އިސްރާއިލް ޕާސްޕޯޓު މަނާކުރުމާއި މެދު ފުންކޮށް ވިސްނާލަން ޖެހޭ: ގާސިމް
ޔަހޫދީންނަކީ މާތް ﷲ ބާއްވާލެއްވި ދީނެއްގެ މަތީގައި ރަސޫލުންނަށް އިމާންވާ ބަޔަކަށް ވާހިނދު އިސްރާއީލުގެ ރައްޔިތުންނަށް ރާއްޖެ އަށް ނާދެވޭގޮތަށް ޕާސްޕޯޓު މަނާކުރާއިރު ވިސްނާލަންޖެހޭކަމަށް މާމިގިލި ދާއިރާގެ މެމްބަރު ގާސިމް އިބްރާހިމް ވިދާޅުވެއްޖެއެވެ.
މިއަދު ކުރިއަށް ދިޔަ ރައްޔިތުންގެ މަޖިލީހުގެ ޖަލްސާގައި ގަލޮޅު ދެކުނު ދާއިރާގެ މެމްބަރު މީކާއީލް ނަސީމް، ޣައްޒާގައި ހިންގަމުންދާ ގަތުލުއާއްމުގެ ސަބަބުން އިސްރާއީލުގެ ރައްޔިތުންނަށް ރާއްޖެ އަށް ނާދެވޭ ގޮތަށް ޕާސްޕޯޓް މަނާކުރުމަށް ގާނޫނަށް އިސްލާހު ގެނައުމަށް ހުށަހެޅުއްވި ބިލަށް ބަހުސްކުރުން ވަނީ ކުރިއަށް ގެންގޮސްފައެވެ.
މި ބިލާއި ގުޅޭ ގޮތުން ބަހުސް ކުރައްވަމުން ގާސިމް ވިދާޅުވީ، ޕީއެންސީ ޕީޖީ ލީޑަރު އަދި އިނގުރައިދޫ ދާއިރާގެ މެމްބަރު އިބްރާހީމް ފަލާހް ދެންނެވި ފަދައިން 241 ކޮމިޓީ އަށް ބިލު ހުށަހަޅައި މައްސަލަ ނިންމެވުން މުހިންމު ކަމަށް ދެކެވަޑައިގަންނަވާ ކަމަށެވެ.
އިސްރާއީލުގެ މީހުން ރާއްޖެ އަށް އައުން މަނާ ކުރުމަށް ނިންމުމަކީ ޔަހޫދީންނަށް ރާއްޖެއަށް ނާދެވޭ ގޮތަށް ނިންމުންކަމަށް ވިދާޅުވެ ގާސިމް ވަނީ ޔަހޫދީންނަކީ މާތް ﷲ ބާއްވާލެއްވި ދީނެއްގައި، އެކަލާނގެ ފޮނުއްވި ރަސޫލުންނަށް އިމާންވެފައިވާ ބަޔަކަށް ވާހިނދު މިކަމަށް ފުންކޮށް ވިސްނާލަން ޖެހޭ ކަމަށް ވިދާޅުވެފައެވެ.
"އިސްރާއީލުގެ ނޭޝަނާލިޓީ އޮތް މީހަކަށް ދިވެހި ރާއްޖެއަށް ނާދެވޭ ގޮތަށް އަޅުގަނޑުމެން ނިންމާލާއިރު އޭގެ މާނައަކީ ޔަހޫދީންނަށް ނާދެވޭ ގޮތަށް ނިންމާ ވާހަކައެ ވިދާޅުވަނީ ކުރުގޮތެއްގައި ބުނާކަމަށް ވަންޏާ. އެހެންވީމަ އެއީ ﷲ ބާއްވާލައްވާފައިވާ ދީނެއްގައި ރަސޫލުންނަށް އީމާންވެފައި ތިބި ބަޔަކަށް ވާހިނދު އަޅުގަނޑުމެން އެފަދަ ކަމެއް ކުރުމުގެ ފުރުސަތާއި މެދު ވަރަށް ފުންކޮށް އެ ނަޒަރިއްޔާތުން ވިސްނާލަން ޖެހޭނެ. އެކަމާއި މެދު ވަރަށް ފިކުރުވެރިކަމާއި އެކު ވިސްނާލަން ޖެހޭނެ."
ގާސިމް ވިދާޅުވިއެވެ.
އޭގެ މާނައަކީ ފަލަސްތީނުގެ ލޮބުވެތި ރައްޔިތުންނަށް ނިސްބަތް ކޮށް ދެމުންދާ އަނިޔާވެރިކަމާއި، ލިބެމުންދާ އަނިޔާވެރިކަން ހިތަށް ނައުން ނޫން ކަމަށާއި، ނުވަތަ އިސްރާއީލުގެ ޕާސްޕޯޓް ގެންގުޅޭ ޔަހޫދީ އަކު ދިވެހި ރާއްޖެ އަށް އައުން މަނާކުރުމުގެ ކަންތައްތައް ކުރިއަށް ނެރެ އެކަންތައް ވަކިގޮތަކަށް ކުރުން ނޫންކަމަށް ވެސް ގާސިމް ވިދާޅުވިއެވެ.
މި މައްސަލައާއި މެދު ފިޔަވަޅެއް އަޅާއިރު ފުންކޮށް ވިސްނަން ޖެހޭ ކަމަށް ގާސިމް ތަކުރާރުކޮށް ވިދާޅުވިއެވެ.
"މިއަދު މަޖިލީހުން ނިންމަވާ ނިންމެވުން ވާންވާނީ ދިވެހި ރާއްޖޭގެ މުސްތަގުބަލަށާއި އަޅުގަނޑުމެންގެ ސަލާމަތާއި ރައްކާތެރިކަމަށާއި، އެކަމުގެ މައްޗަށް ވިސްނައިގެން ކުރެވޭ ކަމެއް މެނުވީ ނުކުރެވޭނެ."
ގާސިމް ވިދާޅުވިއެވެ.
މީގެ އިތުރުންވެސް ގާސިމް ވަނީ އެމްޑީޕީގެ ފަރާތުން މި ބިލު މަޖިލީހަށް ހުށަހެޅީ ސިޔާސީ ގޮތުން ޕީއެންސީގެ ވެރިކަން ނިމުމަކަށް ގެނެސް، ރައްޔިތުންގެ ހިތްތަކުގައި ނަފްރަތު އުފެއްދުމަށްކަމަށް ވެސް ތުހުމަތު ކުރައްވާފައެވެ. އަދި މި ބިލު ހުށަހަޅުއްވަމުން މެމްބަރު މީކާއީލް ދެއްކެވި ވާހަކަފުޅުތަކާއި ދެކޮޅު ކަމަށާއި، ބިލު ރަނގަޅަށް ދިރާސާ ކޮށްފައިނުވާކަމަށް ގާސިމް ވިދާޅުވިއެވެ.
ބިލު ހުށަހަޅުއްވަމުން މީކާއިލް ވަނީ ހުރިހާ ޕާޓީތަކަށް ވެސް ނިސްބަތްވެވަޑައިގަންނަވާ މެމްބަރުން "ގުދޯ ގުދޯ ގޮވުމުގެ" ބަދަލުގައި، ހުރިހާ ޕާޓީއެއް އެކުވެ، ރަނގަޅު މަސައްކަތްތެއް ކުރެވޭނެ ބިލެއްގެ ގޮތުގައި މި ބިލު ވެގެންދާނެ ކަމަށް އުންމީދުކުރައްވާ ކަމަށް ވިދާޅުވެފައެވެ. އަދި މި ބިލާއި ގުޅިގެން އިސްރާއީލުގެ ދިރިއުޅޭ ފަލަސްތީނު ދަރިކޮޅުގެ މީހުންނަށް ރާއްޖެ އެތެރެވުމަށް ދަތިތަކެއް ކުރިމަތިވާނެ ކަމަށް ބައެއް ފަރާތްތަކުން ބުނަމުން އަންނަކަން ފާހަގަކުރައްވަމުން މީކާއީލް ވިދާޅުވީ، މިއީ ވަކި މަގްސަދެއްގައި ހުށަހަޅާ ބިލެއް ކަމަށާއި، ބައެއް ޔަހޫދީންވެސް ގަތުލުއާއްމާއި ދެކޮޅު އިރު، މި ބިލު ހުށަހަޅަނީ އިސްރާއީލު ޕާސްޕޯޓުގައި ރާއްޖެ އެތެރެވާ މީހުންނަކީ މި ގައުމުން ބަލައިގަންނާނެ ބައެއްނޫކަން ދައުލަތެއްގެ ސިފައިގައި ހާމަކުރުމުގެ ބޭނުމުގައި ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
