ސަރުކާރަށް ފާޑުކިޔުން ކުށެއްގެ ގޮތުގައި ހަދަން، އަދުގެ ސަރުކާރުން ސައްކަތްކުރާނީ އެކަމާއިމެދު ކަންބޮޑުވާކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.

އެމްޑީޕީގެ ސޯޝަލް މީޑިއާ އެކްޓިވިސްޓް، ހުސެއިން ޝާފިއު (ތުއްތު) އެކްސްގައި މިއަދު ކުރި ޕޯސްޓަކާ ގުޅިގެން އޭނާ ފުލުހަށް ހާޒިރުވުމަށް ޗިޓް ފޮނުވުމާ ގުޅިގެން, ކުރީގެ ރައީސް ސޯލިހު އެކްސްގައި ކުރެއްވި ޕޯސްޓެއްގައި ވިދާޅުވީ، ސޯޝަލް މީޑިއާގައި ކުރާ ޕޯސްޓުތަކަށް ފުލުހަށް ހާޒިރުކުރުމާއި ކައުންސިލްތަކަށް އިންޒާރުގެ ސިޓީ ފޮނުވުމަކީ ދިވެހި ރައްޔިތުންގެ ބުރަ މަސައްކަތުން ހޯދި ހިޔާލުފާޅު ކުރުމުގެ މިނިވަންކަމާއި ޑިމޮކްރަސީގައި ފަހަތަށް އެޅޭ ފިޔަވަޅެއް ކަމަށެވެ. 

އަދި ސަރުކާރަށް ފާޑުކިޔުން އަމާޒުކުރުމަކީ ކުށެއްގެ ގޮތުގައި ހަދައި އަދަބު ދިނުމުގެ ބިރުވެރި މާޒީ އަލުން އިއާދަކުރަން ސަރުކާރުން މަސައްކަތްކުރުމަކީ ކަންބޮޑުވާކަމެއްކަމަށް ރައީސް ސޯލިހު ވިދާޅުވިއެވެ.

އެމްޑީޕީގެ އެކްޓިވިސްޓް ހުސައިން ޝާފިއު ފުލުހަށް ހާޡިރުކުރަން ނިންމުމުން، އެމްޑީޕީގެ ޗެއާޕާސަން ފައްޔާޒް އަދި އެޕާޓީގެ ރައީސް ޢަބްދުﷲ ޝާހިދުވެސް ވަނީ އެކަން ކުއްވެރިކުރައްވާފައެވެ. ޝާހިދު ވިދާޅުވީ ބިރުދައްކަން ތަޙްޤީގަށް ގެންދިޔުމުގެ ސަގާފަތް އަލުން ފެށިއްޖެ ކަމަށާއި ރައްޔިތުންގެ އަނގަމަތީ ގައި މަލަންއަޅައި ބަންދެއްނުކުރެވޭނެ ކަމަށެވެ. އަދި ރައްޔިތުންގެ ޙައްޤުގައި ވަކާލާތު ކުރުމުގައި އެމްޑީޕީ ފަހަތަކަށް ނުޖެހޭނޭކަމަށްވެސް ޝާހިދު ވިދާޅުވިއެވެ.

ފައްޔާޒް ވިދާޅުވީ އެކަމަކީ ދިވެހި ރައްޔިތުންގެ ބުރަ މަސައްކަތުން ހޯދި ހިޔާލުފާޅު ކުރުމުގެ މިނިވަންކަމާއި ޑިމޮކްރަސީގައި ފަހަތަށް އެޅޭ ފިޔަވަޅެއް ކަމަށާއި ހިޔާލު ފާޅުކުރުމަށް ހުދުމުހުތާރު ވެރިން އަބަދުވެސް ހުރަސް އަޅާނެކަމަށެވެ.

މިކަމާ ގުޅިގެން ދާހިލީ ވަޒީރު އަލީ އިހުސާން ވިދާޅުވެފައިވަނީ، ކޮންމެ ކަމެއް ސިޔާސީ ކުޅިވަރަކަށް ހެދުމަކީ ވަރަށް ޣައިރު ޒިންމާދާރު ކަމެއް ކަމަށާއި މިއީ ބަލައިގަނެވޭނެ ކަމެއް ނޫންކަމަށެވެ. ވަޒީރު އިހުސާން ވިދާޅުވީ، ޕޯސްޓުގައި ލިޔެފައިވާ ޖުމްލައިން ކޮންމެވެސް މީހަކަށް ނިސްބަތްކޮށް އެމީހަކު މަގެއްމަތިން ފެނިއްޖެނަމަ އެމީހަކަށް ޖިސްމާނީގޮތުން ގެއްލުމެއް ދީފާނެކަމަށް ދޭހަވާގޮތަށް އޮތުމުން އެކަމުގެ ތަފްސީލު ހޯދާ ސާފުކުރުމަކީ ކަމާބެހޭ އިދާރާތަކުން ކޮންމެހެން ކުރަންޖެހޭކަމެއްކަމަށެވެ.