ދިރާގުގެ ކުރީގެ ޗެއާމަން ރިލްވާން ޝަރީފް އަވަހާރަވެއްޖެ

ދިރާގުގެ ކުރީގެ ޗެއާމަން އަދި ވިލާ އެއާގެ މެނޭޖިން ޑިރެކްޓަރު ރިލްވާން ޝަރީފް މިއަދު އަވަހާރަވެއްޖެއެވެ. އަވަހާރަވީއިރު އުމުރުފުޅަކީ 72 އަހަރެވެ.

ރިލްވާން އަވަހާރަވީ އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގައި ފަރުވާ ހޯއްދަވަމުން ގެންދަވަނިކޮށެވެ.

ރިލްވާން ޝަރީފަކީ ދިވެހި ދައުލަތަށާއި ވިޔަފާރީގެ ދާއިރާއަށް ދިގު މުއްދަތަކަށް އަގުހުރި ޚިދުމަތްތަކެއް ކޮށްދެއްވާފައިވާ ބޭފުޅެކެވެ. އެގޮތުން، މިނިސްޓްރީ އޮފް ފިނޭންސްގެ ސްޓޭޓް މިނިސްޓަރު ކަމާއި ޑެޕިއުޓީ މިނިސްޓަރު ކަމުގެ މަގާމު އަދާކުރައްވާފައިވެއެވެ.

މީގެ އިތުރުން ދިރާގުގެ ބޯޑު އޮފް ޑިރެކްޓަރުންގެ ޗެއާމަންކަން ވެސް ރިލްވާން ކުރެއްވިއެވެ. ޖެނުއަރީ 2014 އިން ފެށިގެން ދިރާގުގެ ޗެއާމަންކަން ކުރެއްވުމަށްފަހު، އެ މަގާމުން އޭނާ ވަކިވެވަޑައިގެންނެވީ ފެބްރުއަރީ 2015 ގައެވެ. މީގެއިތުރުން އޭނާ ވަނީ ގިނަ ދުވަސްތަކެއް ވަންދެން ވިލާ އެއާގެ މެނޭޖިން ޑިރެކްޓަރުގެ މަގާމާއި، މޯލްޑިވްސް ސްޓޮކް އެކްސްޗޭންޖުގެ ޑިރެކްޓަރު ކަމުގެ މަގާމުވެސް ފުރުއްވާފައެވެ.

ރިލްވާންގެ ވަކިވެދިޔުމާ ގުޅިގެން ދިރާގުން ދިރާގުން ކުރި ތައުޒިޔާގެ މެސެޖުގައި ބުނެފައިވަނީ، 1988 ވަނަ އަހަރު އެ ކުންފުނި އުފެދުނު ދުވަސްވަރުން ފެށިގެން އެކި ފަހަރު މަތިން ބޯޑު މެންބަރެއްގެ ގޮތުގައާއި، އެންމެ ފަހުން ޗެއާޕާސަންގެ ގޮތުގައި ރިލްވާން ދިރާގަށް ކޮށްދެއްވި އަގުހުރި ޚިދުމަތްތައް އަބަދުވެސް ހަނދާން ހުންނާނެ ކަމަށެވެ.

އަދި މި ބޮޑު ހިތާމައިގެ ވަގުތުގައި އާއިލާއަށް ކެތްތެރިކަން ދެއްވައި، މަރުހޫމަށް ސުވަރުގޭގެ ދާއިމީ ނިއުމަތް މިންވަރުކޮށްދެއްވުން އެދި ދިރާގުން ވަނީ ދުއާކޮށްފައެވެ.

ރިލްވާންއަކީ އޮސްޓްރޭލިއާގެ މެލްބަންގައި ހުންނަ އާރުއެމްއައިޓީ ޔުނިވާސިޓީން މާސްޓާރސް އޮފް ބިޒްނަސް އެޑްމިނިސްޓްރޭޝަން (އެމްބީއޭ) އިން އިންޓަނޭޝަނަލް މެނޭޖްމަންޓުގެ ދާއިރާއިން މަތީ ތައުލީމު ހާސިލު ކުރައްވާފައިވާ ބޭފުޅެކެވެ.