ސިވިލް ކޯޓުގެ އަމުރު؛ ރީކޯ މޫސާގެ ތިން ރަށެއް ވިއްކާލަން ބީއެމްއެލްއަށް ހުއްދަދީފި

ބޭންކް އޮފް މޯލްޑިވްސް (ބީއެމްއެލް) އިން ނެގި ބޮޑު ލޯނަކަށް ފައިސާ ނުދެއްކުމާ ގުޅިގެން، އެމްޑީޕީގެ ކުރީގެ ޗެއަރޕާސަން ރީކޯ މޫސާ މަނިކު ރަހުނު ކޮށްފައިވާ ތިން ރަށެއް ވިއްކާލުމުގެ ހުއްދަ ސިވިލް ކޯޓުން ދީފިއެވެ.

މި މައްސަލައާ ގުޅިގެން ކޯޓުން ނެރުނު އަމުރުގައި ވާގޮތުން، މި ރަށްތައް ވިއްކާލުމުގެ ހުއްދަ ބޭންކަށް ލިބިގެންދަނީ ކުރިން ކޮށްފައިވާ ހުކުމާ އެއްގޮތަށް ފައިސާ ދައްކާފައި ނުވާތީއެވެ.

މިދިޔަ އޮކްޓޯބަރު މަހުގެ 28 ވަނަ ދުވަހު ނެރުނު މި ކޯޓު އަމުރުގައިވާ ގޮތުން، ރަހުނުކޮށްފައިވާ ފަރާތްތަކުގެ ތެރޭގައި ރީކޯ މޫސާ މަނިކުގެ ހެވީ ލޯޑް މޯލްޑިވްސްގެ އިތުރުން އޭނާގެ ދަރިކަލުން މުދުރިކަތު މޫސާ އަދި ދަރި ބުޝައިނަތު މޫސާ ހިމެނެއެވެ. މި ފަރާތްތަކުގެ ނަމުގައި ރަހުނުކޮށްފައިވާ މި ރަށްތައް ވިއްކާލުމަށް ބޭންކުން އެދުމުން، އެކަމަށް އެއްވެސް އިއުތިރާޒެއް ހުށަހަޅާފައެއް ނުވެއެވެ.

ކޯޓުގެ ލިޔެކިޔުންތަކުން ދައްކާގޮތުން، 2020 ވަނަ އަހަރުގެ ޖުލައި މަހު މި ދަރަނި ދެއްކުމަށް ކޯޓުން ހުކުމްކޮށްފައިވީ ނަމަވެސް، ހެވީ ލޯޑުން އެ ފައިސާ ދައްކާފައެއް ނުވެއެވެ. މިހާރު ނުދައްކާ އޮތް ފައިސާގެ ޖުމްލަ އަދަދަކީ 29.5 މިލިއަން ޑޮލަރެވެ. މި މައްސަލައިގައި ހިމެނޭ ރަށްތަކުގެ ތެރޭގައި ލ. ފަރެހާއި އެ ރަށުގައި ތަރައްގީކުރާ ރިސޯޓުގެ އިތުރުން ލ. ބޮޑުހުރާ އަދ އަދި ލ. ކުޑަފަހަރެހުގެ ހެޑްލީސް ރައިޓްސް ހިމެނެއެވެ.

ގާޒީ ރިޒްމީނާ އިދުރީސް ނެރުއްވި މި އަމުރުގައިވާ ގޮތުން، ކުރިއަށް އޮތް ތިން މަސް ދުވަހުގެ ތެރޭގައި މި ރަހުނުތައް ވިއްކާލުމުގެ ފުރުސަތު ބޭންކަށް ވަނީ ދީފައެވެ. އެގޮތުން އަގުތައް ކަނޑައަޅާފައިވަނީ ފުރަތަމަ މަހު 46.6 މިލިއަން ޑޮލަރަށާއި، ދެވަނަ މަހު 40.8 މިލިއަން ޑޮލަރަށެވެ. އަދި ފުރަތަމަ ދެ މަހު ނުވިއްކިއްޖެ ނަމަ، ތިންވަނަ މަހު 38.7 މިލިއަން ޑޮލަރަށް ވިއްކާލުމުގެ ފުރުސަތު ލިބިގެންދާނެއެވެ.

މި މުއްދަތުގެ ތެރޭގައި ރަށްތައް ވިއްކާލެވިއްޖެ ނަމަ، އެކަން ކޯޓަށް އަންގައި، ލިބޭ ފައިސާ 10 ދުވަހުގެ ތެރޭގައި ކޯޓަށް ޖަމާކުރަން ޖެހޭނެ ކަމަށް އަމުރުގައިވެއެވެ. އަދި އެ މުއްދަތުގެ ތެރޭގައި ރަށްތައް ނުވިއްކުނު ކަމުގައި ވިޔަސް، މުއްދަތު ހަމަވާތާ 10 ދުވަހުގެ ތެރޭގައި އެކަން ކޯޓަށް ރަސްމީކޮށް އަންގަން ޖެހޭނެ ކަމަށް ބަޔާންކޮށްފައިވެއެވެ.