އަލިފާން ނިއްވުމާ ގުޅޭ އަސްކަރީ ތަމްރީންތަކެއް މާލެ ސަރަހައްދުގައި ފަށައިފި
ކުއްލި ނުރައްކަލުގެ ހާލަތްތަކުގައި އިދާރާތައް ގުޅިގެން ހަރަކާތްތެރިވުމުގެ ގާބިލުކަން އިތުރުކުރުމުގެ ގޮތުން، އެމްއެންޑީއެފުން މާލެ ސަރަހައްދުގައި ކުރިއަށްގެންދާ އަސްކަރީ ތަމްރީނުތަކުގެ ތެރެއިން އަލިފާން ނިއްވުމުގެ ހާއްސަ ހަރަކާތްތަކެއް މިއަދު ފަށައިފިއެވެ.
މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން މައުލޫމާތު ދިން ގޮތުގައި، "އެކްސަސައިޒް ޖައްރާފާ 2026" ގެ ނަމުގައި ކުރިއަށްގެންދާ މި އަސްކަރީ ތަމްރީނުތައް ކުރިއަށްދާނީ ނޮވެންބަރު 22ން 23 އަށް މާލެ، ހުޅުމާލެ، ވިލިމާލެ، ތިލަފުށި އަދި ކްރޮސް ރޯޑްސް މޯލްޑިވްސްގައެވެ.
މި އެކްސަސައިޒް ކުރިއަށްދާ ވަގުތުތަކުގައި މާލޭގެ މަގުތަކުގައާއި، މާލޭ ސަރަހައްދުގައި ފަޔަރ ވެހިކަލް، ސައިރަން އެޅުމާ އެކު ހަރަކާތްތެރިވާނެ ކަމަށްވެސް ބުންޏެވެ.
މި ތަމްރީނުގެ ތެރެއިން މިއަދު ވަނީ ގެއެއްގައި ގޭސް އެކްސްޕްލޯޝަނެއް ހިނގައިގެން އުޅޭ ހާލަތެއް ސިފަކޮށްދޭ ސިނާރިއޯއެއް މ. ތުރީ ފްރެންޑްސްގައި ކާމިޔާބުކަމާއެކު ކުރިއަށްގެންގޮސްފައެވެ.
އެމްއެންޑީއެފުން ބުނީ، މި ސިނާރިއޯގެ ދަށުން މިއަދު ހެނދުނު 08:00 ހާއިރު ގޭސް ގޮވުމުގެ ހާދިސާއެއް ހިނގައިގެން އުޅޭކަމުގެ ރިޕޯޓް އެމްއެންޑީއެފް ފަޔަރ އެންޑް ރެސްކިޔު ސަރވިސްއަށް ލިބުމާއެކު، މާލެ ފަޔަރ ސްޓޭޝަނުގެ ފަޔަރފައިޓަރުން ވަގުތުން އެ ސަރަހައްދަށް ގޮސް އަލިފާން ކޮންޓްރޯލްކުރުމަށާއި މީހުން ސަލާމަތްކުރުމަށް ހަރަކާތްތެރިވާނެ ގޮތް ވަނީ ފަރިތަކޮށްފައެވެ.
މި ތަމްރީނުގައި، ހާދިސާގައި އަނިޔާވި ދެ މީހަކު ފިހިގެން ހޮސްޕިޓަލަށް ގެންގޮސް އަވަސް ފަރުވާ ދިނުމުގެ އިންތިޒާމުތައް ވެސް ވަނީ ފަރިތަކޮށްފައެވެ. މީގެއިތުރުން، ހާދިސާ ހިނގަން މެދުވެރިވި ސަބަބު ދެނެގަތުމަށްޓަކައި ދިވެހި ފުލުހުންގެ ޚިދުމަތާ ގުޅިގެން ތަޙުޤީޤުކުރުމުގެ މަރުޙަލާތައް ވެސް މި ސިނާރިއޯގެ ތެރެއިން ކުރިއަށް ގެންގޮސްފައިވާ ކަމަށް އެމްއެންޑީއެފުން ވިދާޅުވިއެވެ.
"އެކްސަސައިޒް ޖައްރާފާ 2026" އަކީ ދިމާވެދާނެ ކުއްލި ނުރައްކަލުގެ ހާލަތްތަކުގައި ސަލާމަތީ އަދި ކަމާގުޅުންހުރި އެކި މުއައްސަސާތައް ގުޅިގެން ހަރަކާތްތެރިވާނެ ގޮތްތައް ފަރިތަކޮށް، ގައުމީ ފެންވަރުގައި ތައްޔާރީ ހާލަތު އިތުރަށް ހަރުދަނާކޮށް ވަރުގަދަކުރުމުގެ މުހިންމު މަގުސަދުގައި ކުރިއަށްގެންދާ ތަމްރީނު ހަރަކާތެކެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް