ދިރާގު މޯލްޑިވްސް ގޭމިންގ ކޮންކުއެސްޓް 2026 ގައި ބައިވެރިވުމުގެ ފުރުސަތު ހުޅުވާލައިފި
ދިވެހިރާއްޖޭގެ އެންމެ ބޮޑު ގޭމިންގ ޕްލެޓްފޯމް ކަމުގައިވާ ދިރާގު ގޭމާސް ގިލްޑް (ޑީ.ޖީ.ޖީ) އިން އިންތިޒާމުކޮށްގެން ބާއްވާ "ދިރާގު މޯލްޑިވްސް ގޭމިންގ ކޮންކުއެސްޓް" (ޑީ.އެމް.ޖީ.ސީ) 2026 ގައި ބައިވެރިވުމުގެ ފުރުސަތު މިއަދު ހުޅުވާލައިފިއެވެ.
ގިނަ ބައެއްގެ ބޮޑު ޝައުޤުވެރިކަމަކާއެކު އިންތިޒާރުކުރަމުންދާ މި މުބާރާތް ބޭއްވުމަށް ހަމަޖެހިފައިވަނީ މި މަހުގެ 26 އިން ފެށިގެން 28 ވާ ހޮނިހިރު ދުވަހުގެ ނިޔަލަށެވެ.
ދިރާގުން ބުނީ، މިއަހަރުގެ ޗެމްޕިއަންޝިޕްގައި ޖުމްލަ ފަސް ކުޅިވަރެއް ހިމަނާފައިވާ ކަމަށެވެ. އޭގެ ތެރޭގައި މަގުބޫލު ވީޑިއޯ ގޭމްތަކާއި ޓޭބަލްޓޮޕް ބޯޑް ގޭމްތައް ހިމެނެއެވެ. އެގޮތުން، ވީޑިއޯ ގޭމްތަކުގެ ތެރެއިން ހިމެނޭ "އީ.އޭ ސްޕޯޓްސް އެފް.ސީ 27" ކުރިއަށްދާނީ 1v1 ނޮކައުޓް އުސޫލުންނެވެ. އަދި މި ބައިން ވަނަވަނައަށް ދާ ކުޅުންތެރިންނަށް 25،000 އާއި 27،000 ރުފިޔާއާ ދެމެދުގެ ފައިސާގެ އިނާމުތަކެއް ވަނީ ކަނޑައަޅާފައެވެ.
މީގެ އިތުރުން "ޓެކެން 8" މުބާރާތް 15،000 ރުފިޔާގެ ފައިސާގެ އިނާމަކާއެކު 1v1 ޑަބަލް އެލިމިނޭޝަން ފޯމެޓަށް ކުރިއަށް ގެންދިއުމަށް ވަނީ ނިންމާފައެވެ.
އީ-ސްޕޯޓްސް ގޭމްތަކުގެ އިތުރުން، މިއަހަރުގެ މުބާރާތުގައި ޓޭބަލްޓޮޕް ދެ ކުޅިވަރެއް ވެސް އަލަށް ވަނީ ތައާރަފުކޮށްފައެވެ. އޭގެ ތެރޭގައި 5،000 ރުފިޔާގެ ފައިސާގެ އިނާމަކާއެކު ބާއްވާ "ކަޓާން" ބޯޑް ގޭމް މުބާރާތުގެ އިތުރުން، ދެމީހުންގެ ޓީމުތަކުގެ މެދުގައި ވާދަކުރާ "ވޯހޭމަރ 40,000: ކިލް ޓީމް ބްލިޓްޒް" މުބާރާތް ހިމެނެއެވެ.
އުމުރުން 12 އަހަރުން މަތީގެ ކޮންމެ ފަރާތަކަށް ވެސް ބައިވެރިވެވޭ ގޮތަށް ހުޅުވާލެވިފައިވާ މި މުބާރާތުގައި، އީ.އޭ ސްޕޯޓްސް އެފް.ސީ 27، ޓެކެން 8 އަދި ކިލް ޓީމް ބްލިޓްޒްގައި ރަޖިސްޓްރީވުމުގެ އެންމެ ފަހު މުއްދަތަކީ 22 ނޮވެމްބަރު 2026 ގެ 23:59 ކަމަށް ދިރާގުން މައުލޫމާތުދެއެވެ. އަދި ކަޓާން އަދި ވޯހޭމަރ 40،000 ގައި ބައިވެރިވުމުގެ ފުރުސަތު މުބާރާތް ނިމެންދެން ހުޅުވާލެވިފައި އޮންނާނެއެވެ.
ރާއްޖޭގެ އެންމެ ބޮޑު ގޭމިން ޕްލެޓްފޯމް ކަމުގައިވާ ޑީ.ޖީ.ޖީ އިން ދަނީ ރާއްޖޭގެ އެކި ކަންކޮޅުތަކުގައި އީ-ސްޕޯޓްސް ކުރިއެރުވުމަށް ގިނަ މަސައްކަތްތަކެއް ކޮށް، އަންނަން އޮތް ޖީލުތަކުގެ ގޭމިންގ ހުނަރުތައް ތަރައްގީކުރުމަށް މުހިންމު ދައުރެއް އަދާކުރަމުންނެވެ. މި މުބާރާތަކީ ދިރާގުން ދިވެހި ގޭމިންގ މުޖުތަމައު އައު އުސްމިންތަކަކަށް ގެންދިއުމަށް ކުރަމުންދާ މަސައްކަތްތަކަށް ލިބުނު އިތުރު ކުރިއެރުމެކެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް