އައްޑޫގައި އިންޑިޔާގެ މިލިޓަރީ ބޭސްއެއް ގާއިމްކުރުމަށް ވަނީ އެއްބަސްވެފައި: އުމަރު

އައްޑޫ ސިޓީގައި އިންޑިޔާގެ މިލިޓަރީ ބޭސްއެއް އެޅުމަށް ކުރީގެ ރައީސް މުހައްމަދު ނަޝީދު އެއްބަސްވެ ވަަޑައިގަންނަވާފައިވާކަމަށް ކުރީގެ ހޯމް މިނިސްޓަރ އުމަރު ނަސީރު ވިދާޅުވެއްޖެއެވެ.

އުމަރު ނަސީރު މިހެން ވިދާޅުވީ ރޭ ޗެނަލް13 ގެ ޕްރޮގްރާމެއްގައި ވާހަކަފުޅު ދައްކަވަމުންނެވެ.

އުމަރު ވިދާޅުވީ އައްޑުއަތޮޅުގައި މިލިޓަރީ ބޭސް އެއް ގާއިމް ކުރުމަށް ކުރީގެ ރައީސް ނަޝީދާއި އިންޑިޔާގެ ބޮޑުވަޒީރު ނަރެންދްރަ މޯދީއާއެކު އެއްބަސްވެފައިވާކަމަށެވެ. އަދި ހެލިކޮޕްޓަރާއި ރާޑަރ ބެލެހެއްޓުމުގެ ނަމުގައި އިންޑިޔާ ސިފައިން ރާއްޖޭގައި ތިބެނީ ރާއްޖޭގައި މިލިޓްރީ ބޭސްއެއް ގާއިމް ކުރުމަށްކަމަށް އުމަރު ވިދާޅުވިއެވެ.

"ރާޑަރު ބަލަހައްޓަން ސިފައިން، މަތިންދާބޯޑު ޑޯނިއާ ބަލަހައްޓަން ސިފައިން، ހެލިކޮޕްޓަރު ބަލަހައްޓަން ސިފައިން، މާދަމާ ގެރިގާޑިޔަލެއް ގެނަސްފިއްޔާ ގެރިގާޑިޔާ ބަލަހައްޓަންވެސް ސިފައިން. މީ މިކަމަކީ ސިފައިން ބޭލުން މީގެ ފަހަތުގައޮތީ، މިއީ ރާއްޖޭގައި މިލިޓްރީ ބޭސްއެއް ގާއިމް ކުރުމަށް ކުރެވޭ މަސައްކަތެއް"، އެބޭފުޅާ ވިދާޅުވިއެވެ.

ރޭގެ ޕްރޮގްރާމްގައި އުމަރު ވަނީ އެމްޑީޕީން މަޖިލީހުގެ މެޖޯރިޓީ ހޯދުމަށް މަސައްކަތް ކުރަމުންދަނީ އެކަން ކުރުމަށް މަގުފަހިކުރުންކަމަށް ތުހުމަތުކުރައްވާފައެވެ.

އަދި މިލިޓަރީ ބޭސްއެއް ގާއިމްކޮށްފިނަމަ އިގްތިސާދީ ގޮތުން އައްޑޫއަށް ބޮޑެތި ގެއްލުންތަކެއް ލިބޭނެކަމަށް އުމަރު ވަނީ ފާހަގަކުރައްވާފައެވެ.

"އޭރުން އައްޑުއަތޮޅުގެ ޓޫރިޒަމް މަރުވީ އިނގޭތޯ، އައްޑޫގެ ގަން އެއީ މިލިޓްރީގެ އެއާ ކްރާފްޓް ޖައްސާ ތަނަކަށް ވާނީ، އައްޑޫގެ ބަނދަރު ވާނީ މަނަވަރު ބަނދަރުކުރާ ތަނަކަށް، އައްޑޫގެ ރައްޔިތުން ތިބޭނީ އިންޑިޔާގެ އެތާތިބޭ ސިފައިންނަށް ހެދިބިލެތް ވިއްކާ މީހުންނަށް ބަދަލުވެފަ. އެމީހުންގެ ޓޫރިޒަމް އާއި އެމީހުންގެ ގެސްޓްހައުސް ވިޔަފާރި އާއި އެހެރަ ޝެންގްރިއްލާ ރިސޯޓް ތަކާ އެ ހުރިހާ ތަނެއް ފަޅުވެގެން ދާނެ، އައްޑޫ ގަމުގެ އެއާޕޯޓް އޮންނާނީ މިލިޓްރީ އެއްޗެހި ޖައްސާ އެއާޕޯޓަކަށް، މިއަދު އެތަނުގައި ޖައްސާ ޕްރައިވެޓް ޖެޓްތަކާ އެއްޗެހި ނުޖައްސާނެ އޭރަކުންނެއް،" އުމަރު ވިދާޅުވިއެވެ.