ފެނުގެ ހިދުމަތް އަލުން ދިނުމަށް 2 ދުވަސް ނަގާނެ: ފުވައްމުލަކު ކައުންސިލް

ފުވައްމުލަކު ސިޓީގައި ދިމާވެފައިވާ ފެނުގެ މައްސަލަ ހައްލުކޮށް ހިދުމަތް އަލުން ފެށުމަށް އަދި މަދުވެގެން 2 ދުވަސް ވަރުވާނޭކަމަށް ލަފާކުރެވޭކަމަށް ފުވައްމުލަކު ސިޓީ ކައުންސިލުން ބުނެފިއެވެ.

ފުވައްމުލައް ކައުންސިލުން ރޭ ނެރުނު ބަޔާނެއްގައި ބުނެފައިވަނީ އިއްޔެ އެ ސިޓީއިން ފެނުގެ ހިދުމަތް އެއްކޮށް ކެނޑި، ރައްޔިތުންގެ ޝަކުވާތައް ގިނަ ވުމުގެ ސަބަބުން ފެނަކައާއި އެކު ބައްދަލުވުމެއް ބާއްވާފައިވާކަމަށެވެ. ކައުންސިލުން ބުނީ މި ދަނޑިވަޅުގައި ރައްޔިތުން ބޯން ބެނުންވާ ފެން ރައްޔިތުންނަށް ފޯރުކޮށް ދެވޭނެ އިންތިޒާމު ހަމަޖެއްސުމަށް ކައުންސިލުން މަސައްކަތް ކުރަމުންދާކަމަށެވެ.

އެގޮތުން އިމަޖެންސީކޮށް ފެން ބޭނުންވާ ފަރާތްތަކުން އައިޑީކާޑާއިއެކު އެމް.އެން.ޑީ.އެފްގެ އިމާރާތަށް ދިޔުމުން ކޮންމެ ގޭބީސީއަކަށް ވެސް ފެން ކޭހެއް ލިބޭނެ އިންތިޒާމް މިހާރު ހަމަޖައްސާފައިވާކަމަށް ކައުންސިލުން ބުންޏެވެ. މީގެ އިތުރުން މި މައްސަލައަށް ހައްލު ހޯދުމަށް އެކި އެކި މުއައްސަސާތަކާއި ބައްދަލުކޮށް، ސަރުކާރުގެ ހުރިހާ މުއައްސަސާތަކުގެ ސަމާލުކަމަށް ގެނެސްފައިވާކަން މި ބަޔާނުގައި ވަނީ ބުނެފައެވެ.

ފުވައްމުލައް ސިޓީގައި ފެނަކައިން ގާއިމްކޮށްފައިވާ ފެނުގެ ހިދުމަތް މެދުކެނޑުނީ އެ ސިޓީގެ ފެނުގެ ނެޓްވޯކަށް ބައެއް ފަރާތްތަކުން ކްރޮސް ކަނެކްޝަން ހަދާފައިވުމުން، ސަޕްލައި ފެން ތަޣައްޔަރުވެ، ބޭނުން ކުރުން ރައްކާތެރި ނޫން ހާލަތްތަށް ދިޔުމުންނެވެ. ކްރޮސްކަނެކްޝަން ހަދާފައިވާ ފަރާތްތަކަށް ފެނަކައިން ވަނީ ގަވާއިދާއި އެއްގޮތަށް ކަނެކްޝަން ބަދަލު ކުރަން އަންގާފައެވެ.

ފުވައްމުލައް ސިޓީއަކީ 11 ހާހެއްހާ މީހުން ދިރިއުޅެމުންދާ ރަށެކެވެ. ފުވައްމުލަކުގައި ފެނުގެ ހިދުމަތް މެދުކެނޑުމުން ދައުލަތުގެ މުއައްސަސާތަކުން ވަނީ ފެން ބޭނުންވާ ފަރާތްތަކަށް ފެން ފޯރުކޮށްދިނުމުގެ މަސައްކަތް ވަގުތުން ފަށާފައެވެ. އެގޮތުން މިކަމުގައި އެމްއެންޑީއެފުން ދަނީ ހުއްޓުމެއްނެތި މަސައްކަތް ކުރަމުންނެވެ. ވޮއިސްއަށް މައުލޫމާތު ލިބިފައިވާ ގޮތުގައި އެމްއެންޑީއެފުން މިހާރުވެސް ދަނީ އެރަށަށް ބޭނުންވާ ސާފް ބޯފެން ގެންދިއުމުގެ މަސައްކަތް ކުރަމުންނެވެ.