ސަރުކާރު ހިންގާ ކޯލިޝަންގެ މަޖިލިސް މެންބަރުން ހިމެނިވަޑައިގަންނަވާ ޖޮއިންޓް ޕާލަމަންޓްރީ ގްރޫޕް ރޫޅާލާނެކަމުގެ އިޝާރާތެއް އެމްޑީޕީންކޮށްފިއެވެ.

މިކަން ހާމަކޮށްފައިވަނީ މިއަދު އެމްޑީޕީން ނެރުނު އެޕާޓީގެ ޕާލިމަންޓްރީ ގްރޫޕްގެ ނޫސް ބަޔާނެއްގައިއެވެ.

މި ބަޔާނުގައި ވާގޮތުގައި ރައީސުލްޖުމްހޫރިއްޔާކަން ކުރައްވާފައިވާ ބޭފުޅަކަށް ރައްޔިތުންގެ މަޖިލީހުގެ މެމްބަރުކަމަށް ކުރިމަތިނުލެއްވޭނޭގޮތް ހެއްދެވުމަށްޓަކައި ޖޮއިންޓް ޕާރލަމެންޓްރީ ގްރޫޕް ގެ ޖުމްހޫރީ ޕާރޓީއަށް ނިސްބަތްވެވަޑައިގަންނަވާ ދިއްދޫ ދާއިރާގެ މެމްބަރ ޢަބްދުލްލަތީފު މުޙައްމަދު، ޤާނޫނުއަސާސީއާ ކަނޑައެޅިގެން ޚިލާފަށް މަޖިލީހަށް އިސްލާޙެއް ހުށަހަޅުއްވައި، އަދި އެ އިސްލާޙު އަނބުރާ ނަންގަވާފައި ނުވާތީ، ދިވެހިރައްޔިތުންގެ ޑިމޮކްރެޓިކް ޕާރޓީ ގެ ޕާރލަމެންޓްރީ ގްރޫޕުން އެކަން އެންމެ ހަރުއަޑުން ކުށްވެރިކޮށްފައިވެއެވެ.

އަދި އެމްޑީޕީގެ ރައީސް މުޙައްމަދު ނަޝީދަށް އަމާޒުކުރައްވައިގެން ޤާނޫނުއަސާސީއާ ޚިލާފަށް ހުށަހަޅުއްވާފައިވާ އެ އިސްލާހު އަނބުރާ ނެންގެވުމަށް ގޮވާލއި، ޖުމްހޫރީ ޕާރޓީގެ ލީޑަރޝިޕުން އެކަމުގައި އިސް ދައުރެއް އަދާކުރައްވައި އެކަން ކަށަވަރުކޮށްދެއްވުމަށް ވެސް އެމް.ޑީ.ޕީ ޕާރލަމެންޓްރީ ގްރޫޕުން ވަނީ ގޮވާލައްވާފައެވެ.

އަދި މިފަދަ ޢަމަލުތަކުގެ ސަބަބުން ޖޮއިންޓް ޕާރލަމެންޓްރީ ގްރޫޕްގެ ގުޅުމަށް އަރައިފާނޭ ބުރުލަކާ މެދު ވިސްނާވަޑައިގަތުމަށާއި މަސްލަޙަތު ނުގެއްލޭނޭގޮތަށް ޢަމަލުކުރެއްވުމަށް ވެސް އެމްޑީޕީގެ ބަޔާނުގައި އިލްތިމާސްކުރައްވާފައިވެއެވެ.

މިއީ އެމްޑީޕީ ރައީސް މުހައްމަދު ނަޝީދަށް ނިސްބަތްކޮށް ޖުމްހޫރީ ޕާޓީގެ ލީޑަރު ހޫނު ބަހުގެ ހަމަލާތަކެއް ދިނުމަށްފަހު ދެޕާޓީ ދޭތެރޭ އުފެދިފައިވާ ނުތަނަވަސްކަން އިތުރު ވެގެންދާނެކަމަށް ކަމަށް ބެލެވެއެވެ.

މެންބަރު ލަތީފް ހުށަހަޅުއްވި ހުށަހެޅުން ނެގުމަށް ބާރު އަޅުއްވާނެކަމަށް ޖޭޕީގެ ޕީޖީ ލީޑަރު އަބްދުﷲ ރިޔާޒް ވަނީ ވިދާޅުވެފައެވެ. ނަމަވެސް ލަތީފް ވަނީ މިކަމާ ދެކޮޅު ހައްދަވާފައިކަން ފާހަގަކޮށްލެވެއެވެ.