ޑްރަގް ޓްރެފިކިންގގެ މައްސަލައެއްގައި ދެ ލޯބިވެރިން ބަންދުކޮށްފި؛ ތަކެތި ފެނުނީ އެމީހުން ދިރިއުޅޭ ގޭގެ ސިޑި ކައިރިން

މަސްތުވާތަކެތި ގެންގުޅެ، ބޭނުންކޮށް އަދި ޓްރެފިކް ކުރިކަމުގެ ތުހުމަތުގައި ފިރިހެނަކާއި އަންހެނަކު ހައްޔަރުކޮށް، އެ ދެ މީހުންގެ ބަންދަށް ކްރިމިނަލް ކޯޓުން މުއްދަތު ޖަހައިފިއެވެ.

މި މައްސަލައިގައި ހައްޔަރުކޮށްފައިވަނީ ޝިވާން އިބްރާހީމް، 45 އަހަރު އަދި އާމިނަތު ނިސާ 41 އަހަރު އެވެ. މި ދެ މީހުން ކަސްޓޯޑިއަލް ޖަލެއްގައި ބަންދުކޮށްފައި ބެހެއްޓުމަށް ކޯޓުން ވަނީ 5 ދުވަހުގެ މުއްދަތެއް ދީފައެވެ. އެއީ 1 ނޮވެންބަރު 2026 އިން ފެށިގެން 6 ނޮވެންބަރު 2026 ގެ ނިޔަލަށެވެ.

ކްރިމިނަލް ކޯޓުގެ ގާޒީ އިބްރާހީމް ޒިހުނީ ނެރުއްވި ބަންދު އަމުރުގައި ވާގޮތުން، މި މީހުން ހައްޔަރުކޮށްފައިވަނީ ޖިނާއީ އިޖުރާއަތާ އެއްގޮތަށެވެ. އަދި އެމީހުންގެ މައްޗަށް ތުހުމަތުކުރެވޭ ކޮންމެވެސް މިންވަރެއްގެ ހެކި ފުލުހުންގެ ހާދިސާ ރިޕޯޓުން ހާމަވާން އޮތުމާއެކު، ބަންދުން ދޫކޮށްލައިފިނަމަ މުޖުތަމަޢުގެ ސަލާމަތަށް ނުރައްކަލެއް ކުރިމަތިވެދާނެތީ ބަންދުގައި ބަހައްޓަން ވަނީ އަމުރުކޮށްފައެވެ.

ފުލުހުންގެ އިންވެސްޓިގޭޝަން އޮފިސަރު (އައިއޯ) ކޯޓުގައި ވިދާޅުވީ، ޝިވާންއާއި އޭނާއާ ލޯބީގެ ގޮތުން ގުޅިގެން އުޅޭ ފަރާތް ދިރިއުޅޭ ގޭގެ ސިޑިކައިރީގައި ހުރި ކޮތަޅެއްގެ ތެރެއިން މަސްތުވާތަކެތި ފެނިފައިވާ ކަމަށެވެ. އަދި އެތަނުން ދެވެނީ ހަމައެކަނި ޝިވާންގެ ކޮޓަރިއަށް ކަމަށާއި، އޭނާގެ އަތުގައި އޮތް ތަޅުދަނޑިފަތިން އެތަނުގެ ތަޅުތައް ހުޅުވިފައިވާ ކަމަށްވެސް އައިއޯ ފާހަގަކުރެއްވިއެވެ. ނަމަވެސް ދިފާއުގައި ޝިވާން ބުނެފައިވަނީ، އެ ގޭގެ ގްރައުންޑް ފްލޯގައި ކެފޭއަކާއި ގުދަނެއް ހުންނާތީ، އެތަނުގެ މީހުންނަށް ވެސް އެ ސިޑި ސަރަހައްދަށް ވަދެވޭނެ ކަމަށެވެ.

މީގެއިތުރުން، ޝިވާންއާ ގުޅުންހުރި ގެއެއްގެ ފަސްޓް ފްލޯ އެޕާޓްމަންޓުން ހާމައަށް ހުރި މަސްތުވާތަކެއްޗާއި، ގިނަ އަދަދެއްގެ މަސްތުވާތަކެތި ރައްކާކޮށްފައި ހުއްޓާ ފެނިފައިވާ ކަމަށް ފުލުހުން ބުންޏެވެ. އަދި މަސްތުވާތަކެތި ބަންދުކުރާ އާލާތްތަކާއި، ވިއްކި ހިސާބުތައް ލިޔެފައިވާ ފޮތެއް ވެސް އެތަނުން ފެނިފައިވާ ކަމަށް އައިއޯ ކޯޓުގައި ބަޔާންކުރިއެވެ.

މިކަމާ ގުޅިގެން ދިފާއުގައި ޝިވާން ބުނެފައިވަނީ، އެއީ އޭނާގެ ގެ ނަމަވެސް، އެގެއިން ނުކުމެގެން އެހެން ތަނެއްގައި ކުއްޔަށް އުޅޭތާ 5 އަހަރު ވެއްޖެ ކަމަށެވެ. އަދި މަސްތުވާތަކެތި ފެނުނު ކަމަށް ބުނާ ތަނަކީ ދޮރެއް ނެތި، ކޮންމެ މީހަކަށްވެސް ވަދެނިކުމެވޭ ގޮތަށް ހުންނަ ތަނެއް ކަމަށާއި، އެތަނުން އޭނާއާ ގުޅުންހުރި އެއްވެސް އެއްޗެއް ފެނިފައިނުވާނެ ކަމަށެވެ.

ޝަރީއަތުގެ މަޖިލީހުގައި ވަކީލެއްގެ ފުރުސަތަށް އެދިފައިވާތީ، ޝަރީއަތުން ވަނީ ވަކީލަކު ހަމަޖެއްސުމަށް ކުރު މުއްދަތެއް ދީ، ވަކީލާ ގުޅޭނެ އިންތިޒާމު ހަމަޖައްސައިދިނުމަށް ފުލުހުންނަށް އަންގާފައެވެ.