ސަރުކާރުން އެޅި ފިޔަވަޅުތަކުގެ ސަބަބުން 16 ބިލިޔަން ރުފިޔާ ސަލާމަތް ކުރެވިއްޖެ: ވަޒީރު ސަޢީދުު

ސަރުކާރުން މިހާތަނަށް އަޅާފައިވާ ފިޔަވަޅުތަކާއެކު 6 މަސް ދުވަހުގެ ތެރޭގައި 16 ބިލިއަން ރުފިޔާ ސަލާމަތް ކުރެވިފައިވާ ކަމަށް އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުހައްމަދު ސަޢީދު ވިދާޅުވެއްޖެއެވެ.

ޕީއެސްއެމް ނިއުސްގެ ރާއްޖެ މިއަދު ޕްރޮގްރާމުގައި ވާހަކަދައްކަވަމުން ސައީދު ވިދާޅުވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ސަރުކާރާ ހަވާލުވެވަޑައިގެންނެވިއިރު މާލީ ގޮތުން ރާއްޖެ އޮތީ އިނދަޖައްސާލާފައިކަމަށާ، ދައުލަތާއި ސަރުކާރުގެ ކުންފުނި ތަކުގެވެސް ބޮޑު ދަރަންޏެއް އޮތް ކަމަށެވެ.

ފެނަކައިގައި އެބައޮތް، ނުދައްކާހުރި 3.2 ބިލިއަން ރުފިޔާ. ކްރެޑިޓަށް މަސައްކަތް ކުރުވާފައި ހުރި. އެ ފަރާތްތައް މިއަދު އެތިބީ ހަދާނެގޮތް ހުސްވެފައި.

ވަޒީރު މުހައްމަދު ސަޢީދު

މީގެ އިތުރުން، މިދިޔަ ސަރުކާރުން ވަނީ 3 އަހަރު ތެރޭ 8 ބިލިއަން ރުފިޔާ ޗާޕުކޮށް ކުރަން ނުޖެހޭ އެތަކެއް ޚަރަދުތަކެއް ކޮށްފައި ކަމަށާ، ރާއްޖޭގައި މިދިޔަ 100 އަހަަރުންވެސް ނުއުފެއްދޭ ވަރުގެ ދަރަންޏެއް އެންމެ ފަސް އަހަރުތެރޭގައި އުފައްދާފައިވާކަމަށް ސަޢީދު ވުދާޅުވިއެވެ.

މިހުރިހާ ކަމަކާއެކުވެސް، އަދުގެ ސަރުކާރުން ނިމިދިޔަ 6 މަސް ދުވަހު އެޅި ފިޔަވަޅުތަކުން މިއަހަރު މިހާތަނަށް 16 ބިލިއަން ރުފިޔާ ސަލާމަތްކޮށްފައިވާ ކަމަށް ވަޒީރު ވިދާޅުވުއެވެ.

“މިހުރިހާ ކަމަކާއެކުވެސް މި ދިޔަ 6 މަސް ދުވަހުގެ ތެރޭގައި ގާތްގަނޑަކަށް 16 ބިލިއަން ރުފިޔާ މިހުރިހާ ޚަރަދު ކުޑަކުރުމެއްގެ ތެރެއިން އަރަނި އިނގޭތޯ، މާނައަކީ ސޭވް ކުރެވިއްޖެއޭ. އަދި ދަރަނި ދެއްކުމަށް އޮތް ސޮވެރިން ފަންޑުގައި މިހާރު 60 މިލިއަން ޑޮލަރު އެބަހުރި"

ވަޒީރު މުހައްމަދު ސަޢީދު

ސަޢީދު އިތުރަށް ވިދާޅުވީ، މި ސަރުކާރުން ދައްކަމުންދާ ދަރަންޏަކީ މިވީ ދުވަސްތަކުގެ ތެރޭގައި މި ސަރުކާރުން އުފެއްދި ދަރަންޏެއް ނޫން ކަމަށާއި، އެއީ ފާއިތުވި ސަރުކާރު ތަކުގެ ދަރަނި ކަމަށެވެ. އަދި ނިމިދިޔަ ސަރުކާރުން ރާއްޖެ ވައްޓާލު އަނދަވަޅަށް، ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ސަރުކާރުން ވައްޓާނުލާނެ ކަމަށާ، އެފދަ ހާލަތަކަށް ދެވަނަ ފަހަރަށް ދިއުމަށް ފުރުސަތު ނުދެއްވާނެކަމަށެވެ.