ފުލުހުންގެ ބެލުމުގެ ދަށުގައި ހުރި ސިނިގިރޭޓުތަކެއް ގެއްލުނު މައްސަލައެއް ބަލަނީ

ވިލިމާލެ ފުލުހުންގެ ބެލުމުގެ ދަށުގައި ހުރި ސިނގިރޭޓުތަކެއް ގެއްލުނު މައްސަލައެއް ފެންމަތިވެއްޖެއެވެ.

ފުލުހުން މިއަދު ބުނީ، ޤާނޫނާ ޚިލާފަށް ރާއްޖެއަށް އެތެރެކުރިކަމަށް ތުހުމަތުކުރެވޭ ސިނގިރޭޓުތަކެއް ފުލުހުންގެ ބެލުމުގެ ދަށުގައި ހުއްޓާ ވިލިމާލެ ޕޮލިސް ސްޓޭޝަނުން ގެއްލިފައިވާ މައްސަލައެއް ފުލުހުން ތަހުޤީޤު ކުރަމުންދާ ކަމަށެވެ.

ވިލިމާލެ ފުލުހުންގެ ބެލުމުގެ ދަށަށް ގެނެވުނު 32 ކާޓަން ސިނގިރޭޓުގެ ތެރެއިން 6 ކާޓަން މަދުވެފައިވާ ކަމަށް ފުރަތަމަ ފާހަގަކުރެވި، އެ މައްސަލަ ބަލަމުން ދަނިކޮށް އިތުރު 25 ކާޓަން ސިނގިރޭޓު ވެސް ގެއްލިފައިވާކަމަށް ވެސް ފުލުހުން ވަނީ ބުނެފައެވެ.

ފުލުހުންގެ ބެލުމުގެ ދަށުން 6 ކާޓަން ސިނގިރޭޓު ގެއްލުނު މައްސަލައަކީ ބިދޭސީއެއްގެ އަތުން 2025 ވަނަ އަހަރުގެ މޭ މަހުގެ 23 ވަނަ ދުވަހު ހިފަހައްޓާފައިވާ ތަކެއްޗެވެ. މި ތަކެތި ވިލިމާލެ ޕޮލިސް ސްޓޭޝަންގައި ބަހައްޓާފައި ހުއްޓާ، ކަސްޓަމްސްއާ ޙަވާލުކުރުމަށްޓަކައި މި މަހުގެ 12 ވަނަ ދުވަހު ބެލި އިރު، 32 ކާޓަންގެ ތެރެއިން 6 ކާޓަން ސިނގިރޭޓު މަދުވެފައިވާކަން ފާހަގަ ކުރެވުނު ކަމަށް ވެސް ފުލުހުން ބުންޏެވެ.

އަދި އެ މައްސަލައިގައި ކަން ހިނގާފައިވާ ގޮތް ބަލަމުން ދަނިކޮށް، ވިލިމާލެ ޕޮލިސް ސްޓޭޝަންގެ ބެލުމުގެ ދަށުގައި ހުރި އިތުރު ސިނގިރޭޓުތަކެއް ވެސް ގެއްލިފައިވާކަން ފާހަގަ ކުރެވުނު ކަމަށާއި، އެއީ މިދިޔަ އަހަރުގެ ޑިސެމްބަރު މަހުގެ 23 ވަނަ ދުވަހު ދެ ބިދޭސީއެއްގެ އަތުން ފުލުހުންގެ ބެލުމުގެ ދަށަށް ގެނެސްފައިވާ 25 ކާޓަން ސިނގިރޭޓު ކަމަށް ވެސް ފުލުހުން ބުންޏެވެ. އެހެންކަމުން މި ދެ މައްސަލައިގައި ޖުމްލަ 31 ކާޓަން ސިނގިރޭޓު ގެއްލިފައިވާ ކަމަށް ފުލުހުން ބުންޏެވެ.

މި މައްސަލަތަކާ ގުޅިގެން ފުލުހުންގެ ތެރެއިން ހިންގަންޖެހޭ އިދާރީ ކަންކަން ބެލުމުގެ މަސައްކަތް ޕްރޮފެޝަނަލް ސްޓޭންޑާޑްސް ކޮމާންޑްއިން ތަހުގީގުކުރަމުންދާ ކަމަށް ފުލުހުން ބުންޏެވެ. އަދި ގެއްލުނު ސިނގިރޭޓުތަކާ ގުޅޭ ޖިނާއީ ތަހުޤީޤެއް ވަކި މައްސަލަތަކެއްގެ ގޮތުގައި ބަލަމުންދާ ކަމަށް ވެސް ފުލުހުން ބުންޏެވެ.