ފެނަކައިގެ ބްރާންޗުތައް އޮތް ދަށް ހާލަތުން އަރައިގަތުމަށް މިދަނީ މަސައްކަތް ކުރަމުން: ރައީސް މުޢިއްޒު

ރާއްޖޭގެ ކަންކޮޅުތަކުގައި ފެނަކައިގެ ބްރާންޗުތައް އޮތް ދަށް ހާލަތުން އަރައިގަތުމަށް މަސައްކަތް ކުރަމުންދާ ކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.

ރައީސް ޑރ.މުއިއްޒު މިފަދައިން ވިދާޅުވީ، ރައީސް އޮފީހުން ސިލްސިލާކޮށް ގެނެސްދޭ ރައީސް ގެ ޖަވާބު ޕްރޮގްރާމްގައި، ވ.ރަކީދޫ، ގުލްޒާރުހިޔާ، މުނިސާ ދާއޫދު، ރާއްޖޭގެތެރޭގެ ރަށްތަކަށް ދިމާވެފައިވާ ކަރަންޓު ކެނޑުމުގެ މައްސަލައަށް ދާއިމީ ޙައްލެއް ގެނައުމުގެ ވިސްނުންފުޅެއް ގެންގުޅުއްވަންތޯ ސުވާލު ކުރެއްވުމާއި ގުޅިގެންނެވެ.

މޫނިސާގެ ސުވާލަށް ޖަވާބުދެއްވަމުން ރައީސް މުޢިއްޒު ވިދާޅުވީ، އެމަނިކުފާނު މި ވެރިކަމާ ހަވާލުވެވަޑައިގެންނެވި އިރު ރާއްޖޭގެ ކަންކޮޅުތަކުގައި ޤާއިމުކޮށްފައިވާ ފެނަކައިގެ ބްރާންޗުތަކުގެ ހާލަތު އޮތީ ވަރަށް ދަށްކޮށް ކަމަށެވެ.

ހަމައެކަނި ކުންފުނި، އެތައް ސަތޭކަ މިލިއަން ރުފިޔާއަކުން އެކި ފަރާތްތަކަށް ދަރާފައި އޮތީ އެކަންޏެއް ނޫން. ޖެންސެޓުތަކާއި އެކިކަހަލަ އާލާތްތައް ހުރީ އެއްގޮތަކަށްވެސް މެއިންޓެއިން ނުކޮށް. އެއްގޮތަކަށްވެސް ނުބަލަހައްޓާ.

ރައީސް މުޢިއްޒު ވިދާޅުވިއެވެ

ރައީސް މުޢިއްޒު ވިދާޅުވީ، އެކަމުގެ ސަބަބުން މިހާރު ވަނީ އެތައް ރަށެއްގައި އެތަކެތި ބަދަލުކުރަންޖެހިފައިވާ ކަމަށެވެ.

އަދި އެކި ރަށްރަށުގައި ހުރި ޖަނަރޭޓަރުތައް ބަދަލުކުރުމުގެ މަސައްކަތް ކުރައްވަމުން ގެންދަވާ ކަމަށާއި އާ ޖެންސެޓުުތައް ގެނައުމުގެ މަސައްކަތް މިހާރު ކުރެވެމުންދާކަމަށް އެމަނިކުފާނު ވިދާޅުވިއެވެ.

އަޅުގަނޑުމެން ޓްރާންސިޝަން މަރުހަލާގައި އަޅުގަނޑުމެން އެއްކުރި މައުލޫމާތުން އަޅުގަނޑުމެންނަށް މިކަން އެނގިފައިވާތީ، އެހިސާބުން ފެށިގެން މަސައްކަތް ފަށާފައި މިވަނީ.

ރައީސް މުޢިއްޒު ވިދާޅުވިއެވެ

މިހާރުވެސް ބައެއް ރަށްތަކަށް ދިމާވެފައިވާ ކަރަންޓުގެ މައްސަލަތަކަށް ޙައްލެއް ގެނެވިފައިވާކަން ފާހަގަކުރައްވައި ރައީސް މުޢިއްޒު ވިދާޅުވީ، ކުރިއަށް އޮތް ދުވަސްތަކުގައި ފެނަކަ މިއަދު އޮތް ދަށް ހާލަތުން އަރައިގަނެގެން ދާނެ ކަމަށެވެ.

އަދި ރާއްޖޭގެ ރަށްތަކަށް ދިމާވެފައިވާ މައްސަލަތަކަށް ދާއިމީ ޙައްލެއް ގެންނަވާނެކަމުގެ ޔަގީންކަން ރައީސް މުޢިއްޒު ވަނީ ދެއްވާފައެވެ.