމާތު ދެއެވެ. އަދި މިތަކެތީގެ މަގުމަތީ އަގަކީ 5,300,000 ރުފިޔާ ކަމަށް ވެސް އެއިދާރާއިން ބުނެއެވެ.

ކަސްޓަމްސް އިން ބުނީ، މި މައްސަލައިގައި އަތުލައިގަނެވުނު ޕާކިސްތާނު މީހާ މަސްތުވާތަކެއްޗާއި އެކު ފުލުހުންނާއި ހަވާލުކޮށްފައިވާ ކަމަށެވެ.