ފުވައްމުލަކުގައި ލޯންޗަކާއި ޑިންގީއެއް ޖެހި ނުރައްކާތެރި އެކްސިޑެންޓެއް ހިނގައި ދެމީހަކަށް އަނިޔާވެއްޖެ

ފުވައްމުލަކުގައި ލޯންޗަކާއި ޑިންގީއެއް ޖެހި ހިނގި ނުރައްކާތެރި އެކްސިޑެންޓްގައި ދެމީހަކަށް އެކިވަރުގެ އަނިޔާ ވެއްޖެއެވެ.

”ވޮއިސް“ އަށް މައުލޫމާތު ދެއްވަމުން ފުލުހުންގެ މީޑިއާ އޮފިޝަލް ވިދާޅުވީ، ރޭގެ ވަގުތެއްގައި، ޏ. ފުވައްމުލަކު ބޮޑުފަންނާ ދިމާލު ކަނޑުމަތީގައި ލޯންޗަކާއި ޑިންގީއެއް ޖެހި އެކްސިޑެންޓް ވެފައިވާ ކަމުގެ މައުލޫމާތު ފުލުހުންނަށް ރިޕޯޓްކޮށްފައިވާ ކަމަށެވެ.

އަދި ތަހުގީގަށް މިހާތަނަށް ލިބިފައިވާ މައުލޫމާތަށް ބަލާއިރު، މި ހާދިސާ ހިނގާފައިވަނީ "ސަދަން ސްޕޯޓްސް ފިޝިންގ" ލޯންޗު ދުއްވާފައި ދަނިކޮށް، ބޮޑުފަންނު ކައިރީގައި މަޑުކޮށްގެން އޮތް ޑިންގީއެއްގައި ޖެހިގެން ކަމަށް އޮފިޝަލް ވިދާޅުވިއެވެ.

ފުލުހުން އިތުރަށް ވިދާޅުވީ، މި އެކްސިޑެންޓް ހިނގި ވަގުތު ޑިންގީގައި 3 މީހަކު ތިބިއިރު، އޭގެ ތެރެއިން 2 މީހަކަށް އެކިވަރުގެ އަނިޔާވެފައިވާ ކަމަށެވެ.

ހާދިސާގައި ބޮޑަށް އަނިޔާތައް ލިބުނު މީހާގެ ބޮލަށާއި، މޭ ކަށިގަނޑަށްވެސް ގެއްލުންލިބުފައިވާ ކަމަށް އާއިލާއިން ބުނެއެވެ.

ފުލުހުން ބުނީ ހާދިސާ ހިނގުމާއެކު، ލޯންޗުގައި ތިބި ފަރާތްތަކުން ޑިންގީގައި ތިބި މީހުން ލޯންޗަށް ނަގައިގެން ފުވައްމުލަކަށް ގެނެސް، ފަރުވާ ދިނުމަށްޓަކައި ހޮސްޕިޓަލަށް ގެންގޮސްފައިވާ ކަމަށެވެ.

މި ހާދިސާގައި އެ ޑިންގީގެ ދިރުނބާކޮޅު ވަނީ ވަރަށް ބޮޑަށް ހަލާކުވެފަ އެވެ. އަދި އެ ލޯންޗަށް ވެސް ބޮޑެތި ގެއްލުންތަކެއް ލިބުނު ކަމަށް ވެ އެވެ.

މި ހާދިސާ ފުލުހުން ދަނީ ތަހުގީގުކުރަމުންނެވެ